ཧྥ་ཇག་གི་ཇག་པ་ཁ་ཤས་མཇལ་བ།

རྒན་ཆབ་བྲག་ཕོ་ཉ།
ཐོས་རྟགས་ངོ་མ་ཡོད་ཞི་ཞིང་དུལ་བ་ཞིག།
དལ་དལ་ལྷོད་ལྷོད་ཡིན་འཆད་རྩོམ་ཞིབ་མོ་ཡིན།།
བདུད་རྩི་འཇོང་ཞོར་ལ་དགོད་གཏམ་གློད་འཇོག་ག།
དགེ་རྒན་ངོ་མ་ཞིག་སུ་དང་མཐུན་པ་ཞིག།
རྒན་བློ་བྷེ།
བོད་ཡིག་ཧྥ་ཡིག་ལ་དངོས་གནས་ཧྥ་མ་ཡིན།།
རྩོམ་རྩལ་འཇིགས་ནི་རེད་གདེང་འཇོག་མཐོ་ནི་རེད།།
གསེག་ཟིག་འབྲི་དགོས་ན་རྒན་འདིར་སྐལ་ཟིག་ཡོད།།
ཕ་རོལ་ལོག་བཤད་ཚོར་རྣག་ཐོག་གཙག་འཁེལ་ཡིན།།
རྒན་འབའ་སྲས།
སྙན་ངག་མེ་ལོང་མ་རྦད་དེ་ཟོས་འཇོག་ག།
ཁ་ལ་ཡོང་ཡོང་གོ་ཚིགས་བཅད་བྲིས་འཇོག་ག།
རོང་སྐད་སོང་དང་བཞག་རོང་བའི་མཚན་གཞི་ཞིག།
བོད་ཡིག་བོད་སྐད་ཆེད་བྱུང་གི་བསྟིམ་འཇོག་ག།
རྒན་ཟླ་ཚེ།
སྐུ་གཟུགས་གྱོང་ན་ཡང་སེམས་ཁམས་རློན་པ་ཡིན།།
དཔྱད་ནས་འཇུག་པ་ལས་གང་ལ་ཧོལ་རྒྱུགས་མེད།།
རང་སྣང་གང་དྲན་དང་རང་ཉིད་སངས་རྒྱས་ཚོའི།།
གདོང་ལ་མཆོང་ཕོད་ཀྱི་བཤད་ཕོད་སྒྲུབ་ཕོད་ཡིན།།
ཨ་བོ་མགོན་བཀྲ།
རྒྱུན་དུ་བགད་བསྡད་ཡོད་ཀུན་དང་མཐུན་པ་ཞིག།
བོད་རྒྱ་ཡིག་རིགས་དང་སྐད་རིགས་འགའ་ཤེས་ཀྱང་།།
ཤེས་རློམ་མི་ཤེས་ཤིང་ཤེས་ཚད་སྒྲུབ་མཁན་ཞིག།
ལར་ཞེན་ཤེས་རིག་དང་འབྲེལ་ནས་དལ་མོ་ཞིག།
ཤེད་བུ།
རྟག་པར་འཛུམ་བསྡད་ཡོད་འཛུམ་དེ་རྒས་བསྡད་ཡོད།།
ཁ་ན་སྤུ་ཞིག་ཡོད་དེ་ཡང་བགད་བསྡད་ཡོད།།
སྙན་ངག་བཞུར་འཇོག་ག་བཞུར་ནོ་བཞེངས་བཞག་ཡོད།།
དགོད་གཏམ་ཏག་ཏག་ཡིན་དེ་ཡང་རྩེད་མཚར་ཡིན།།
རྨི་ལམ་དཀར་པོ།
བལྟས་ན་སྒམ་པོ་ཞིག་འགྲོགས་ན་གུ་ཡངས་ཤིག།
བོད་པའི་ཞལ་མདངས་ཅན་རོགས་པར་བསྟུན་མཁས་ཤིག།
སྙན་ངག་མི་འབྲི་ཡང་བྲིས་ནོ་སྤུས་དག་ཡིན།།
ཁ་ནས་བཤད་པ་ལས་ཤེས་རྒྱ་ཁོག་ན་ཡོད།།
པཱ་ར་མི་ཏ།
བལྟས་ན་ཆུང་ཆུང་ཞིག་ཆུང་ཆུང་གཟི་མོ་ཞིག།
བཤད་ལ་དགའ་བ་ཞིག་ཁ་ཁོག་མེད་པ་ཞིག།
རྒན་བཀུར་གཞོན་བྱམས་ཀྱི་ལྷག་བསམ་གཙང་མ་ཅན།།
ཕྱོགས་ཞེན་མེད་པ་ཞིག་རྩོམ་ལ་དུངས་པ་ཞིག།

ཤགས་འགྱེད།