ནམ་ཟླ་འདིའི་ཁྲོད་ན།
བཀླགས་གྲངས། 1053
བཀླགས་གྲངས། 1053
མུ་ཏིག
ཟླ་འོད་འཐུང་བའི་བཟི་ཁ་དང་།།
སྐྱོ་བ་འཐུ་བའི་སེམས་པ་གཉིས།།
ག་དུས་སྨྲེང་བ་མཉམ་འཁུར་རེད།།
ཚོར་བའི་ལག་རྡང་བཤིགས་མྱོང་མེད།།
འབྲུག་སྐད་འཁུར་བའི་གནམ་ངོ་དང་།།
གློག་དམར་འཁྱུག་པའི་དགུ་ཚིགས་གཉིས།།
ག་དུས་འཚུབ་མ་མཉམ་འཁོར་རེད།།
ཆར་དང་སེར་བ་དུས་མིན་འབབ།།
གསོན་ཤུགས་འབར་བའི་ལྗང་ལོ་དང་།།
རང་སྟོབས་འཁུར་བའི་ཚོར་འདུ་གཉིས།།
ག་དུས་རང་ཚུགས་ཁེར་རྐྱང་རེད།།
ལས་ལ་ངོ་ལོག་བྱས་མ་མྱོང་།།
ལྷུང་ལྷུང་འདུར་བའི་རྫ་ཆུ་དང་།།
གཡའ་མ་འཁུར་བའི་བོང་བུ་གཉིས།།
ག་དུས་ཉིན་མཚན་མཉམ་འགྲོགས་རེད།།
ཚེ་ཡི་ལན་ཆགས་ཁ་ཁ་རེད།།
ཚ་བའི་མེ་ཏོག་དཀར་པོ་དང་།།
དུས་ཀྱི་གྲོག་མ་གཤོག་ཐོགས་གཉིས།།
གསུམ་པའི་རང་མཚམས་མཉམ་གྲོལ་རེད།།
མི་རིང་འཆི་སྟངས་གཅིག་པ་འདྲ།།
ཁ་སང་བྱུང་བའི་གཏམ་རྒྱུད་དང་།།
དེ་རིང་རླུང་གི་གཡུག་ཕྱོགས་གཉིས།།
ཡི་གེའི་རི་མོ་གཅིག་ལ་བབས།།
ལས་ཀྱི་ལམ་ཐིག་ཁ་ཁར་ཕྱོགས།།
དྲན་པའི་ནང་གི་གཟུགས་བརྙན་དང་།།
འཚོ་བའི་ཁྲོད་ཀྱི་སྣང་བརྙན་གཉིས།།
རྨི་ལམ་དེ་ཡི་ཕྱིར་མིག་རེད།།
རང་སེམས་དམར་པོའི་འཁྲུལ་སྣང་རེད།།
