སྤྲིན་དཀར་སྟེང་ནས་བླངས་པའི་གླུ
བཀླགས་གྲངས། 998
བཀླགས་གྲངས། 998
སྤྲིན་ལམ་ནས་ཕུལ་བའི་གཞས་ཚིག་ཁག་གཉིས།
མཆོག་གསུམ།
བོད་མཁས་པའི་ཐོག་མ་ཐོན་མི་གཅིག
འཕྲུལ་ཡི་གེ་མཚར་པོ་དབྱངས་གསལ་གཉིས།
སྐྱབས་བསླུ་བ་མེད་པ་དཀོན་མཆོག་གསུམ།
འདི་གངས་ཅན་བོད་ཀྱི་གཅེས་ནོར་ཡིན།
ཚེ་འདི་ཕྱིའི་མགོན་སྐྱབས་བླ་མ་གཅིག
གྲོགས་གཞུང་བསྟེན་སྲུང་མ་དམར་ནག་གཉིས།
སྟོབས་ཆིག་སྒྲིལ་གཞི་མ་ཆོལ་ཁ་གསུམ།
འདི་བསྟན་སྲིད་འཛིན་སྐྱོང་རྒྱས་བྱེད་ཡིན།།
བོད་རིགས་ཞེན་དཀར་པོའི་འདུ་ཤེས་གཅིག
བློ་ཕྱི་ནང་ཤེས་ཡོན་འདབ་གཤོག་གཉིས།
དུས་འདས་མ་ད་གསུམ་མཐོང་བ་གསུམ།
འདི་མི་རབས་གསར་བའི་རེ་བ་ཡིན།།
གནམ་སྤྲིན་མཚོ་གསུམ།
གནམ་སྔོན་པོ་འདི་ལ་ཆགས་རེ་འཇོག
འདི་མཐའ་དབུས་མེད་པ་སྟོང་བའི་ཁམས།
རྗེ་བླ་མའི་ཐུགས་ཀློང་འདི་འདྲ་ཡིན།
འདིས་མི་ཚད་ཐུགས་རྗེ་དེ་ལས་ལྷག
སྤྲིན་དཀར་པོ་འདི་ལ་ཆགས་རེ་འཇོག
འདི་དཀར་འཇམ་བར་སྣང་མེ་ཏོག་ཐང།
དྲིན་ཕ་མའི་བྱམས་བརྩེ་འདི་འདྲ་ཡིན།
འདིས་མི་ཚད་བཀའ་དྲིན་དེ་ལས་ལྷག
མཚོ་སྔོན་པོ་འདི་ལ་ཆགས་རེ་འཇོག
འདི་སྔོ་ཞིང་དྭངས་པ་ས་ཡི་གདན།
མི་བཟང་པོའི་ཐུགས་བསྐྱེད་འདི་འདྲ་ཡིན།
དེས་མི་ཚད་སྲི་ཞུ་དེ་ལས་ལྷག།
༢༠༢༣/༠༣/༡༠ ལྕགས་བྱའི་ནང་ནས།
