མི་ཡུལ་རང་དབང་ལུང་པར།
རང་དབང་བསམས་ཏེ་ཡོང་ཡང་།
འཚོ་བའི་གཞན་དབང་འོག་ནས།
རང་སྡུག་མྱོང་བ་ལས་རེད།།
མི་ཡུལ་དམངས་གཙོའི་ལུང་པར།
སྐྱབས་བཅོལ་ཞུ་རུ་ཡོང་ཡང་།
རྒྱ་ནག་ཐབ་ཚང་ནང་ནས།
ཐར་བར་དཀའ་བ་ལས་རེད།།
སང་ཉིན་འཕྲད་ཡོང་ཟེར་བས།
དགའ་བའི་རེ་བས་བསྒུགས་ཀྱང་།
སང་ཉིན་ཚར་བ་མེད་པས།
འཕྲད་རེ་མེད་པ་ལས་རེད།།
ལས་འདི་སྔོན་བསགས་ཡིན་ནམ།
ཡང་ན་ཚེ་འདིའི་ལས་སྐལ།
རང་མགོན་རང་ཉིད་ཡིན་ན།
ལས་ལམ་གསར་བརྗེ་བྱེད་ཆོག།
རང་བདེ་ཁོ་ནའི་ཆེད་དུ།
ཚེ་འདིའི་ཁེ་ཕན་གཉེར་ཡང་།
རང་དབང་འདྲ་མཉམ་ཐོབ་ཐང་།
ནམ་ཡང་བློས་གཏོང་མ་བྱེད།།
