གངས་མྱིག་གིས།

ཀ་ར་ནང་བཞིན་མངར་མོ་ཡིན་སྣང་ཤར་ན་ཡང་།།
ཁ་ཁོག་གཉིས་བར་འགལ་བ་ཡིན་པའི་བྱ་ལས་ཤིག།
ག་དུས་ཡིན་རུང་ལྷད་མེད་འགྱུར་མེད་བཤད་ན་ཡང་།།
ང་ཚོ་སུས་ཀྱང་ཡིད་ཆས་དཀའ་བ་དེ་བརྩེ་དུང་།།

ཅ་ཅོ་གླེང་མོལ་ཡུན་རིང་ཙམ་དུ་རྒྱུན་བསྐྱང་ན།།
ཆ་རྒྱུས་མེད་ཀྱང་འགྲོགས་འདྲིས་ཆོག་པའི་བྱ་བ་ཞིག།
ཇ་ཡུན་ཙམ་ཡང་བཤིབ་མྱོང་མེད་པའི་མི་ཞིག་ལ།།
ཉ་དང་ཆུ་བཞིན་བྲལ་མེད་བཤད་པ་དེ་བརྩེ་དུང་།།

ཏ་ལའི་མདོག་བཞིན་བརྟན་པོ་ཡིན་པ་རློམས་ན་ཡང་།།
ཐ་མག་དུ་བ་ཡལ་ལྟར་མིག་སྔར་བརླགས་འགྲོ་བ།།
ད་ལྟར་ཡོད་ཀྱང་ད་ལྟར་མེད་ན་མེད་ཆོག་ཆོག།
ན་ཚོད་རྒས་གཞོན་ཀུན་གྱི་སྡུག་བསྔལ་དེ་བརྩེ་དུང་།།

པ་རི་པུ་རི་ཡིད་རྟོན་དཀའ་བའི་ཆོས་ཞིག་ལ།།
ཕ་མ་ལས་ཀྱང་དགོས་མཁོ་ཆེ་བ་བསམ་ན་ཡང་།།
བ་མོ་བཞིན་དུ་རིང་པོ་མི་འཚོ་བོར་འགྲོ་བ།།
མ་གཞི་སྐྱ་སེར་ཀུན་གྱི་འཁྲུལ་སྣང་དེ་བརྩེ་དུང་།།

ཙ་གེ་ཙིག་གེ་ཡིན་ལ་མིན་ལ་བཤད་དགོས་པ།།
ཚ་བེ་ཚུ་བེ་རྣམ་འགྱུར་འདྲ་མི་སྟོན་དགོས་པ།།
ཛ་དྲག་མིན་ཡང་དགོས་གལ་ཆེ་ཚུལ་བཤད་དགོས་པ།།
འ་བུ་འུ་བེ་ངེས་བརྟན་མེད་པ་དེ་བརྩེ་དུང་།།

ཞ་དང་ཞོར་དུ་རྔན་པ་ཅུང་ཙམ་སྐྲད་དགོས་པ།།
ཟ་དང་ཟུར་ནས་ཕྲག་དོགས་ཡོད་མདོག་སྟོན་དགོས་པ།།
ཝ་མོའི་གཡོར་གྱི་སླུ་ཐབས་སྣ་ཚོགས་བཤམ་དགོས་པ།།
ཡ་མ་ཟུང་ཅན་རང་ཚུགས་མེད་པ་དེ་བརྩེ་་དུང་།།

ར་མ་ལུག་གི་རང་བཞིན་ཡིན་པའི་སེམས་བྱུང་ཞིག།
ལ་དུགས་ཕོག་ལྟར་རིག་ཚོར་བོར་བའི་སེམས་བྱུང་ཞིག།
ཤ་ཚ་སྙིང་རྗེ་ཀུན་དང་འགལ་བའི་སེམས་བྱུང་ཞིག།
ས་སྟེང་འདི་ནས་རང་འདོད་ཆེ་ཤོས་དེ་བརྩེ་དུང་།།

ཧ་ལམ་བདེན་པ་གཅིག་རྐྱང་མེད་པའི་འུར་བསྟོད་དེ།།
ཨ་ཉོག་རང་གི་སེམས་དང་མཐུན་ན་འགྲིགས་པ་དེ།།
ཧ་ཅང་རང་འདོད་ཆེ་བའི་མི་སེམས་རྩུབ་པོ་དེ།།
ཨ་འཐས་རང་བཞིན་ཕྱི་ལ་མངོན་པ་དེ་བརྩེ་དུང་།།

ཤགས་འགྱེད།