འཕགས་ཡུལ་ལྷོ་མཐའི་མོན་གྷོ་འདོད་རྒུ་གླིང་དུ།།
༧གོང་ས་ཡིད་བཞིན་ནོར་བུའི་ཆིབས་བསྒྱུར་སྐབས་ཤིག།
དགྱེས་བརྩེ་གཟིགས་པ་ཆེན་པོས་མཇལ་ཁ་བསྩལ་ཏེ།།
མིང་གི་དངོས་གྲུབ་གནང་བ་བསྟན་འཛིན་གཡང་དཀར།།

རིམ་གྱིས་སློབ་གྲྭ་ཆེ་འབྲིང་ཆུང་གསུམ་འགྲིམས་ནས།།
ཨང་རྩིས་གཙུག་ལག་རིག་པའི་རབས་འབྱམས་ཐོན་ཏེ།།
གཞིས་ཆགས་མཉམ་འབྲེལ་ལས་དྲུང་རང་འགན་བསྒྲུབས་ནས།།
ཚོགས་སྡེ་ཁག་ལ་ཡིག་བསྒྱུར་རོགས་རམ་གནང་མྱོང་།།

གནའ་དེང་རིག་པའི་གནས་ལ་གཤོག་ཟུང་ཆ་མཉམ།།
ལྷག་བསམ་ཟོལ་མེད་དད་དམ་རི་ཡི་དབང་བོ།།
དམངས་གཙོ་རང་དབང་སྲུང་བའི་དུས་རབས་བུ་མོ།།
བོད་ཀྱི་རང་དབང་ལྷ་མོ་འདི་ཀོ་རྨད་བྱུང་།།

སྐེ་མེད་ལུང་རྟོགས་ལྟ་བུའི་ཉོག་གཏམ་མི་བཤད།།
ལྕེ་མེད་ཨ་ནུ་ལྟ་བུའི་དཀྲུག་ལ་མི་དགའ།།
ཤེས་མེད་ཡེ་ཤེས་འདྲ་བའི་བླུན་པོ་མ་ཡིན།།
གཏམ་གྱི་བདེན་པ་བདར་བའི་ངག་གི་དབང་མོ།།

མདངས་ཉམས་ཚེ་ཆོས་ལྟ་བུའི་མུག་སྐད་མི་འདོན།།
དབུགས་འཚང་རྟམ་ཚེ་འདྲ་བའི་ཆོ་མེད་མི་བདོ།།
སྒྲིག་འཛུགས་བཅའ་ཁྲིམས་རང་ཁྱིམ་ཇི་བཞིན་བརྩི་བའི།།
གཡང་ཁྱིམ་བདག་མོ་ཨ་མ་བསྟན་གཡང་རྒྱལ་ལོ།།

དགྲ་ལ་དགྲ་དང་གཉེན་ལ་གཉེན་དུ་ཤེས་ཤིང་།།
༧ཐམས་ཅད་མཁྱེན་པའི་དགུང་ནའི་བབས་ལ་དཔག་སྟེ།།
ལོ་རྒན་དྲུག་ཅུར་ཕྱག་གིས་གཉོར་སྐྱོང་གནང་བའི།།
བོད་མིའི་སྒྲིག་འཛུགས་སྲུང་ལ་བཀའ་དྲིན་ཆེ་འོ།།

ལུས་ལ་མདོ་ཁམས་བདག་མོས་རྟག་ཏུ་སྲུང་ཞིང་།།
ངག་ལ་དབྱངས་ཀྱི་རྒྱལ་མོས་བདེན་པ་གནང་སྟེ།།
ཡིད་ལ་ཨརྱ་ཏཱ་རེའི་བྱམས་སེམས་ཐོབ་ནས།།
བསམ་དོན་ལྷུན་འགྲུབ་ལོ་བརྒྱར་འཚོ་བར་གྱུར་ཅིག།
་་་་་་2024.09.23.ཉིན། ་་་་ལམ་གྱིས།

2024-09-23 ཇག་ལྷ།

ཤགས་འགྱེད།