སུ་ཡི་རྨི་ལམ་ཙམ་ལའང་མི་འཁོར་བ།།
ཁྱོད་ཀྱིས་ཧ་ཅང་རྒྱུན་ལྡན་ལྟ་བུར་སྣང་།།
དུ་བ་རྐང་གཅིག་མེ་ལ་སྒྲོན་པ་བཞིན།།
གཅེས་པའི་སྲོག་འདི་སུ་ཡི་ཆེད་དུ་དོར།།

ང་ཚོ་ཧ་ཅང་མུན་པས་བསྒྲིབས་པ་སྟེ།།
ཡུན་རིང་རྙིད་པའི་མེ་ཏོག་ཞིག་དང་འདྲ།།
གློ་བུར་དྲོ་སྐྱིད་ཉི་ཟེར་འཕྲོས་ན་ཡང་།།
ད་དུང་མགོ་བོ་དུད་ནས་གང་དུ་ཆས།།

ས་མཐའ་ཞིག་ནས་ས་མཐའ་ཞིག་ལ་བསྐྱོད།།
འདི་ཡིན་ཞེས་པའི་རང་མལ་བསྟན་རྒྱུ་མེད།།
ད་དུང་སྲང་ལམ་གསེང་གི་སྤྲང་པོ་བཞིན།།
སྐྱིད་སྡུག་མེད་པ་ག་རེའི་ལན་ཆགས་རེད།།

ད་ནི་སུ་ཞིག་འདྲ་ཆགས་ཚུགས་བསྟན་ནས།།
སྐད་ཆ་ཡིན་ལ་མིན་ལ་བཤད་ཚོད་གྱིས།།
སྟོང་གི་ཁྲོད་ནས་མི་གཅིག་ཁེ་རུ་ཡིས།།
གཡོ་འགུལ་ཐེབས་པའི་བརྡ་ཞིག་བཏང་བ་དྲོན།།

གང་གི་ཆེད་དང་ཅི་ཡི་དོན་ཡིན་པ།།
བོད་སྐད་གཙང་མས་གསལ་པོར་བཤད་ན་ཡང་།།
ད་དུང་གཡས་གཡོན་འཁྱོག་པའི་ཟོག་རྒན་འགའ།།
སྔར་བཞིན་དུག་གིས་མྱོས་གཏམ་བཤད་ཚོད་གྱིས།།

རིགས་ཀྱི་ལ་རྒྱ་དབུ་འཕང་མཐོ་བའི་ཆེད།།
གཅེས་པའི་ལུས་ཀྱང་མེ་ལ་སྒྲོན་ཕོད་ན།།
ཁྱོད་དང་ང་ཞེས་རྩོད་གཞི་ར་རིལ་ཙམ།།
དོར་བར་མི་ཕོད་ད་དུང་སུ་ལྷག་སྲིད།།

རང་གི་ལག་པ་རང་གི་བྲང་ལ་སྦྱར།།
སྙིང་གི་འཕར་སྡིང་རང་གིས་ཚོར་བ་གྱིས།།
ཁ་རོག་ཁ་སྟོང་ནང་གི་ཚིག་སྟོང་དག །
བཤད་ན་སྙིང་པོ་ཅི་ཡོད་ཤེས་ཚོད་ཡིན།།

ཉི་མ་སེར་པོ་གནམ་གྱི་རྒྱན་ཆ་རེད།།
སྤྲིན་པ་ནག་པོ་བར་སྣང་ཀ་བ་མིན།།
རླུང་ཁ་འཆུབ་ཏེ་ནམ་མཁའ་གཡོ་ཙམ་གྱིས།།
མུན་པའི་ཕག་གྱི་ཉི་མ་ང་ཚོར་དབང་།།

ད་ནི་ཁ་རོག་སྣང་བ་འཕྲུལ་ཞིང་དུ།།
སྲང་ལམ་ཁྱི་ལྡོམ་དཔོན་གྱི་གོ་ས་ཙམ།།
རྩོད་རེས་དོན་གྱི་སྙིང་པོ་ཨེ་ཡོད་ལ།།
འདང་ཆེན་ཐེངས་གཅིག་རྒྱག་པའི་དུས་ལ་བབས།།

རི་ཡི་རྒྱབ་ལ་རི་བོ་སྟོང་ཞིག་ཡོད།།
རི་གཅིག་མགོ་ལ་ཐེངས་ཤིག་མ་རྩེབས་ན།།
རི་བོ་མང་པོའི་གཟི་བརྗིད་མི་མཐོང་བས།།
ཁུག་ཀྱོག་ཝ་མོ་གཞའ་གཞའ་བྱེད་ཚོད་ཅི།།

ལག་པ་དྲོན་མོ་སྙིང་ཁའི་དཀྱིལ་ལ་བཞག །
མེ་ལོང་ནང་ལ་རང་གི་ངོ་ལ་ཅེར།།
ཧ་ཅང་ཐལ་ཆ་ཆེ་བའི་སྤྱོད་པ་ལ།།
རང་གིས་རང་ལའང་སྙིང་རྗེ་སྐྱེ་ཚོད་ཡིན།།

སྔོན་ཆད་ལས་ཀྱི་སྒྲིབ་པ་དག་པའི་ཆེད།།
ལུས་རྙིང་སེམས་གསར་ཆོད་སེམས་བརྟན་པོ་ཡིས།།
ཆེན་པོ་ལུས་སྲོག་ཕུལ་བ་མ་ཕུད་ཀྱང་།།
ཆུང་ས་ནང་དམེ་མི་སྒོའི་དམ་བཅའ་དགོས།།

དགུན་གྱི་མེ་སྤུང་ཀུན་གྱི་དྲོ་སྐྱིད་རེད།།
ཐམས་ཅད་མེ་ལ་བརྟེན་ནས་ཉེ་བར་འཁོར།།
ཁྱོད་ཀྱི་ལུས་པོ་མེ་ལ་སྒྲོན་པ་ཡིས།།
དབྱར་གཞུང་འདི་ལའང་ང་ཚོ་རུག་རུག་བྱས།།

ང་ཚོ་ཐེངས་གཅིག་ཐབ་ཁ་གཅིག་ལ་འདུས།།
ཕོར་བ་གཅིག་ལ་ཇ་ཡང་མཉམ་དུ་འཐུང་།།
སང་ནང་སྟོན་གྱི་ལྷག་རླུང་གྲང་མོའི་ཁྲོད།།
ཐབ་ཁ་གཅིན་སྐྱག་གཏང་ས་བྱེད་མི་ཉན།།

སྐབས་རེ་དགའ་ལ་སྐབས་རེ་སྡུག་དུས་ཡོད།།
སྐབས་རེ་མཐོ་ལ་སྐབས་རེ་དམའ་དུས་ཡོད།།
ཇི་ཙམ་ཕྱི་ཡི་རྐྱེན་གྱིས་གཙེས་ན་ཡང་།།
སྤུན་ཟླའི་འདུ་ཤེས་ལྟེ་བའི་ལྟེ་བ་ཡིན།།

ནང་ལ་བཀྲ་ཤིས་ཁ་དགེ་མ་འབྱུང་ན།།
ཕྱི་ཡི་དོན་ཆེན་འགྲུབ་པའི་དཔེ་མེད་བཞིན།།
མ་བསམ་ས་ནས་བསམ་པའི་དུས་ཚེས་པས།།
ད་ནས་ལག་གདང་སྒྲིལ་དགོས་སྤུན་ཟླ་ཚོ།།

བགྲེས་པོ་ཚོ་ཡིས་ཁ་ལ་བདག་པོ་རྒྱོབས།།
གཞོན་པ་དག་གིས་སེམས་ལ་བདག་པོ་རྒྱོབས།།
དམར་དམར་བཟོ་མཁན་དམར་པོ་ལྕེ་དེ་རེད།།
ནག་ནག་བཟོ་མཁན་གནག་པོའི་སེམས་དེ་རེད།།

མ་གཞི་མི་ཞེས་ཅི་འདྲ་ལས་ངན་པོ།།
འདི་དང་དེ་ཤེས་གསལ་པོར་མཐོང་ན་ཡང་།།
ཁ་དང་ཁོག་པ་མི་མཚུངས་ལས་བྱས་པར།།
ཐེ་ཚོམ་མེད་པར་མུན་དུང་ནང་ལ་མཆོང་།།

སང་ཉིན་གནམ་གྱི་ཉི་མ་སེར་པོ་རེད།།
མགོ་བོ་དགྱེ་ནས་ང་ཚོ་མཉམ་དུ་འགྲོ །
མུ་མེད་སྤང་གྱི་མེ་ཏོག་མཉམ་དུ་འཐུ།།
དེ་དུས་སྒོར་གཞས་འཁྲབ་ན་སེམས་སྐྱིད་རེད།།

དགའ་བ་མཇེ་ཕྲུག 2026/8/20 ཉིན།
གྲོགས་གཅེས་ཨ་ཉོག་(རྡོ་རྗེ་ཕུན་ཚོགས་) གིས་དཔའ་བོ་ཁོང་གི་རྗེས་དྲན་སྙན་རྩོམ་རིང་མོ་དེ་བཀླགས་རྗེས། རང་གི་སེམས་གཏམ་འགའ་ཤར་མར་ཕབ་པ་ཙམ་མོ།།

2026-09-04 རྡོ་གོར་མོ།

2026-08-20 ཤེད་བུ།

ཤགས་འགྱེད།