བརྩེ་བའི་གྲོགས་དག་ད་ལྟ་གང་དུ་ཡོད།
སེམས་ཀྱི་འདོད་འདུན་དམིགས་པར་གཏད་ནས་ལ་དང་ལ་མོ་བརྒལ་ནས་ཡོང་།།
དཔའ་དང་སྤོབས་པས་དཀའ་སྡུག་བཟེད་ནས་རང་གི་རྨི་ལམ་པང་དུ་བསྙེགས།།
རིགས་དང་རུས་པའི་ཞེ་འདང་གླེང་ཞོར་དྲན་པའི་ཕ་ཡུལ་རྒྱང་ནས་འཚོས།།
སྐྱབས་གནས་གཅིག་གི་ཐུགས་བརྩེའི་བཀོད་པར་ང་ཚོ་འཛོམས་པའི་སྐལ་བ་ཡག།
དབྱར་གྱི་ཚ་གདུག་ཀླད་ནས་གདུ་ཞིང་གཤོང་གི་སྣོད་བཅུད་གདུང་བས་གཟེར།།
དགུན་གྱི་གྲང་རེག་རྐང་ལ་ཟུག་ཅིང་སྐྱེ་འགྲོ་སེམས་ཅན་འཁྱག་པས་མནར།།
ཁྱོད་དང་ང་ཚོ་ཡང་ཡང་འཛོམས་ནས་སྡུག་གི་འཚོ་བར་སྙིང་ཕུར་བརྡབས།།
ཁྱོད་དང་ང་ཚོ་ཡང་ཡང་བགད་ནས་ས་མཐའི་མིག་ཆུ་སྐྱིད་ལ་བསྐུར།།
ལྷམ་གོག་གཅིག་གི་ལག་སྔ་བརྩད་ན་རྡ་སའི་གྲོང་གི་ཤོམ་འགྲོར་རྔམ།།
རྒྱན་གོས་གཅིག་གི་བརྗེ་རེས་བར་ནས་གསར་འབྱོར་མཛེས་མའི་མིང་བྱང་བཙལ།།
ཧིན་སྒོར་བཅུ་ཡི་ལག་ཡོང་བགོས་ནས་གཉེན་དང་སྤུན་གྱི་བརྩེ་འདང་བརྒྱུས།།
ཟས་ཕོར་གཅིག་གི་ཁ་ཞབས་རུབ་ནས་བརྗེད་མེད་འཚོ་བའི་རི་མོ་བྲིས།།
ཉིན་ཞག་ཁོར་མོ་སྐད་ཅིག་འདས་སོང་ཡ་ཐོད་གཉེར་མའི་རི་མོ་ཁེབས།།
ལོ་དང་ན་ཚོད་ཡུན་གྱིས་ཟད་སོང་སྐྲ་འདབས་ཁ་བའི་མེ་ཏོག་འཐོར།།
རང་ཉིད་རྒས་པའི་ཚུལ་ལ་ལྟ་བཞིན་རྒྱང་གི་གྲོགས་དག་ཡང་ཡང་དྲན།།
འདྲིས་པའི་མི་དག་རྒས་པའི་དུས་ཀྱང་ད་དུང་མཉམ་དུ་ཡོད་ན་བསམ།།
ཕྱོགས་བཞི་གླིང་བཞི་ང་ཡི་གྲོགས་དག་འཛམ་གླིང་ཡུལ་ཕྱོགས་གང་དུ་ཡོད།།
ཉམ་ཆུང་འཚོ་བའི་ཁ་སྟབས་བར་ནས་རུས་པའི་རྐང་མར་བརྟན་ལགས་སམ།།
ཁ་དང་ལག་པའི་ཉོན་མོངས་མ་འཁྲུག་རིགས་ཀྱི་མཐུན་ལམ་སྐྱོར་ལགས་སམ།།
རང་རང་ལས་ལ་འབད་པའི་ཞོར་དུ་འབྱུང་བཞི་ལུས་ཁམས་བདེ་ལགས་སམ།།
