སྙིང་གཏམ་སྙིང་གི་འཕར་ལྡིང་།

རང་ངོ་ཟིན་པ་ཞིག་བྱེད་ན།།
རང་ལ་རང་ལྕག་རེ་རྒྱག་དགོས།།
རང་དོན་འཁྱོངས་པ་ཞིག་བྱེད་ན།།
གཞན་དོན་གཙིགས་ཆེན་དུ་འཛིན་དགོས།།
རང་མགོ་ཐོན་པ་ཞིག་བྱེད་ན།།
རང་སེམས་གཅུན་པ་དེ་གལ་ཆེ།།
རང་གཤིས་འཆལ་བ་ཞིག་བྱེད་ན།།
རྐྱལ་སྟོང་མགོ་སྟོང་དང་འགྲོགས་དང་།།
རང་ལུས་སྡུག་གྱོང་ལ་སྦྱོར་ན།།
མྱོས་བྱེད་དུག་རྫས་དག་སྤྱོད་ཅིག།
རང་གཞན་གཉིས་བདེ་ཞིག་འདོད་ན།།
མཛའ་མཐུན་ཞི་བདེ་ལས་ལྷག་མེད།།
རང་གི་མི་རིགས་ལ་ཞེན་ན།།
རང་རེའི་ལ་རྒྱ་དེ་འཛིན་དགོས།།
རང་ཡང་ཕོངས་རྐྱེན་ལ་སྦྱོར་ན།།
དུ་ཆང་འཛེམ་མེད་དུ་སྤྱོད་ཅིག།
རང་གི་ཕུགས་བསམ་དེ་འདོད་ན།།
བརྩོན་པའི་རྒྱུན་བཟང་དེ་བསྟེན་དགོས།།
རང་ཚུགས་ཡོད་པ་ཞིག་བྱེད་ན།།
རང་ལུགས་འཛིན་པ་དེ་གལ་ཆེ།།
རང་གཅེས་བསམ་བློ་དེ་འདོར་ན།།
དངོས་པོའི་ཆོས་ཉིད་དེར་དཔྱོད་ཅིག།
རང་རྒྱལ་གཞན་ཕམ་ཞིག་བྱེད་ན།།
གཡོ་སྒྱུ་ཁྲམ་གསུམ་གྱིས་ཆོག་གོ།
རང་ལ་རང་དབང་ཞིག་འདོད་ན།།
འཁོར་བའི་འཆིང་ཐག་དེ་གཅོད་དགོས།།
འདི་ཕྱིའི་ལེགས་ཚོགས་དེ་འདོད་ན།།
སྡིག་སྤོང་དགེ་སྒྲུབ་ལ་འབད་དགོས།།
དམ་པའི་ལྷ་ཆོས་ཤིག་བྱེད་ན།།
ཀུན་སློང་གཙང་མ་ཞིག་ཚུགས་དགོས།།
ལས་དོན་འཁྲུལ་མེད་ཅིག་བྱེད་ན།།
བསམ་བློ་ཞིབ་ཚགས་སུ་གཏོང་དགོས།།
ཚེ་གཅིག་གཏན་གྲོགས་དེ་འཚོལ་ན།།
འདྲིས་གཤིབ་ཡུན་རིང་དུ་བྱེད་དགོས།།
བདེ་མོའི་ཐང་ཆེན་ཞིག་འདོད་ན།།
ཀྱག་ཀྱོག་འཕྲང་ལམ་དེ་བརྒྱུད་དགོས།།
ཁ་ལས་རླུང་རྟ་དེ་འདོད་ན།།
ཆེ་བཀུར་ཆུང་བྱམས་དེ་གལ་ཆེ།།
མི་ཚེ་སྟོང་ཟད་དུ་གཏོང་ན།།
རང་མགོ་རང་ཉིད་ཀྱིས་གཡོགས་ཤིག།
མི་ཚེ་དོན་ལྡན་ཞིག་བྱེད་ན།།
དམིགས་ཡུལ་ཡོད་པ་ཞིག་བྱེད་དགོས།།
དགྲ་བོ་མང་བོ་ཞིག་འདོད་ན།།
སྣ་ཐུང་སྤྲོ་ཐུང་རང་གྱིས་དང་།།
ཀུན་ལ་མཐུན་པ་ཞིག་བྱེད་ན།།
གཞན་དང་བསྟུན་པ་དེ་གལ་ཆེ།།
ཚོགས་པའི་འཕུང་དཀྲུག་དེ་བྱེད་ན།།
རང་ལྟ་མཆོག་འཛིན་གྱིས་འཐུས་སོ།།
བྱ་བཞག་རླབས་ཆེན་ཞིག་སྒྲུབ་ན།།
ལས་དོན་ཆུང་ས་ནས་བརྩོན་དགོས།།
མཁས་པ་ཚད་ལྡན་ཞིག་བྱེད་ན།།
འཆད་རྩོད་རྩོམ་གསུམ་ལ་མཁས་དགོས།།
སྨྱོན་པའི་སྨྱོ་རྟགས་དེ་འཛིན་ན།།
དོན་མེད་ལབ་བརྡོལ་གྱིས་ཆོག་གོ།
ཤེས་ཡོན་ཚད་ལྡན་ཞིག་འདོད་ན།།
བཤེས་གཉེན་དམ་པ་ཞིག་བསྟེན་དགོས།།
འཕྲལ་བདེའི་བྱ་དངོས་ཀྱིས་ཆོག་ན།།
ཧམ་པའི་རྔ་མ་ནས་མ་གཏོང་།།
རང་དོན་གཞན་ཉིད་ལ་རེ་དུས།།
གཞན་ངོ་སྲུང་བའང་གལ་ཆེ།།
གཞན་ལ་ཕོག་ཐུག་རེ་གཏོང་ན།།
ཁ་རྡུང་ཚིག་རྩུབ་རེ་ཤོད་དང་།།
གྲོགས་མེད་ཁེར་རྐྱང་དུ་འཚོ་ན།།
ངེས་མེད་ལུང་སྟོང་དུ་འགྲིམས་ཤིག།
དགྲ་ཡང་གཉེན་གྲོགས་སུ་འགུག་ན།།
ཞི་བའི་ཐབས་རྩལ་དེ་བསྟེན་དགོས།།
དོན་ལྡན་འཚོ་གནས་ཤིག་མཁོ་ན།།
དོན་སྟོང་གནས་ལུགས་དེ་ཤེས་དགོས།།
སྐྱིད་སྡུག་མཉམ་གྲོགས་ཤིག་དགོས་ན།།
གདམ་ག་རང་ཉིད་ལས་མེད་དོ།།
བརྩེ་བ་རྣལ་མ་ཞིག་མཁོ་ན།།
ཚོར་བ་རྣོ་དབལ་དུ་སྦྲེང་དགོས།།
སྐྱོན་མེད་དམ་པ་ཞིག་བྱེད་ན།།
ཉེས་འགལ་ཆུང་ཚགས་ལའང་འཛེམ་དགོས།།
གཞན་དང་མཐུན་ཐབས་ཤིག་མེད་ན།།
ཁེར་འགྲོ་ཁེར་འདུག་རང་གྱིས་ཤིག།
ལོངས་སྤྱོད་འཛད་མེད་ཅིག་འདོད་ན།།
དཀའ་ལས་ཚད་མེད་ཅིག་རྒྱག་དགོས།།
ལུས་འདིར་བདེ་བ་ཞིག་འདོད་ན།།
ལུས་རྟེན་ཆུད་ཟོས་སུ་མ་གཏོང་།།
ཕྱི་མར་སྐྱིད་པ་ཞིག་འདོད་ན།།
ཚེ་འདིར་ཚོགས་བསགས་རང་གྱིས་ཤིག།
སེམས་ལ་འདོད་མོས་དེ་མེད་ན།།
གདོང་གི་སྐྱི་པགས་དེ་མ་འཛུམ།།
སྙིང་ན་རྨ་ཁ་ཞིག་ཡོད་ན།།
འཁུན་སྒྲ་ཇི་བཞིན་དུ་འབྱིན་དགོས།།
གཞན་གྱི་ཡིད་ཆེས་དེ་འདོད་ན།།
དྲང་བོ་དྲང་བཞག་ཅིག་བྱེད་དགོས།།
དབང་དང་གོ་སའི་ཆེད་ཡིན་ན།།
ཚུལ་འཆོས་སོ་དཀར་དེ་སྟོན་ཅིག།
མདུན་གྱི་སྣང་བ་དེ་འདོད་ན།།
རྒྱབ་ཀྱི་མུན་པ་ལ་གཟབ་དགོས།།
བློ་བརྟན་འགྱུར་མེད་ཅིག་བྱེད་ན།།
རྡོ་རྗེ་ཕ་ལམ་ལ་དཔེ་ལྟོས།།
འཁོར་བའི་གཏིང་ཞབས་འགྲིམ་འདོད་ན།།
བདག་འཛིན་རིལ་བོ་དེ་མ་གློད།།
ཅང་མེད་དབུལ་བོར་སྐྱེ་འདོད་ན།།
སེར་སྣའི་སྤར་ཁ་དེ་མ་ཕྱེ།།
མདོག་ངན་ལུས་བཙོག་ཅིག་འདོད་ན།།
ཞེ་སྡང་མེ་ལྕེ་དེ་མ་གཟིམ།།
ཕག་པའི་ལུས་རྟེན་དེར་དུང་ན།།
ཉིན་མཚན་གཏི་མུག་གིས་སྐྱེལ་ཅིག།
ཐར་བའི་དག་ཞིང་དེ་འདོད་ན།།
ངར་འཛིན་རྩ་བ་དེ་ཆོད་ཅིག།
མི་ལུས་ཙམ་པོ་དེ་འདོད་ཀྱང་།།
མི་དགེ་བཅུ་སྤོང་ལ་འབད་དགོས།།
དངུལ་ལོ་འཕྲོ་བརླག་ཏུ་གཏོང་ན།།
རིག་རིག་ཐུག་ཐུག་དེ་ཉོས་དང་།།
ཕ་མའི་ཐུགས་སེམས་དཀྲུག་སྙམ་ན།།
མི་ལས་དགུ་ལས་རང་གྱིས་ཤིག།
ཕུགས་བསམ་དོན་མེད་ཅིག་སེམས་ན།།
ཉི་མ་གང་འཁྱོལ་རེ་གྱིས་དང་།།
ཚུགས་ཐུབ་མི་ཚེ་ཞིག་སྐྱེལ་ན།།
མི་བུ་རང་ཉིད་ཀྱིས་འཇོན་དགོས།།
མེད་མུག་ཁ་འདོན་དུ་བྱེད་ན།།
ལས་མེད་ལྷོད་གཡེང་དུ་སྡོད་ཅིག།
འགྱོད་པའི་གདུང་བ་དེ་ཁུར་ན།།
གཞོན་དུས་བག་ཡངས་ཀྱིས་སྐྱེལ་ཅིག།
སྙིང་ཁམས་ནད་པ་རུ་བཟོ་ན།།
སྙིང་ནད་ཤ་འཁོན་དག་མ་བརྗེད།།
བློ་བདེ་བག་ཕེབས་ཤིག་བྱེད་ན།།
རང་སེམས་རང་ཉིད་ཀྱིས་གསོ་དགོས།།
གཉེན་གྲོགས་རང་འཁོར་ཞིག་བྱེད་ན།།
མཛའ་བརྩེའི་ཕྱི་ཐག་དེ་རིང་དགོས།།
རང་རེར་ཕྱག་རྗེས་ཤིག་འཇོག་ན།།
རྩ་དོན་མིག་འབྲས་ལྟར་གཅེས་དགོས།།
ཕ་མའི་དྲིན་ལན་དེ་འཇལ་ན།།
ཁ་ཏ་སྙིང་ནོར་དུ་འཛིན་དགོས།།
འཚོ་གནས་སྙིང་བོ་དེ་འཚོལ་ན།།
ཕུགས་འདུན་ཆེན་པོ་ཞིག་སྙེག་དགོས།།
ཤེས་བློའི་བང་མཛོད་ཅིག་བྱེད་ན།།
ཤེས་བྱའི་ཆུ་ཐིགས་ཀུན་གསོག་དགོས།།
སྐུ་ཤ་དར་ཙམ་གྱིས་ཆོག་ན།།
ཟ་འཐུང་ཉལ་གསུམ་རང་གྱིས་ཤིག།
དུས་ཚོད་སྐྱེལ་ཕྱིར་རང་ཡིན་ན།།
ཟང་ཟིང་འཕྲུལ་རིགས་ལ་འཐོམས་ཤིག།
འབྲས་བུ་ཡག་པོ་ཞིག་འདོད་ན།།
རྒྱུ་རྐྱེན་ཀུན་ཚང་ཞིག་སྒྲུབ་དགོས།།
གཞན་ལ་ཁ་ཏ་ཞིག་བྱེད་ན།།
ཐོག་མར་རང་ཉིད་ནས་རྩོམ་དགོས།།
སྙིང་བོ་ཡོད་མེད་ཀྱི་གཏམ་འདི།།
སྙིང་གའི་ཁོང་གསེང་ནས་བུད་བྱུང་།།
        གུང་ཐང་བསྟན་པའི་སྒྲོན་མེས་གསུངས་པའི་བསླབ་བྱ་ཟློག་སྒོམ་གྱི་ཚུལ་དུ་བྱས་པ་སྐྱོན་ཡོན་གསལ་བའི་མེ་ལོང་ཞེས་བྱ་བ་བཀླགས་པའི་མྱོང་བྱང་དང་དེའི་འབྲི་ཐབས་སྤྱད་ནས་སྙིང་གཏམ་སྙིང་གི་འཕར་ལྡིང་ཞེས་པའི་ལབ་བརྡོལ་ཞིག་འདིར་ཀློག་པ་པོའི་སྤྱན་སྔར་བཀོད་པ་ཡིན་ན་དགེ་སྐྱོན་ཅི་མཆིས་མཛུབ་སྟོན་དང་ནོར་བཅོས་ཡོང་བ་ཞུ།

2023-04-27 ཆབ་བྲག་ཕོ་ཉ།

2023-03-12 ཇག་ནག

2023-03-10 ཆབ་བྲག་ལྷ།

2023-03-09 ཤེད་བུ།

ཤགས་འགྱེད།