གསལ་ལེ་རྒྱལ།
རིན་པོ་ཆེ། སྐྱབས་སུ་མཆི།
གསལ་ལེ་རྒྱལ།
སྟོང་ཉིད་སྙིང་རྗེ་ཟུང་དུ་འཇུག་པའི་ལམ།།
ཉམས་ལེན་མྱུར་མོས་འགྲོ་དོན་མཛད་པ་ཡིས།།
གངས་ཅན་མགོན་པོ་བསྟན་འཛིན་རྒྱ་མཚོའི་སྐུ།།
སྐྱེས་རྒ་ན་འཆིའི་དབང་ལས་གྲོལ་གྱུར་ཡང་།།
རྟོགས་པ་ལྷར་མཉམ་མི་ཡི་སྤྱོད་པ་ཡི།།
དགོངས་པ་ཉམས་ལེན་གཞན་བསྟུན་མཛད་པ་ཡིས།།
ཅུང་ཙམ་རྒས་པའི་ཉམས་སྣང་བསྟན་པ་འདི།།
མཇལ་བ་ཙམ་གྱིས་ང་དང་ང་འདྲ་རྣམས།།
ཅི་མཐོང་མངོན་སུམ་ལྟར་སྣང་བྱིས་བློ་ཡིས།།
རང་སེམས་ལྷོད་ལ་འབབ་པར་མི་ནུས་པས།།
འཆི་མེད་རྒས་མེད་ལྷ་ཡི་དངོས་གྲུབ་ཀྱིས།།
རྟག་ཏུ་སྲུང་བའི་ལྷ་ཕྲུག་གཞོན་ནུའི་སྐུ།།
དྲན་པ་ཙམ་གྱིས་དགའ་བདེ་སྐྲུན་པའི་གཟུགས།།
མ་གྱུར་འགྲོ་བའི་མིག་ལ་བདེ་སྟེར་བ།།
གངས་ཅན་མགོན་པོ་བསྟན་འཛིན་རྒྱ་མཚོ་ཡི།།
ཅི་མཛད་ཐམས་ཅད་རང་དབང་ཐོབ་པའི་སྐུ།།
རྒས་ཚུལ་མི་ཡི་སྤྱོད་པར་མི་བསྟུན་པར།།
དགོངས་ལོ་ཉི་ཤུའི་ཉིན་གུང་ཉི་མ་བཞིན།།
ལྷ་ཕྲུག་གཞོན་ནུའི་སྐུ་ལུས་པདྨོ་ཡི།།
མཛེས་སྡུག་རྟག་བརྟན་དུས་བཞིའི་རྒྱན་དུ་གནོངས།།
དྭངས་གཙང་སེམས་ནས་བབས་པའི་གསོལ་འདེབས་འདི།།
ཞེ་སའི་ཚིག་གིས་དབུལ་བའི་ཨ་མདོ་བ།།
གུས་མི་ཤེས་པའི་གུས་ལྡན་བློ་འཕེལ་གྱི།།
དད་གུས་བརྩེ་གསུམ་བརྩེགས་པའི་སྙིང་ནས་བྲིས།།
