གཅིག སྔོན་དུ་མངགས་པ།

  རྒྱ་ནག་ཐད་གཏོང་གི་དབང་བསྒྱུར་འོག་ཤོར་ནས་ལོ་བཅུ་ལྷག་འགོར་ཡོད་ལ་བོད་པའང་ཐད་གཏོང་གི་དབང་བསྒྱུར་འོག་གནས་ཡོད། འདི་ནི་བོད་ལ་མཚོན་ན། མིག་སྐྲང་སྟེང་ལ་ཁུ་ཚིར་གྱིས་གཞུས་པ་ཞིག་རེད། རྒྱ་ནག་ལ་མཚོན་ནའང་ལོ་རེ་བཞིན་ཉམས་རྒུད་ཀྱི་གཡང་སར་བཏུད་ཀྱིན་པ་དེ་རེད། སྤྱང་ཀི་ཅི་ལྟར་ཤི་ནའང་འགྲིག་མོད། ཤུགས་རྐྱེན་འདིས་ངེད་གངས་ཅན་པ་ཚོའང་ཐལ་བའི་རྡུལ་དུ་བརླགས་ནས་བཞུད་སྟངས་དེ་མིག་གིས་མི་བཟོད་པ་ཞིག་རེད། ཐད་གཏོང་ཡང་རྒྱ་ནད་ལྟར་འཛམ་གླིང་རང་བཞིན་ཅན་གྱི་དཀའ་ངལ་ཞིག་ལ་འགྱུར་སྲིད་པས།  ངེས་བར་དུ་ངོས་འཛིན་གསལ་བོ་ཞིག་བྱེད་དགོས་པ་ཡིན།
དཔེར་ན། རྒྱ་ནག་གི་དཔལ་འབྱོར་ཉམས་རྒུད་གླེང་ན། ཨ་རིས་ཚོང་ཟོག་གི་སྒོ་ཁྲལ་སྤར་བ་དང་ནུབ་ཕྱོགས་ཀྱི་བཟོ་ཚོང་ཁང་འགའ་རེ་རྒྱ་ནག་ནས་གནས་སྤར་བ། ཆབ་སྲིད་ཀྱི་གནས་སྟངས་བཅས་གླེང་མོད། གནད་དོན་ངོ་མ་ནི་དེ་དག་མིན་པར་ཐད་གཏོང་ཡིན། ཐད་གཏོང་དར་བ་ནས་རྒྱ་ནག་གི་ཤེས་ཡོན་མཚམས་ཆད་ཡོད། ཐད་གཏོང་དར་བ་ནས་རྒྱ་ནག་གི་དཔལ་འབྱོར་མཚམས་བཞག་ཡོད། ཐད་གཏོང་དར་བ་ནས་རྒྱ་ནག་གིས་ལས་མཚམས་བཞག་ཡོད། གནད་དོན་འདི་གསུམ་བོད་དུའང་མགོ་ཚུགས་ཡོད་པ་མ་ཟད། བོད་ཀྱི་ཀུན་སྤྱོད་ཀྱི་ཁུག་མའང་རལ་ཡོད། 

གཉིས་པ། ཐད་གཏོང་དར་བ་ནས་རྒྱ་ནག་གི་ཤེས་ཡོན་མཚམས་ཆད་པ།

    སྤྱིར་རྒྱ་ནག་པ་ཚོས་ལོ་ལྔ་སྟོང་གི་རིག་གནས་ཞེས་ལབ་རྒྱག་སྲོལ་ཡོད་མོད། གུང་ཏང་ལོ་བདུན་ཅུ་ཡིན་ལ། གུང་ཏང་གསར་བུ་ཡིན་དུས་ཡོད་ཚད་ཐལ་བའི་རྡུལ་དུ་བརླག་ཚར་བས་ཤེས་ཡོན་ཟབ་མོ་ཅི་ཡང་མེད། ཡིན་ནའང་། བརྐུས་བྱས་ན་རིག་མྱུར་དང་ལག་མྱུར་ཡོད་པས་འཛམ་གླིང་གི་ཤེས་བྱ་མང་པོ་ཞིག་བརྐུས་ཚར་ཡོད། ཡིད་སྐྱོ་བ་ཞིག་ལ། བརྐུས་རྫས་ཀྱི་རིག་གནས་ལས་ལག་ཆ་བླངས་ཏེ་རྣམ་པ་དང་ངོ་བོ་མི་འདྲ་བའི་ཤེས་བྱ་གསར་གཏོད་ཀྱི་ཕྱོགས་སུ་བསམ་བློ་མི་གཏོང་བར། རྣམ་པ་དང་བཟོ་དབྱིབས་འདྲ་བོ་འདྲ་རྐྱང་གི་རྫུན་མ་ཞིག་དཔར་བར་འབད་བརྩོན་བྱེད་པ་ཡིན། དེར་བརྟེན། མི་གྲངས་དུང་ཕྱུར་བཅུ་བཞི་ཅན་གྱི་གྲོག་མ་སྔོན་པོ་ཚོས་འཛམ་གླིང་ལ་ཤེས་བྱ་གསར་བ་སྣ་གཅིག་བསུས་མྱོང་མེད། 
དེ་ནི་ཁོ་ཚོའི་རིགས་རྫས་ནང་དུ་རྒྱུ་རྔམ་གྱི་སྤྲི་དཀར་ལྷན་སྐྱེས་སུ་རྒྱུ་བའི་རྟགས་མཚན་ཞིག་ཡིན། དེའི་དབང་གིས། ཕུགས་རིང་གི་འབྱོར་ཕྱུག་ལས་འཕྲལ་གྱི་ཕྱུག་བདག་འདོད་པ་དང་། དེའང་གནང་ཉིན་ལས་སང་ཉིན། སང་ཉིན་ལས་དེ་རིང་ང་ཕྱུག་བདག་དུ་གྱུར་ན་ཅི་མ་རུང་། སྐར་ཆེན་དུ་གྱུར་ན་ཅི་མ་རུང་སྙམ་པའི་ཧམ་སེམས་ཤིག་རྒྱ་ནག་པའི་རྒྱུད་དུ་གཏོགས་པའི་བྱ་བྱེའུ་འབའ་འབུ་ཡིན་རུང་ལྷན་སྐྱེས་སུ་ཡོད་པ་ཡིན། འཛམ་གླིང་གི་སྣ་མང་རང་བཞིན་གྱི་ཤེས་བྱའི་ཁྲོད་དུ་རྒྱ་ནག་པར་ཆེས་འཚམས་པའི་རིག་གནས་ཤིག་དར་བ་ནི་ཐད་གཏོང་ཡིན། 
ཐད་གཏོང་ནི། རླུང་རྟ་འཕུར་ན་དེ་མ་ཉིད་དུ་ཕྱུག་བདག་ཏུ་འགྱུར་བ་དང་སྐར་ཆེན་དུ་འགྱུར་བའི་ལམ་ཞིག་ཡིན། ཐད་གཏོང་ལ་ཤེས་ཡོན་མེད་པར་གློའུ་རྟགས་ཆེ་བ་དང་། སྐད་ངག་སྙན་པ། ལབ་རྒྱག་པ། གཟུགས་རྒྱུ་མཛེས་པ་སོགས་ཀྱི་ཁྱད་ཆོས་སྣ་གཅིག་འཛོམས་ན་སྐར་ཆེན་དུ་འགྱུར་བའི་ལམ་ཁ་ཡོད་པས། རྒྱ་ནག་པས་ཐད་གཏོང་གི་དགོས་འདུན་སླ་མོ་དག་ལ་འབད་ནས། ཤེས་ཡོན་གཡུག་ཚར་བ་རེད། ཤེས་ཡོན་ཞེས་པ་ནི། དཀའ་ངལ་ལ་གདོང་གཏད་དེ་བརྩོན་པ་ཆུ་བོའི་རྒྱུན་དུ་བསྡོངས་པའི་འབྲས་བུ་ཞིག་ལས། ཁ་པར་ལ་སྙིང་གྲོགས་བསྒྲིགས་ཞོར་སྦྱོང་ནུས་པའི་རིག་གནས་ཤིག་མིན། ཐད་གཏོང་གི་དབང་བསྒྱུར་འོག་གི་ཤེས་ཡོན་པ་ཞིག་ཡོད་ན་རི་བོང་གི་མགོར་ར་འདོམ་པ་གང་སྐྱེས་པ་ཡིན་ལ། ཚན་རིག་དང་རྒྱུ་འབྲས་གང་ལའང་ངོ་ལོག་པ་ཡིན། ཉམ་ཆུང་བའི་བོད་པའི་མགོ་ལའང་སྤྲིན་ནག་འདི་འཁོར་ཡོད།

གསུམ་པ། ཐད་གཏོང་དར་བ་ནས་རྒྱ་ནག་གི་དཔལ་འབྱོར་མཚམས་བཞག་པ།

  རྒྱ་ནག་ལ་ཐད་གཏོང་དར་བ་ནས་བཟུང་། དྲ་ཚོང་དར་བ་རེད། དྲ་ཚོང་གི་ཁེ་བཟང་ཡག་ཤོས་ནི་འབོར་ཆེན་བཙོང་བ་དེ་ཡིན། འབོར་ཆེན་བཙོང་བ་ལ་གོང་སླ་དགོས་པ་ཡིན། ཚོང་རྫས་ཤིག་གི་ཆེས་གོང་ཚད་སླ་ཤོས་ནི་བཟོ་གྲྭ་ནས་ཐད་ཀར་ཉོ་བ་དེ་ཡིན། དྲ་ཚོང་བ་སྟོབས་ཆེན་ཚོས་བཟོ་གྲྭ་ནས་ཐད་ཀར་ཚོང་འབོར་ཆེན་བླངས་ཏེ་བཙོང་གི་ཡོད་ལ། བཟོ་གྲྭ་སྟོབས་ཆེན་ཚོས་ཀྱང་དྲ་དཔོན་བརྒྱ་ཕྲག་སྟོང་ཕྲག་རང་གི་ཚོང་ཟོག་བཙོང་མཁན་ལ་ཉར་ཡོད།  རྒྱུ་རྐྱེན་དེའི་དབང་གིས་རྒྱ་ནག་ན་བཟོ་གྲྭ་རེ་ཟུང་ལས་ཚོང་ཁང་ཚང་མ་གཅིག་འཕྲོར་གཉིས་མཐུད་ཀྱིས་སྒོ་བརྒྱབ་ནས་ཡོང་གི་ཡོད། ཁུལ་དང་རྫོང་། གྲོང་ཁྱེར་དང་རྒྱལ་སའི་ཉོ་སྒྲུབ་ལྟེ་གནས་( shopping centers ) ཚང་མ་རིམ་པར་རྐུབ་བརྡིབས་ནས་ཡོང་གིན་ཡོད། སྤྱིར་ན་ཚོང་གི་འཁོར་རྒྱུག་རྒྱུན་ལྡན་ཅན་ཞིག་ཡིན་ན། བཟོ་གྲྭ་ནས་སྡེབ་ཚོང་། སྡེབ་ཚོང་ནས་སིལ་ཚོང་གི་རིམ་པ་བརྒྱུད་དེ་མཛད་སྤྱོད་པའི་ལག་ཏུ་འབྱོར་དགོས་པ་ཡིན།  མཛད་སྤྱོད་པའི་ལག་པ་དང་བཟོ་གྲྭ་ཐད་ཀར་སྦྲེལ་བ་ནི་ཚོང་གི་འཁོར་རྒྱུག་འགག་སྟངས་ཤིག་ཡིན། ཚོང་གི་འཁོར་རྒྱུག་འགགས་ན་དཔལ་འབྱོར་མཚམས་བཞག་པ་རེད། དེར་བརྟེན། རྒྱ་ནག་ཐད་གཏོང་གིས་དབང་བསྒྱུར་བྱས་པ་ནས་བཟུང་རྒྱ་ནག་གི་དཔལ་འབྱོར་མཚམས་བཞག་པ་རེད། སྣང་ཚུལ་འདི་བོད་དུའང་ཉིན་རེ་བཞིན་ཇེ་གསལ་ནས་ཇེ་གསལ་ཡིན།

བཞི་པ། ཐད་གཏོང་དར་བ་ནས་རྒྱ་ནག་གིས་ལས་མཚམས་བཞག་པ།

   རྒྱལ་ཁབ་ཞིག་ལ་མཚོན་ན། ལས་མེད་འཕེལ་བ་ནི་ལས་མཚམས་བཞག་པ་རེད། ཐད་གཏོང་ནི་མ་གཞི་ནས་ལས་མེད་ལ་ཁ་གཏད་པའི་རིག་ཚན་ཞིག་རེད། དེའང་དབང་བོ་སྐྱོན་ཅན་དང་སྨད་བཙོང་མ་སོགས་སྤྱི་ཚོགས་ཀྱི་སྦས་ཡུལ་དུ་གནས་པའི་མི་སྣ་ལ་ཆེད་དུ་གཟས་པའི་མཉེན་ཆས་ཤིག་ཡིན་ནའང་། རིམ་གྱིས་མཉེན་ཆས་ཀྱིས་ཏང་ལ་ཞབས་ཞུ་རྩལ་སྤྲུགས་དང་ཚོང་བར་ལག་སྦྲེལ་བྱེད་མགོ་བཙུགས་ཏེ། རྒྱ་ནག་གི་རྒན་གཞོན་བར་གསུམ། མིག་གཡོན་ཡོད་པ། ཁ་དཀྱུས་ཡོད་པ་ཚུན་ཆད་ཐད་གཏོང་ནང་བསུས་པ་རེད། དེར་བརྟེན། རྒྱ་ནག་པ་ཚོས་བཟོ་གྲྭ་སོགས་ལས་སྒོ་མཐའ་དག་དང་ཁ་བྲལ་ནས་མི་ཚེ་ཐད་གཏོང་བའི་ལས་རིགས་འདེམས་ཀྱིན་ཡོད། དེ་ནི་དོན་གྱིས་ལས་མཚམས་བཞག་པ་རེད། ཞིང་བ་ཚོས་ལྕགས་ཁེམ་གཡུག་ཚར་ཡོད། ཚོང་བ་ཚོས་ཚོང་ཁང་གཡུག་ཚར་ཡོད། རི་མོ་བ་ཚོས་རི་མོ་མཚམས་བཞག་ཡོད། རྩོམ་པ་པོ་ཚོས་སྨྱུ་གུ་གཡུག་ཚར་ཡོད། གཞུང་ཞབས་པ་དང་ཁྲིམས་རྩོད་པའི་ནང་དུའང་ལས་ཀ་གཡུགས་ནས་ཐད་གཏོང་བྱེད་མཁན་ཡོད། འདི་ལས་གཞན་གྱི་ལས་མཚམས་འཇོག་སྟངས་ཤིག་མེད།  རྒྱ་ནག་པས་ལས་མཚམས་བཞག་ཚར་རྗེས་ནུབ་ཕྱོགས་ཀྱི་བཟོ་གྲྭ་ཞིག་རྒྱ་ནག་ལ་འཛུགས་སྲིད་དམ། གུང་ཏང་གིས་ཁྲལ་ལྡན་བུ་སྐྱེས་ཀྱི་སྲིད་བྱུས་ཕྱིར་བསྡུ་བྱས་ཡོད་མོད། གནད་དོན་ངོ་མ་ཐད་གཏོང་དང་རྒྱ་ནག་པའི་ཧམ་པའི་ངོས་སུ་ཡོད་པ་ལས་མི་གྲངས་ལྷུང་བ་སོགས་དང་འབྲེལ་བ་ཡེ་ནས་མེད། ཡིན་ནའང་། ཆབ་སྲིད་པས་གནད་དོན་དངོས་ལ་གཡོལ་བ་ལས་གདོང་གཏད་མི་སྲིད། ལྷག་པར་ཏང་དང་ཐད་ཀར་འབྲེལ་བའི་ཐད་གཏོང་གི་ལས་དབང་ལ་ཏང་གིས་ཀྱང་འགོག་རྐྱེན་བཟོ་མི་སྲིད།

ལྔ་པ། མཇུག་ལ་བརྫངས་པ།

   བོད་ཆོས་ལྡན་གྱི་ཞིང་ཁམས་འདི་ད་ལྟའི་བར་དུ་བླ་དཔོན་གྱིས་དབང་བསྒྱུར་ནས་ཡོང་མོད། དེང་སྐབས་དྲ་དཔོན་གྱིས་དབང་བསྒྱུར་བྱས་ཡོད། དྲ་དཔོན་ཚོ་གང་དུ་ཕེབས་ན་ཁ་བཏགས་བཟུང་ནས་པང་བསྒྲིགས་ཏེ་བསུ་མ་བྱེད་ཀྱིན་ཡོད། ནད་པ་ཉམ་ཐག་ཅིག  དབང་བོ་སྐྱོན་ཅན་ཞིག ཚོང་ཁང་གསར་བ་ཞིག གཉེན་སྟོན་མཛད་སྒོ་སོགས་བཟང་ངན་ཡོད་ཚད་ལ་དྲ་དཔོན་རེ་བསུ་བར་འབད་པ་བྱེད་ཀྱིན་ཡོད། འདི་ནི་རྒྱ་ནག་གི་གནམ་འོག་དེ་ཏང་དང་དྲ་དཔོན་གྱི་གནམ་འོག་ཡིན་པའི་དཔང་རྟགས་ཤིག་རེད།  མི་འདྲ ས་ཞིག་ཡོད་པ་ནི། ཏང་གི་དབང་བསྒྱུར་ལ་བོད་མི་རིགས་ཀྱི་མངོན་འདོད་མེད་པ་མ་ཟད། ཤ་འཁོན་དང་ཞེ་སྡང་ཡོད་མོད། དྲ་དཔོན་གྱི་དབང་བསྒྱུར་ལ་བོད་མི་རིགས་ཀྱི་དགའ་བསུ་དང་མངོན་འདོད་ཀྱིས་ཁེངས་ཡོད། ད་ནི་ཅི་ཞིག་བྱ་ཨང་། ཅི་ཞིག་བྱ་ཨང་།

བྱ་རྒྱུ་ཅི་ཡང་མེད། རྒྱ་ནད་དང་པོར་ཡོང་དུས་འུ་ཚོས་ལས་མཚམས་བཞག ཁ་ཐུམ་བརྒྱབ་ནས་བཀག་པ་རེད། ཐ་མར་འགོག་མ་ཐུབ་པར་ནད་དུག་དང་མཉམ་དུ་འཚོ་བ་རོལ་བའི་སྲིད་བྱུས་བཟུང་བ་རེད། དེ་བཞིན་ཐད་གཏོང་དང་མཉམ་དུ། ཡང་ན་དྲ་དཔོན་དང་མཉམ་དུ་འཚོ་བ་རོལ་བའི་ཕྱོགས་ལ་བསམ་བློ་གཏོང་དགོས་ཀྱི་འདུག
    དྲ་དཔོན་ཞེས་པ་ནི། ཐད་གཏོང་བདག་པོ་ཡིན། ཁོའི་འགན་འཁྲི་ལྡོག་ཏུ་མེད་པ་ནི། རང་ཉིད་ཀྱི་ཐད་གཏོང་ནང་དུ་མྱི་ཚོགས་བསྡུ་བ་དེ་རེད། དེང་སྐབས་བོད་ནང་དུ། མྱི་ཚོགས་བསྡུ་བའི་ཐབས་ལམ་ཆེ་བ་གསུམ་འདུག གཅིག  རྒྱུ་ཅན་ཚོས་འགྲན་བསྡུར་སྤེལ་ཏེ། ལུག་འགྲན། གཡག་འགྲན། ཡག་འགྲན། གཏམ་འགྲན། གླུ་འགྲན་སོགས་འགྲན་བསྡུར་བསྡུས་མཉམ་དུ་ཚོང་རྒྱག་པ་དེ་རེད།
གཉིས་པ་ནི། སྙིང་རྗེ་བཙོང་བ་དེ་རེད། རླབས་ཆེ་བའི་རོགས་སྐྱོར་བྱེད་པ། བརྩེ་དུང་གི་ཕམ་ཁ་བྱུང་བ། བཙན་གཉོམ་གྱི་ཕམ་ཁ་བྱུང་བ། ལས་དབང་གི་ཕམ་ཁ་བྱུང་བ་ལྟ་བུ་འཁྲབ་བཤད་ངུ་གསུམ་གྱིས་མི་ཚོགས་བསྡུ་གིན་ཡོད། 
གསུམ་པ་ནི། རང་ལུས་ལ་མནར་གཅོད་གཏོང་བ་དེ་རེད། ཁ་དང་རྐུབ་ལ་ཚ་སྒོག་ཡེར་གསུམ་དང་ཁ་ཚ་སོགས་བྱུགས་པ། ཟ་བ།  ཆུ་ལ་སྦང་བ། ཙག་ལ་གཞུས་པ། འདོམ་གྱི་སྤུ་བཏོག་པ་སོགས་རང་ཉིད་ལ་མནར་གཅོད་བཏང་ནས་མི་ཚོགས་བསྡུ་གིན་ཡོད། 
ཕྱི་མ་འདི་དག་ནི་དྲ་དཔོན་ཁ་ལས་མི་དགེ་མཁན་དག་ཡིན། འདི་ཚོ་ལ་ངོ་ཚ་མེད་པ། མི་རིགས་ལ་ཞབས་འདྲེན་བྱེད་པ། བཟང་སྤྱོད་དོར་བ་སོགས་ཀྱི་སྐྱོན་འདོགས་སྣ་ཚོགས་ཀྱིས་། དེ་དག་ལ་ཕ་མ་སྤུན་མཆེད་ཅིག་མེད་དམ་ཞེས་ཧ་ལས་མདོག་བྱེད་ཀྱིན་ཡོད། ཡིན་ནའང་། དེའི་རིགས་མང་ཆེ་བ། བཟའ་འཐོར་བྱས་པ། རྗེས་ན་བུ་ཕྲུག་དང་ཕ་མ་རྒས་ཀོག་ཅན། གཞན་དང་རེ་ས་བསྟེན་ས་མེད་པར་ཐབས་ཟད་དེ། དྲ་ལམ་ལ་བུད་མཁན་ཞེ་གཅིག་ཡིན་པས། ངེད་ཚོས་དཀའ་དུས་ཁེགས་དུས། ལུས་ལ་ལྭ་བ་མ་རག། ཁ་ལ་ཟས་མ་རག་པར་རྒྱུ་མ་བྲང་ལ་འབྱར་དུས། ཕ་མ་སྤུན་མཆེད་མེད། མི་རིགས་མེད། ངེད་ཚོས་ཁ་སོས་ནམ་ལངས་དུས་ཕ་མ་སྤུན་མཆེད་ཅིག་དགོས་དོན་མེད་ཅེས་བཤད་ཀྱིན་ཡོད།

ངོས་གང་ནས་བལྟས་ནའང་། བོད་ཀྱི་གནམ་གཤིས་ཧ་ཅང་གནག་པས་ཆར་འབབ་དཀའ་རྒྱུ་རེད། 

སྤྱི་ལོ་ ༢༠༢༤ ། ༡༠ ། ༡༥ ཉིན། 

2024-10-16 快手官方

ཤགས་འགྱེད།