རྨི་ལམ་ལ་གཤོག་པ་བཏགས་པ།

དོལ་སྨྱོན། 

མདང་མཚན། 

མཁའ་དབྱིངས་ན་ཟླ་འོད་འཚེར་རམ་ཅི།

ཁོ་མོ་རྨི་ལམ་དུ་བྱོན་ནས། 

ཁྱོད་ཀྱིས”ཟླ་བའི་ལྷ་མོ”ཞེས་མི་འབོད་དོན་ཅི་ཡིན་ཟེར། 

དོན་ངོ་མར། 

ངས”ཟླ་བའི་ལྷ་མོ”ཞེས་མ་བོས་ནས་ཡུན་རིང་ཕྱིན་སོང་། 

ང་རང་འཁོར་བའི་ཐང་ཆེན་ན་འདུར་དྲགས་པས་ཡིན་ནམ། 

ཡང་ན་ཞེ་ལ་ཐིམ་པའི་བག་ཆགས་མཐུག་དྲགས་པས་ཡིན། 

མཛེས་པ་ཐར་ཐོར་དང་། 

ནོམ་པ་མག་མོག་དེ་ཚོར་ང་རང་མགུ་ཐབས་ཁྱོན་ནས་མ་བྱུང་། 

མདང་མཚན། 

མཁའ་དབྱིངས་ན་ཟླ་འོད་འཚེར་རམ་ཅི། 

ཁོ་མོ་རྨི་ལམ་དུ་བྱོན་ནས། 

ཁྱོད་ཀྱིས”ཟླ་བའི་ལྷ་མོ”ཞེས་མི་འབོད་དོན་ཅི་ཡིན་ཟེར། 

དོན་ངོ་མར། 

ངས”ཟླ་བའི་ལྷ་མོ”ཞེས་མ་བོས་ནས་ཡུན་རིང་ཕྱིན་སོང་། 

ང་རང་རང་ཉིད་ལ་དགའ་དྲགས་པས་ཡིན་ནམ། 

ཡང་ན་རྨི་ལམ་ནང་གི་ཁོ་མོར་དུང་དྲགས་པས་ཡིན། 

ལོ་ཟླ་འདི་དག་གི་རིང་། 

ཉི་ཟླའི་འཆར་ནུབ་དང་སྐྲ་ལོའི་འཇམ་ངད་དག་ལའང་། 

བརྩེ་དགས་རོལ་མྱོང་བྱེད་པར་གཏན་ནས་མ་ཕོད། 

མདང་མཚན། 

མཁའ་དབྱིངས་ན་ཟླ་འོད་འཚེར་རམ་ཅི། 

ཁོ་མོ་རྨི་ལམ་དུ་བྱོན་ནས། 

ཁྱོད་ཀྱིས”ཟླ་བའི་ལྷ་མོ”ཞེས་མི་འབོད་དོན་ཅི་ཡིན་ཟེར། 

དོན་ངོ་མར། 

ངས”ཟླ་བའི་ལྷ་མོ”ཞེས་མ་བོས་ནས་ཡུན་རིང་ཕྱིན་སོང་། 

༢༩-༠༡-༢༠༢༤ ཉིན། 

2024-02-03 ཤེད་བུ།

ཤགས་འགྱེད།