གསལ་ལེ་རྒྱལ།

    ཁ་སང་གི་ཉིན་ཐོའི་ཁ་སྣོན།

        གསལ་ལེ་རྒྱལ། 

ཉིན་མཚན་དྲུག་ལ་ཉལ་སའི་ནང་ནས།། 

ཤི་མ་གསོན་གྱིས་འཕགས་འཚག་བྱས་པས།། 

ད་ནི་རང་གི་ཉལ་ས་རིག་ན།། 

གསལ་ལེ་ཟ་དགའ་ཉལ་སྐྱིད་ང་ཡང་།།

ཉལ་འདོད་སེམས་པ་གཏིང་ནས་ལོག་གི།

ཤི་གསོན་འཕྱི་མའི་ལ་རིང་བརྒྱུད་དུས།། 

གཅེས་པའི་བུ་མོ་ཡང་ཡང་དྲན་ཡང་།། 

བྱིས་པ་བསམ་མེད་ཅིག་གི་མིག་ཆུ་ཕུལ་ཡང་།། 

གཤིན་རྗེ་ཆོས་རྒྱལ་སྙིང་རྗེ་མེད་པས།། 

ངུས་དང་མ་ངུས་མེད་པ་ཤེས་ནས།། 

ན་ཟུག་སྙིང་ལ་རུམ་ནས་ཅི་ཡང་མ་བཤད།། 

འདི་འཕྱི་གཉིས་ཀའི་མཚམས་ལ་སླེབས་དུས།།

ཤི་མ་གསོན་གྱི་ཕྱིར་མིག་བར་ནས།། 

གསལ་མ་གསལ་གྱི་མཐོང་སྣང་ཞིག་ལ།།

གྲོགས་ཀྱི་དྭངས་མ་སྟག་གི་སྙིང་ཅན།། 

ཤད་མང་ཤེད་བུས་ཆུང་མ་ཁྲིད་ཅིང་།། 

རིལ་དཀར་ཐོག་མདའ་ལག་ལ་བཟུང་སྟེ།། 

འགོས་ནད་གཡོལ་མེད་དགྲ་ཡི་མདུན་དུ།།

གཤིན་རྗེ་ལས་མཁན་འགའ་ལ་འཐམ་འདུག། 

སྐྲ་ཡི་སི་ལི་གནམ་ལ་ཕྱོགས་ཤིང་།། 

ཁྲོ་བའི་མིག་རྩ་དམར་བོར་གྱུར་ཏེ།། 

སྙིང་རླུང་ཡ་ཆུང་སྟོད་ལ་འཚང་བས།།

སེང་གེ་རྒྱལ་བོའི་ཁོག་སྟོད་བཞིན་དུ།། 

ལུས་སྟོད་ལྡབ་གྱིས་ཆེ་རུ་གྱུར་འདུག། 

གྲོགས་པོའི་ཕྱི་ཐག་རིང་མོའི་སྣེར་འཇུས་ནས།། 

སངས་རྒྱས་སྨན་གྱི་ལྷ་ལ་གསོལ་བ་འདེབས་བཞིན།། 

ངས་ཀྱང་ཤི་མ་གསོན་གྱི་ལུས་པོའི་སྟེང་ན།། 

ལྷག་པའི་ནུས་པ་ཡོད་རྒུ་བཏོན་ནས།། 

ཁ་ཆུ་སྣ་ཆུ་ཕྱི་བཞིན་འཕག་ཙམ་བྱས་པས།། 

ཡང་བསྐྱར་མི་ཡི་ཡུལ་ལ་ལྡིག་སེ་ལྷུང་ཐལ།།

ཟས་དུག་ཆམ་པ་གཉིས་ཀ་མཉམ་ལོག་བྱས་ནས།། 

འཕྱི་མའི་ལམ་སྣེ་བར་དུ་བཙན་གྱིས་ཁྲིད་དེ། 

ཤི་གསོན་འཕྱི་མའི་ལ་ཁར་ཉིན་འགར་བསྡད་རྗེས།། 

གྲོགས་ཀྱི་དྭངས་མ་ཤེད་བུ་དང་ནི།། 

ས་མཐའི་སྲིང་མོ་དཀར་མོ་གཉིས་ཀས། 

ངང་ལག་ཟས་ཀྱི་བརྔན་པ་བཟུང་ཞིང་།། 

བླ་བྲང་རིལ་བུས་སྨན་གསོ་བྱས་ཏེ།། 

སྲོག་སྐྱོབ་བྱ་བའི་ཞབས་ཞུ་བྱས་པས།། 

དེ་རིང་བདག་གི་སྲོག་མགོ་ཐོན་ནས།། 

ཡང་བསྐྱར་གཡོག་པོའི་ལས་ལ་ཞུགས་ཡོད།། 

བཀའ་དྲིན་ཆེ་བོ་གྲོགས་ཀྱི་དྭངས་མ།།  

ཐུགས་རྗེ་ཆེ་བོ་ས་མཐའི་སྲིང་མོ།།

2024-02-21 ཆབ་བྲག་ཕོ་ཉ།

ཤགས་འགྱེད།