བོད་ཀྱི་སྲང་ལམ།
བོད་ཀྱི་སྲང་ལམ་དབུ་འབྱེད་དང་། མེ་ལམ་རྒྱུན་སྐྱོང་དང་འབྲེལ་བའི་ཚོར་སྣང་ར་བཟི་མ།
བཀླགས་གྲངས། 115
བཀླགས་གྲངས། 115
བོད་ཡོད་ས་ན་ལམ་ཡོད།ལམ་ཡོད་ས་ན་གྲོགས་ཡོད།
སང་ལམ་འདི་ཆུང་ངུ་ཞིག་ཡིན་ཡང་།ལམ་འགྲོ་བ་གང་མང་ཞིག་ཡོང་ངེས་ལ།ལམ་གྲོགས་ཀྱང་མང་པོ་ཞིག་རྙེད་ངེས།
རང་ས་སྤར་མོ་གང་མེད་ས་ནས།རང་དབང་གི་ལམ་ཞིག་རྙེད་དཀའ་ཡང་།གནས་ཚང་བཀའ་དྲིན་ཅན་ཚོས།ང་ལ་ཡང་སྲང་ལམ་ཞིག་གཡར་བྱུང་།
གནའ་སྔ་མོ་ཡང་རྐང་ལམ་ཕྲ་མོ་རེ་བརྒྱུད་དེ།གཞུང་ལམ་ཆེན་མོ་བཏོད་མྱོང་བ་བཞིན།བོད་ཀྱི་སྲང་ལམ་འདི་ནས་ཀྱང་།རྒྱང་རིང་གི་བོད་ལ་བསྐྱོད་ཐུབ་ཅིང་།མཛའ་འབྲེལ་གྱི་གཞུང་ལམ་ཆེན་མོ་ཞིག་འབྱུང་སྲིད།
ལམ་ཚང་མ་ཐུན་མོང་བའི་ལམ་སྟེ།སུས་ཀྱང་སྒེར་བདག་བྱེད་མི་ཆོག་པ་ལྟར།བོད་ཀྱི་ལམ་ཆེན་ངོ་མ་སྟེ།ཆོས་དང་རིག་གཞུང་དག་ཀྱང་།མིའི་རིགས་སྤྱི་ཡི་ལོངས་སྤྲོད་དུ་དབང་བས།སུ་ཞིག་གིས་བཙན་དབང་སྒེར་སྤྱོད་བྱེད་ཆོག་གམ།
བོད་པ་ཚོ།ལམ་ལ་ཆས་ཤོགསྲང་ལམ་ཆུང་ངུ་ཞིག་ལས་མེད་ཀྱང་།ཀྱག་ཀྱོག་དང་འགག་འཕྲང་མང་ན་ཡང་།བོད་སྐད་བཤད་ཅིང་བོད་ཡིག་བྲིས་ནས།མ་ཤི་བར་དུ་མདུན་དུ་སྐྱོད་དང་།ལམ་ཇེ་ཆེ་དང་ཇེ་རིང་ལ་འགྲོ་ངེས་པས།ཇི་སྲིད་དུ་བོད་སྐྱོད་ལམ་ཞིག་ཡོད་ན།དེ་སྲིད་དུ་བོད་མི་དང་བོད་སྐྱོད་འགྲུལ་བ་ཡང་མཚམས་མི་འཆད།།
ཁ༽
བོད་ལ་ད་དུང་མེ་ལམ་ཞིག་ཀྱང་ཡོད།མེ་ལམ་འདི་ནས།ད་བར་དུ་གསོན་པོར་བསྲེགས་སོང་ཅི་འདྲ་མང་ཨང་།དཔའ་རྒོད་གདོང་མཆོང་བ་ཐུབ་བསྟན་དངོས་གྲུབ་ནས།དེ་རིང་གི་དཔའ་རྟུལ་བློ་དགའ་རང་བཙན་བར་དུ།བརྒྱ་ཕྲག་གཅིག་དང་བདུན་ཅུའི་མེ་ལྕེ་ཆེན་པོ་དག་གཅིག་ཏུ་འབར་ན།ས་ཆེན་པོ་འདི་འབར་སྲིད་ལ།མཚོ་ཆེན་པོ་ཡང་སྐམ་སྲིད།དེ་ཅིའི་ཕྱིར་ཡིན་ནམ།
མེ་སྒྱོགས་ཀྱིས་བཙན་འཛུལ་བྱས་པའི་ལོ་དེ་ནས།བཙན་དབང་གིས་གཉའ་ནས་མནན་པའི་དེ་རིང་གི་བར་དུ།བསད་སོང་དང་རྨས་བཞག་པ་ཁྲི་ཕྲག་དུ་མ་སྟེ།དེ་ཀུན་གྱི་ཁྲག་རྒྱུན་མཉམ་གཅིག་ཏུ་བཞུར་ན།འབྲི་ཆུ་སྔོན་མོ་ལས་རྒྱུན་རིང་སྲིད།ཁྲི་ཤོར་རྒྱལ་མོ་ལས་རྒྱ་ཆེ་སྲིད།དེ་ཅིའི་ཕྱིར་ཡིན་ནམ།
སྐུ་གཤེགས་དཔའ་བོ་དཔའ་མོ་རྣམ་པའི་འབོད་སྒྲ་ཐོས་ཡོད་དམ།ཟུངས་ཁྲག་དྲོན་མོས་བྲིས་པའི་ཡི་གེ་མཐོང་ཡོད་དམ།གལ་ཏེ།དེ་ཀུན་མ་གོ་མ་མཐོང་ཡང་།ཁ་སང་གི་གསོན་པོའི་ཞལ་ཆེམས་དྲོན་མོ་སྟེ།སྐར་ཆ་དྲུག་ཅན་གྱི་བརྙན་ཐུང་དེ།ས་སྟེང་འདིར་ཁྱབ་ཡོད་ལ།གཤིན་རྗེ་ཆོས་རྒྱལ་གྱིས་ཀྱང་གཟིགས་ཡོད་ངེས།
ད་ནས་བཟུང་མེ་ལམ་འདི་འཆད་པར་སྨོན།ད་ནས་བཟུང་གསོན་ལམ་ནས་སྐྱོད་པར་སྨོན།
ཁ་བ་གངས་ཅན་པ།ཀ་ཁ་ག་ངའི་བདག་པོ།གངས་ཅན་མགོན་པོའི་གུས་འབངས།མ་ཎི་ཡིག་དྲུག་གི་སྲུང་མ།འཚེ་མེད་ཞི་བའི་བདེན་པའི་ལམ་ཆེན་དུ་སྐྱོད་ཅིག།
