ཧྥ་ཇག

—— རྡོ་གོར་མོ།
(ཚན་པ་གཞན་གཅིག)
རི་བོ་་དེ་ཉིལ་རྗེས
ཁུ་བྱུག་ལྷོ་རུ་འཕུར་ཤུལ་ན
རྒོད་པོ་ཚོའི་གཤོག་རྩེ་རླུང་གིས་གཏོར

ཉེས་པ་ཅི་ཞིག་བསགས་པའི་མཇུག་འབྲས་སམ
ཉི་མ་ལྷ་སའི་འོད་ཀྱི་མཁའ་དབྱིངས་འཁྱག་རྗེས
གངས་འདབས་ནས་ཆས་པའི་རྨི་ལམ་ཐུན་དེ
ལོ་ཟླ་ཧྲིལ་བོ་ཞིག་གི་ཁ་དོག་གམ
ནམ་ཟླ་མག་མོག་ཅིག་གི་ཐོ་རངས་ཡིན

ས་ཆེན་གོམ་པས་འཇལ་ཏེ
གངས་རིའི་ལས་དབང་གི་གླེགས་བམ་ལ
འོད་གྱི་གཤོག་པ་བཙུགས་ནས
སྨག་ཆེན་དེ་བརྒལ་རྗེས
བཙན་པོའི་རུས་རྐང་ནས་བཞུར་ཞིང
ས་ཆེན་གྱི་མཇིང་ན་སྤོབས་པས་འཁྱིལ་བའི་ང་ཚོ
དབྱངས་གསལ་སོ་བཞིའི་མདའ་གཞུ་ཐོགས་ཤིང
སཱེན་གཙང་ངོགས་ཀྱི་གནས་མལ་ནས་ཆས་ཏེ
ཁྱོད་ལ་དུར་བྱང་འབྲི་བའི་ཇག་པ་རྐང་ཐང་དེ་ཚོ

སཱེན་གཙང་བོར་མོལ།

          1

གཱོལ་*མེས་པོའི་རྨུ་ཐག་འཇུས་ཏེ

ས་གཞིའི་དཀྱིལ་འཁོར་ཆུ་ཡི་ཟེགས་མར་བཏགས

སྒང་གཞུང་འདིའི་དུས་བཞི་ལ་བདུད་རྩི་ཕབསཏེ

བཅུད་དུ་བསྙིལ་བའི་འབྲས་བུའི་སྙིང་བོ

ས་ཆེན་གྱི་མགུལ་ན  འོད་དུ་འཚེར་དུས

སུ་ཞིག་གི་ཕྱི་མིག་ལ་རིན་ཐང་གིས་ལྟུང་བས

ལོ་ཟླའི་བང་སོ་ན

དངུལ་ཁྲག་གིས་བསླེངས་པའི་བཙན་རྫོང་དམར་བོ

ཁ་ཏོག་དང་རྒྱུ་འབྲས་ཀྱིས་ཕོང་བར་བཤད

ལེ་བདའ་དང་འཁང་རའི་ངག་སྒོ་ཕྱེས་ཏེ

ནོམ་པའི་ཁང་བཟང་དུ

སྲོད་ཀྱི་གློག་ཞུན་ཉུལ་བའི་མི་ཚོགས་ཀྱིས

ཁ་ཏོག་འཁྱིལ་བའི་ཆང་ཕོར་མཐོ་རུ་བཏེགས་ཏེ

ཁྱོད་ཀྱི་ལང་ཚོའི་མཛེས་སྡུག་ན

ལོག་ལྟ་དང་སྒྱུ་རྩལ་གྱིས་ངལ་ཞིང་དུབ

          2

 ཡུལ་གྱར་བའི་རྡོག་ཁྲེས་ཧོག་སྟེ

གནས་ཚང་གི་ཁྱིམ་གཞི་དྲོན་མོའི་མལ་སྟན་ནས

རྒུན་ཆང་ཕོར་བ་གང་ལ་རོལ་མྱོང་ཐོབ་པས

ཝ་དཱེ་ལོའི་*རྨ་ཁའི་ཟབ་ས་ནས

ཁྱེད་ལ་ལས་དབང་གི་སྙན་ངག་གྱེར་ཞིང

སྨག་རུམ་དེའི་གསང་བ་བསྙད

ཕྱིར་ལོག་འདོད་པའི་བསམ་ངོགས་ནས

དགུན་གཞུང་གང་མང་ཞིག་འདས་རྗེས

ལོ་ཟླའི་རྒས་གཉེར་གྱི་བང་སོ་ལས

རྨི་ལམ་ཟབ་ས་ནས    ནམ་ལངས་ཏེ

དྲན་པའི་མཁའ་དབྱིངས་རལ་བ་ན

སེམས་པའི་མེ་ལོང་དུ

ང་ཁྱེད་ཀྱི་ཟུངས་ཁྲག་ལ་ཐིམ་པ་མཐོང

2023.02.22 Paris

*གཱོལ་(Gaule) ་ནི་ཧྥ་རན་སིའི་མེས་པོར་བཞེད་པའི་གཱོལ་མི་རིགས།
*ཝ་དཱེ་ལོ་(Waterloo )ནི་རྒྱལ་བོ་ནཱ་ཕོ་ལོན་གྱི་དམག་ཕམ་པའི་ས་ཆ་འམ་ཝ་དཱེ་ལོའི་གཡུལ་འགྱེད་ལ་གོའོ།

2023-07-30 ཇག་ལྷ་དཀར་པོ།

2023-03-24 རྡོ་གོར་མོ།

2023-03-23 རྒད་ལྡང་།

2023-03-22 ཤེད་བུ།

ཤགས་འགྱེད།