ང་དང་བོད་ཡིག་གི་ལས་དབང།
བཀླགས་གྲངས། 1667
བཀླགས་གྲངས། 1667
ས་ག་ཟླ་བའི་ལྷག་དཀར་བསུ་བའི་གཞས་ཚིག་ཅིག
ང་དང་བོད་ཡིག་གི་ལས་དབང་།
ངའི་ལྟེ་ཁྲག་གངས་རིའི་ཕང་བར་འཐོར།།
ངའི་ལང་ཚོ་རྩྭ་ཐང་ཡངས་པོར་འཚར།།
ངའི་རིག་རྩལ་དབྱངས་གསལ་སོ་བཞིས་གསོས།།
ངའི་མདུན་ལམ་གངས་ལྗོངས་ཕ་མཐར་བསྲིངས།།
ང་བྱིས་པའི་དུས་སུ་བེའུ་རྫི་བྱས།།
གླུ་ལ་གཞས་ལ་སོགས་ངག་ལ་བྱང།
ང་གཞོན་པའི་དུས་ལ་སློབ་གྲྭར་ཆས།།
ཚིག་སྡེབ་སྦྱོར་སྙུག་རྩེའི་རོལ་མོ་བྱས།།
ང་དར་མའི་དུས་ལ་ས་མཐའ་འགྲིམས།།
བོད་བསྟན་སྲིད་སྟེགས་བུར་བློ་རྩལ་ངོམ།།
ང་རྒས་ཀྱང་གཞོན་སེམས་མ་འགྱུར་བར།།
རྩོམ་སྒྱུ་རྩལ་སྒེག་མོར་བློ་གཏད་བཅོལ།།
ང་ཕ་ཡུལ་མེད་པའི་འཁྱམ་པོར་གྱུར།
ངས་ཕ་སྐད་ཡི་གེ་མ་བོར་ཡོད།།
ང་དབྱངས་གསལ་སོ་བཞིའི་བདག་པོ་ཡིན།།
སྐད་ཡི་གེ་གཞན་དག་དགོས་དོན་མེད།།
ངའི་ཡིད་ན་གངས་རིའི་ཞིང་ཁམས་མཛེས།།
ངའི་ངག་ན་མ་ཎིའི་དབྱངས་རྟ་སྙན།།
ངའི་ཁ་ལ་མར་རྩམ་དྲི་ཞིམ་འཁྱིལ།།
ངའི་མིང་ལ་གངས་ཅན་བོད་པ་ཟེར།།
ང་རྒས་ཀྱང་རུས་པ་དུང་ཡིན།།
དུང་དཀར་པོར་ཨ་ཡིག་བརྐོས་ཡོད།།
ང་ཤི་ཡང་རྣམ་ཤེས་འོད་ཡིན།།
འོད་ཀྱི་ལེར་འཇའ་རུ་བཞེངས་ཡོད།།
༢༠༢༣ ༠༥ ༢༤ ས་ཟླའི་ལྷག་དཀར་ལ།
