མུ་ཏིག་གིས།

ནམ་ལངས་སྐར་ཆེན་མལ་དུ་མ་གཟིམ་གོང་།། 
དྲིལ་བུ་འགའ་ཡི་ལུང་གཞུང་འཁྲོལ་ལོ་ལོ།། 
སྤྲ་དང་བྱེའུས་མགྲིན་པ་མ་གསང་སྔོན།། 
རྟ་ཆུང་དྲེལ་ཆུང་རྨིག་པ་ཐག་ཐག་ཐག།

རི་བོ་ལྗང་ལོའི་བརྗིད་ཉམས་མ་ཤོར་གོང་།། 
ཁོག་གི་གཡའ་མའི་རྦབ་རྡོ་ཉིལ་ལི་ལི།།
མྱི་ལག་རྩིབ་མར་སྲིང་བའི་ནངས་མོ་ནས།། 
རྦབ་ཆུ་འདིས་ཀྱང་མིག་ཆུ་ཁྲོམ་ཁྲོམ་ཁྲོམ།།

ལུག་ཆུང་ལོག་རིལ་འགའ་ཡི་འབའ་སྐད་ཀྱིས།། 
ས་མཐའི་མི་ཡི་སེམས་པ་གྲང་ཤུར་ཤུར།། 
ར་སྤུ་གསིག་གསིག་བྱས་པའི་རྐུན་མ་འགས།། 
ལག་གི་བཟའ་བཏུང་ཁ་འཕྲོག་སྣ་འཕྲོག་བྱས།།

ཕ་བོང་མགོ་ཟད་རེ་རེའི་ངོ་མདངས་ཀྱིས།། 
སྙིང་རུས་ཞེས་པའི་གླུ་ཆུང་ཟིང་ཟིང་ཟིང་།།
བྲག་སྲུབ་མུ་གེ་མེ་ཏོག་གསོན་ཉམས་ཀྱིས།། 
སྲ་མཁྲེགས་ཞེས་པའི་གཤིས་ཀ་འོད་ལམ་ལམ།།

རི་རྒན་སྐྱ་རིལ་མགོ་ཡི་ཁངས་ཆུང་གིས།། 
སྙིང་ཁར་ཕ་ཡུལ་ཡིག་ཆུང་ཁངས་འབབ་འབབ།། 
ལ་དང་ལ་མོ་བརྒལ་བའི་གོམ་ཆུང་གིས།། 
རྒ་བའི་ཐེམ་པར་ལག་འཇུ་ཡང་ཡང་ཤོར།།

ལྕགས་ཀྱི་ཆུ་སྦུག་ཆེ་མ་ཆུང་གསུམ་གྱིས།། 
རི་བོའི་སྟོབས་འདི་བཙན་གྱིས་བཀྱིགས་བཀྱིག་ནས།། 
ཁཱ་རོ་ཌ་ཡི་དབྱར་ཀྱི་མཛེས་སྡུག་ཀྱང་།། 
ཁ་ངོ་སྐམ་པར་འགྱུར་རྒྱུའི་ལུང་བསྟན་བྱུང་།།

སེར་ཆེན་མེད་པའི་དབྱར་གཞུང་སྤང་ཁ་ནས།། 
ཁྱིམ་གཞིས་མེད་པའི་མི་འགའ་འཛོམས་ཁ་བྱས།། 
ལོ་ཟླའི་འཁོར་བསྐྱོད་ཅེས་པའི་རྒྱབ་མདུན་ནས།། 
ནང་མི་ཞེས་པའི་དགོད་སྒྲ་ལྷང་ལྷང་ལྷང་།།

སེམས་པ་ཉི་འོད་བསྲེས་པའི་བྱིས་པ་འགའ།། 
ནམ་མཁའ་སྔོན་པོའི་འོག་ནས་འཛུམ་ཤིག་ཤིག།
གུར་ཆུང་ནང་གི་ལོ་ལོ་སྙིང་རྗེ་ཚོས།། 
སྐར་མའི་གཞུང་ནས་དགོད་སྒྲ་ལན་གཅིག་སྒྲོག།
༢༠༢༣ ༦ ༡༡

2024-07-01 ཤེད་བུ།

ཤགས་འགྱེད།