མཚན་ཙམ་ཐོས་པས་སྡུག་བསྔལ་ཞི་བྱེད་ཅིང་།།
དུག་གསུམ་ནད་སེལ་འགྲོ་བའི་སྨན་པ་ཆེ།།
ཐུགས་རྗེ་ཀུན་སྙོམས་དབང་སྔོན་འོད་ལྡན་པ།།
སངས་རྒྱས་སྨན་བླས་འགྲོ་ལ་ཤིས་པ་སྩོལ།།
འདི་ནས་རིང་དུ་གནས་པའི་ཡུལ་ཞིག་ན།།
བདག་ཚོས་ཨ་མཆོད་འབོད་པའི་སློབ་གྲོགས་ཏེ།།
དོན་ལ་མིང་དོན་མཚུངས་པའི་དགེ་རྒན་གང།།
མི་འདོད་ནད་ཀྱིས་བཟུང་བའི་གཏམ་ངན་ཐོས།།
སྐྱེས་བའི་མཐའ་མ་འཆི་བ་སྟེ།
ཟློག་མེད་ཆོས་ཉིད་ཡིན་ན་ཡང།།
མ་རྒས་ན་བས་འཇོམས་པ་འདིས།
ཡིད་ལ་ཕངས་པའི་སྡུག་སྣང་སྟེར།།
རྒྱང་རིང་གངས་ཅན་ཡུལ་ནས་རྒྱང་སྐྱོད་ཀྱིས།།
རྒྱང་རིང་རྒྱ་གར་ཡུལ་ནས་ལྷན་འཛོམས་ངང།།
རྒྱང་རིང་ཕུགས་བསམ་ཞིག་ལ་བརྩོན་པའི་གྲོགས།།
རྒྱང་རིང་ཕྱི་མར་ཆས་པ་ཉུང་ཉུང་མིན།།
ཡེ་ཤེས་རྒྱ་མཚོ་བློ་བཟང་བཟོད་པ་ལགས།།
འཇམ་དབྱངས་དང་ནི་ངག་དབང་མཁྱེན་བརྩེ་ལགས།།
བསོད་ནམས་ཚེ་རིང་དགེ་གྲོགས་དམ་པ་རྣམས།།
མ་རྒས་ནད་ཀྱིས་བཅོམ་པས་ཡིད་རེ་ཕངས།།
ད་ཡང་རྩོད་གྲོགས་འཇམ་དཔལ་ཚུལ་ཁྲིམས་ཞེས།།
གཟུར་གནས་སྨྲ་བའི་མགྲིན་པ་གཟེངས་མཐོ་ལ།།
རྣམ་དཔྱོད་རལ་གྲིའི་སོ་ཁ་རྣོ་བ་གང།།
འཆི་བདག་ཞགས་པས་མགུལ་བ་འཆིང་འདི་སྐྱོ།།
ཟློག་མེད་ནད་ཀྱིས་བཟུང་བ་ལ།།
ཕན་པའི་ཐབས་ནི་གཞན་མེད་དེ།།
རང་སེམས་ཆོས་ལ་ཕྱོགས་གྱུར་ན།།
འཆི་ཁའི་སེམས་ཉིད་མཐུ་བཙན་གསུངས།
དེ་བས་འདི་ལྟར་ཚིག་འགའ་ཞུ།།
སྐྱེ་རྒ་ན་འཆི་མི་ཡི་སྡུག་བསྔལ་བཞིས།།
ཐར་བར་བཏང་བ་སུ་ཞིག་མེད་པས་ན།།
སེམས་ཁྱོད་འཇིགས་པ་དོན་མེད་བླུན་པ་སྟེ།།
དད་པའི་རྟེན་དྲུང་ནོངས་པ་བཤགས་པ་དང།།
རང་གཞན་དགེ་བ་ཀུན་ལ་ཡིད་རངས་མཛོད།།
སྐྱེ་ས་མ་ནོར་ཁ་བ་ཅན་གྱི་ལྗོངས།།
འཕགས་པ་སྤྱན་རས་གཟིགས་ཀྱི་གདུལ་ཞིང་ཡིན།།
སྐྱེས་པ་དོན་ལྡན་དམ་པའི་ཆོས་ཀྱང་ཐོས།།
བསོད་ནམས་ཚོགས་གསོག་དགེ་བའི་ནོར་ཡང་ཡོད།
སེམས་ཁྱོད་འདི་ལྟར་བསམས་ནས་དགའ་བ་སྐྱེད།།
ས་མཐར་འགྲིམས་པ་དོན་མེད་སྤྲང་འཁྱམ་མིན།།
ཕྱག་ན་པད་མོའི་བྱིན་རླབས་ཞུས་ནས་ཡོད།།
བཀའ་དགོངས་བསྒྲུབས་པའི་ལག་རྗེས་མི་དམན་ཡོད།།
དད་པ་དམ་ཚིག་གཙང་མ་སེམས་ན་ཡོད།།
སེམས་ཁྱོད་འདི་ལྟར་བསམས་ནས་དགའ་བ་སྐྱེད།།
ལས་ལ་འབད་པ་བཟའ་བཏུང་ཙམ་ཞིག་མིན།།
རྙེད་བཀུར་སྙན་གྲགས་གཉེར་བའི་ལས་ཀྱང་མིན།།
མ་འོངས་སོན་རྩ་གང་མང་བསྐྱངས་ནས་ཡོད།།
དགེ་རྒན་ཞེས་པའི་མཚན་སྙན་བཏང་བ་མེད།།
སེམས་ཁྱོད་འདི་ལྟར་བསམས་ནས་དགའ་བ་སྐྱེད།།
བྱམས་བརྩེ་་ཕན་སེམས་ལ་སོགས་ཡིད་ཀྱི་དགེ།
འཆད་ཁྲིད་སློབ་སྟོན་ལ་སོགས་ངག་གི་དགེ།
རྩོམ་དང་བྲིས་རེག་ལ་སོགས་ལུས་ཀྱི་དགེ།
མདོར་ན་རང་རང་དོན་བཟང་ཆེ་ཆུང་ཀུན།།
བསམས་ནས་ཡི་རང་དགེ་བ་བསྔོ་བ་ལེགས།།
ཆོས་ལྡན་བོད་ཡུལ་ཆོས་མིན་ཀླ་ཀློས་བཟུང།།
ཆོས་དང་རིག་གཞུང་མི་རིགས་བཅས་པ་རྒུད།།
འདི་ཉིད་སྐྱོབ་ལ་སྲི་ཞུར་གང་བརྩོན་རྣམས།།
སྤྱན་རས་གཟིགས་དེས་རྗེས་སུ་འཛིན་ནོ་གསུངས།།
འདི་ལ་ཡིད་ཆེས་མཛོད་དང་བྱིན་རླབས་ཡོད།།
འདུས་བྱས་མི་རྟག་ཡིན་པས་ཆགས་ཞེན་ཅི།།
བདག་འཛིན་འཆིང་བ་ཡིན་པས་བདག་མེད་སྒོམས།།
རང་བཞིན་སྟོང་ཡང་རྟེན་འབྱུང་མི་བསླུ་བས།།
འདའ་ཀ་ཡེ་ཤེས་ལས་ལྷག་སྐྱབས་གཞན་མེད།།
འདི་ལ་ཡིད་ཆེས་སེམས་ཁྱོད་འཇིགས་པ་ཅི།།
བདག་ནི་ཤ་ཆང་འདོད་པའི་ལོངས་སྤྱོད་ལ།།
ཅི་དགར་རོལ་བའི་མདོ་མེད་འཁྱམ་པོ་ཞིག།
འོན་ཀྱང་རྒྱལ་བའི་གསུང་རབ་བདུད་རྩའི་གཟེགས།།
ཞར་དང་ཞོར་ལ་འཐུང་བའི་སྐལ་བ་ཅན།།
དེ་ཡིས་ཚིག་གི་རམ་འདེགས་འདི་ཙམ་སྦྲོན།།
འུ་ཅག་ལས་སྐལ་གཅིག་གི་ལམ་གྲོགས་ཡིན།།
དགེ་རྒན་འོས་སྦྱོང་གཅིག་གི་སློབ་གྲོགས་ཡིན།།
སྐད་དང་ཡི་གེ་གཅིག་གི་ལས་གྲོགས་ཡིན།།
རྩ་བའི་བླ་མ་གཅིག་གི་ཆོས་གྲོགས་ཡིན།།
སྐྱེ་ཀུན་དགེ་བའི་གྲོགས་སུ་འགྱུར་བར་སྨོན།།
སྐུའི་བླ་གཟའ་ལྷག་པ་དཀར་པོའི་ཉིན། ལྷ་མིང་འཛིན་པ་ཆབ་བྲག་ཕོ་ཉས་ཕུལ་བ་དགེ་ལེགས་འཕེལ།། །།༢༠༢༤ ༠༦ ༡༢
གང་ཁྱོད་གསོན་དཀའི་གནས་སྟངས་ཧ་གོ་ནས།།
སེམས་གསོའི་དགེ་སྐུལ་དེ་ཙམ་ཞུས་པ་ཡིས།།
ཕན་ཐོགས་ཅི་ཙམ་ཡོད་མེད་མི་ཤེས་ཀྱང།།
བོད་པ་ཞིག་གི་སྐྱེ་འཆིའི་རམ་འདེགས་ལ།།
བདག་གིས་དེ་ལས་ཅི་ཡང་བཤད་མ་ཤེས།།
ཉིན་འགའི་སྔོན་ལ་ཕྱི་མར་ཆས་པའི་གཏམ།།
གོ་ནས་མ་ཎི་ཚར་འགའ་བགྲངས་པ་དང།།
“བསྟན་དང་དེ་འཛིན་ཆབ་སྲིད་རང་རིགས་སླད།།
གཅེས་པའི་ལུས་སྲོག་ལོངས་སྤྱོད་ཡངས་བཏང་ནས།།
དཀའ་བ་བརྒྱ་ཕྲག་བསྒྲུབས་པའི་སྐྱེ་བོ་རྣམས།།
གྲི་འཛིན་མགོན་དེས་ཐུགས་རྗེས་སྐྱོང་བར་མཛོད།།”
ཅེས་པའི་སྨོན་ཚིག་དེ་ཡིས་སྐྱེལ་མ་བྱས།།
༢༠༢༤་༠༧་༣༡ ལྷག་དཀར་ཉིན་མོར་སླར་ཡང་རྗེས་དྲན་ཞིག་གི་ཚུལ་དུ་སྤེལ་བ་འདིས་འུ་ཅག་གསོན་གནས་རྣམས་ལ་ཡང་གཞེན་སྐུལ་ཙམ་ཞིག་ཐུབ་ན་སྙམ་པ་བཅས་སོ།།
