ལྐོག་མི་གི་ཁྲོད།  

ལོ་ཟླ་འདི།  ཆང་ཕོར་ཞིག་ཡིན་ན།  

དགུན་མལ་གྱི་དྲོ་སར་འཛུལ་ནས།  

ཧུབ་འཐུང་ལན་འགའ་བྱས་རྗེས།  

སུ་ཞིག་གིས་བཞག་པའི་དྲན་ཤིང་ལྷག་མ་དེ་གླེང་ཆོག  

ནམ་བསལ་དུས།  

གླུ་དབྱངས་འཇམ་པོ་ཞིག་ལ་མགོ་བོ་བསྙེས་ནས།  

ཇ་མཆོད་མེད་པའི་ཞོགས་ཇ་འཐུང་རྗེས། 

འཇམ་མག་མག་གི་སྲང་ལམ་དེ་ནས།  

གབ་ཚིག་ཡིན་པའི་ཟུར་མིག་དེར་སླར་ཡང་མཇལ་ཆོག  

སྲང་ལམ་འདིའི་སྒོ་དང་སྒེའུ་ཁུང་ཡོད་ཚད།  

ནད་ཡམས་ལ་གཡོལ་བ་ཡིན་ནམ།  

རླུང་བུས་ལན་མང་འབྱེད་ཐབས་བྱས་ཀྱང།  

དགུན་གཞུང་གི་འཁྱག་རོམ་ལྟར་སྲ་མཁྲེགས་སེ་ལུས།  

ཨ་མ་རྒན་མོ་ཞིག་གིས་འདྲུད་ཁུག་དྲུད་ནས་ཕྱིན་སོང།  

ཁ་རས་ཅན་གྱི་སྤོ་བོས་སྲང་ལམ་འདིར་གཡས་སྐོར་གཡོན་སྐོར་བརྒྱབས་སོང།  

ད་དུང་།  ཤམ་ལྭ་ཅན་འགན་ཡང་རླུང་ཁར་འགྲེང་འདུག  

 ༢༠༢༡།༠༤།༢༡

འཚིག་ཇ།  

རྩ་ལམ་བསང་བྱེད་ལྟ་བུའི་འཚིག་ཇ་ཁ་མོས།  

དྲན་གསོ་ཡིན་པའི་ཚིག་འབྲུ་འགར་གསེད་དཀྲོལ་བྱས།  

མཛའ་མོའི་ཕྱིར་མིག་ལ་ཐིམ་པ་འདྲ་བའི་རླངས་པ་ཐིལ་ལེ་བ།  

ག་ལེར་ག་ལེར་ཡལ་ཚར་རྗེས།  

སྙན་ངག་གི་ལག་པ་དེའང་རེངས་པར་གྱུར་འདུག  

ཇ་ཕོར་གྱི་ཁ་རུ་འཁྱིལ་བའི་ཝུ་བ་སིབ་སིབ་དེ།  

སྙིང་རུས་ཀྱི་ཟོལ་དབྱིབས་སུ་བཞེངས་ཚུལ་བསམ་ན།  

འཚིག་ཇ་འཐུང་མཁན་དག་ཀྱང་བརྩེ་དུང་བ་ཡིན་ངེས་ལ།  

དེ་བས་ཀྱང་དོ་རྐང་མི་འགྲིག་པའི་སྙན་ངག་པ་ཤ་སྟག་ཡིན་ངེས།  

དོན་དམ་པར་འཚིག་ཇ་ཡང་སྙན་ངག་དང་འདྲ་ཨང།  

འཚིག་ཇ་འཐུང་རྗེས་རྒུན་ཆང་གི་བྲོ་བ་གཞན་ཞིག་སྟེ།  

རྨི་ལམ་མ་སྨིན་པའི་མཚན་མོ་དེའི་སྦྲིད་གཟེར་དང་འདྲ་བར།  

ཡོད་ཚད་ཞེན་ཆགས་ཀྱི་ང་རོར་ལངས་དོགས་མེད་ཀྱང།  

མགོ་བོ་བཀྱགས་དུས་སྤྲིན་པ་ཡང་རླུང་གིས་དེད་ཚར་བར་བསམ་ན།  

འཚིག་ཇའི་རླངས་པ་ཡལ་ཚུལ་ཡང་འཁོར་བའི་ཆོས་ཉིད་ཅིག་ཡིན་ངེས།  

༢༠༢༡།༠༦།༣༠ ཉིན་མེ་འཁོར་ནས་འགྲོ་ཞོར་བྲིས། 

 ཨ་མ།  

——— ཨ་མའི་བརྙན་ཐུང་ཞིག་ལ་བལྟས་རྗེས་བྲིས། 

འབྲུ་དྲུག་གི་བྱིན་རླབས་ལྟེམས་པའི་མ་ཎི་ལག་འཁོར།  

རྡོ་ཕྲེང་ནག་རིལ་དང་ཞལ་འདོན་དར་དིར་གྱིས།  

སུ་ཞིག་གིས་མངགས་པ་ལྟ་བུའི་མི་ཚེའི་དམ་ཚིག་རིང་མོ་ལས་ཀྱིས་བསྲིངས་ཏེ།  

བུ་ཕྲུག་ཚོ་རེ་རེ་བཞིན་ནར་སོན་ཞིང་རང་རྐང་སྒྲིག་དུས།  

ཁྱེད་ནི་ངེད་མིང་སྲིང་ཚོའི་འཚོ་བའི་ལམ་ཡིག་གསར་བའི་མེ་ལོང་ཇི་བཞིན།  

ངའི་དྲན་གསོའི་ཀློང་གི་རྟག་བརྟན་གྱི་འཚོ་བའི་བསྡུས་གཟུགས་དེའོ།།  

རྒས་གཉེར་མཐུག་པོ་བསྣམས་པའི་ཨ་མ་མ་ལོས།  

འཁྱོག་གཟུགས་སུ་གྱུར་པའི་ལུས་པོས་བཏེགས་པའི་བྱམས་སྐྱོང་དེ་གས།  

སུ་ལའང་མི་གསལ་བའི་དྲན་གདུང་ལྕི་མོ་ཞིག་བཟུང་ནས་ཡོད།  

ད་དུང།  སྐད་ངག་འདར་འདར་གྱིས་ཟིན་པའི་བརྩེ་བའི་ལང་ཚོ་དེ་ཡང།  

ཉི་ཟླའི་དགག་སྒྲོལ་གྱི་ས་ཚིགས་དེའི་སྦྲེལ་མཚམས་ནས།  

ང་ཁོ་ནར་མཐུད་པའི་ཞེན་ཆགས་ཀྱི་གཟུགས་ཐག་དེ་ཡིན་པ་སུ་ལའང་གསལ།  

སུ་ཞིག་གི་བསགས་ཉེས་ལྟར་ནུབ་མཐའ་ནས་ལྷོད་ཀྱིས་བལྟས་ན།  

སྐད་གཤིས་ཀྱིས་རིང་དུ་བདས་པའི་བྲེལ་ཟིང་གི་གྲོང་ཁྱེར་འདི་ནས།  

ངའི་འདུ་ཤེས་ཀྱི་འཛིན་ཐག་མ་གློད་པའི་དུས་ཡུན་དེ་དག  

ཁྱེད་ཁོ་ན།  ངའི་བདེ་སྐྱིད་ཀྱི་སྲོག་ཤིང་ཡིན་སོང།  

ཁྱེད་ཁོ་ན།  ངའི་དྲན་པའི་གཏིང་རིམ་གྱི་མར་མེ་ཚེ་འབར་དེ་ཡིན་སོང།  

ཁྱེད་ཁོ་ན།  ངའི་འཇིག་རྟེན་གྱི་ཡོད་ཚད་ཡིན་སོང།  

ངའི་བརྩེ་བའི་ཨ་མ།  

༢༠༢༡།༠༥།༡༢

 དར་ཤིང་ཞིག་ཆག་པ།  

——— སྙན་ངག་པ་གྲགས་ཅན་གཅན་མེ་སྟག་ལགས་འདས་པ་ཐོས་རྗེས།  

 དར་ལྕོག་ཅིག་རླུང་གིས་ཡང་ཡང་སྤུར་རྗེས།  དར་ཤིང་དེ་གློ་བུར་གྱིས་ཆག་སོང།  ཨོཾ་མ་ཎི་པདྨེ་ཧཱུྃ།

ཁ་བྱང་གི་འགྲེལ། 

བོད་མིའི་འཚོ་བའི་གཟུངས་ཐག་ལ་བརྒྱུས་པའི་ཡི་གེའི་ཕྲེང་བ།  

སྒྲོལ་མ་དང་སྐྱབས་འགྲོའི་གཟུགས་སྔགས་སྨིན་པོ་དེ་ཚོ།  

རི་རྩེ་དང་ཉག་ཁ་སོགས་ནས་བྲེལ་བ་ལངས་དུས།  

སུ་ཞིག་གི་འདུ་ཤེས་ཀྱི་བསྡུས་གཟུགས་སུ་གྱུར་པ་དེ་དག  

རྒྱང་རིང་གི་རི་རྩེ་དེར་འཁྱུད་པའི་རྣམ་ཤེས་དེ་ཚོའི་གསོན་ཤུགས་ལྟར།  

དུ་ཞགས་ལ་འཁོར་བའི་རྨི་ལམ་གྱི་རྟོགས་སྒྲུང་ཡོད་ཚད།  

སྙན་ངག་པའི་སྲོག་དབུགས་ཀྱི་རྐང་མར་ཐིམ་ཡོད་ཨང།  

དབྱངས་གསལ་སོ་བཞིའི་བློ་གྲོས་ཀྱི་མཚམས་སྤྲིན་འདར་བའི་ས་སྲོད།  

བླ་དང་སྲོག་ལ་ཐིམ་པའི་གཏམ་རྒྱུད་ཅིག་གི་སྔ་གཞུག་ལྟར།  

ང་ཚོས་ཞིབ་ཀྱིས་བརྡར་བའི་འཇམ་མཉེན་དང་རྩུབ་རག་གི་ཐ་སྙད་དེ་ཚོ།  

འཚོ་བའི་གྲིབ་སོར་གཡེང་བའི་རོལ་མོ་ཞིག་དང་འདྲ་བར།  

དབྱངས་གསལ་སོ་བཞིའི་འབྲུ་སྣ་རེ་རེར་གཤོག་པ་བཙུགས་ཏེ།  

ཁྱོད་ཀྱི་དབང་ལྔའི་སྒོ་ལམ་ནས་ཅི་ཙམ་གཤར་མྱོང་ཨང།  

མ་གཞི་ནས་འཇིག་རྟེན་ཞེས་པ་འདི་སྨུག་རྒྱུའི་རི་གྲོང་ཞིག་སྟེ།  

འཆར་ནུབ་དང་ལྡོག་འཕྲོས་ཀྱི་ང་རོ་ཆོས་ཉིད་དུ་བཟུང་ཡོད་པས།  

ང་ཚོས་དེ་ལ་ཞེན་ཆགས་དང་སྐྱོ་ངལ་ཁུར་དགོས་དོན་ལར་ནས་མེད་ནའང།  

དུས་ཀྱི་རྔམ་ཁར་གཡེང་བའི་དབྱངས་དང་གསལ་བྱེད་དེ་ཚོ།  

མི་རབས་འདིའི་ངག་སྒོ་ནས་ཙག་དང་རླུང་གིས་ཁུར་བའི་ངང་ཚུལ་བསམ་ན།  

ཕྱིར་མིག་མེད་པར་ཁྱེད་ཀྱི་བཞུད་སྟངས་འདིས་སྐྱོ་བའི་ལྷན་པ་གླན་ཡང།  

འགྲོ་འོང་གི་བར་མཚམས་ནས་འབྲུ་དྲུག་གིས་ཁྱེད་ལ་རྫོང་བ་ལོས་ཀྱང་བྱེད།  

ཕྱི་ལོ་ ༢༠༢༢ ཟླ་ ༠༩ ཚེས་ ༢༠ ཉིན་གྱི་མཚན་མོར།

2023-03-04 ཇག་ལྷ་དཀར་པོ།

2023-03-03 འཇམ་དབྱངས་དཀར་པོ།

2023-03-03 རང་བསླུས།

ཤགས་འགྱེད།