ལུགས་ལྡོག་གིས།

དགུང་ཨ་སྔོན་གདན་དུ་བཏིང་ཞིང་།
ས་ནག་པོ་ཉལ་ཆས་བྱས་ནས།
དམྱལ་ཁམས་ཀྱི་དག་ཞིང་བགྲོད་དུས།
ལུ་གུ་སྤྱང་ལྤགས་གྱོན་མཁན་ཞིག་ཡོང་སྟེ།
ལུགས་ལྡོག་ཁྱོད་ནི་འཇིག་རྟེན་གྱི་མགོན་རེད་ཟེར།

རྨི་ལམ་རྨི་བཞིན་པ་ཡིན་ནམ། ཡང་ན།
འཁྲུལ་སྣང་གི་དབང་དུ་ཤོར་བ་ཨེ་ཡིན་སྙམ་སྟེ།
རང་ཉིད་ཀྱིས་རང་ཉིད་བཙལ་ཀྱང་ཅི་ཡང་མ་རྙེད།

ཁ་སྣ་ནས་བཤང་གཅི་འཛད་མེད་དུ་བཞུར་ཞིང་།
བཤང་སྒོ་ནས་ཁ་ལུད་སྣབས་ལུད་རྦབ་ཆུ་ལྟར་འབབ།

ང་རང་བུད་མེད་བགྲེས་མོ་ཞིག་ལ་མནའ་མར་སོང་བ་དང་།
བུ་མོ་མཛེ་རོ་མ་ཞིག་ང་ལ་མག་པར་ཡོང་གིན་པར་འཕྲད་དེ།
ངས་ཁ་བཏགས་དཀར་སེང་བ་ཞིག་གིས་རྟེན་འབྲེལ་ཞུས།

སྟོན་པ་གཙོ་འཁོར་གསུམ་གྱི་མགུལ་བར་དཔྱང་བ་དེ།
དགོན་བདག་ཚོན་པོ་ཞིག་གི་གསང་དོར་རྙིང་རལ་དེ་རེད།

ཕྱུག་བདག་ཚོའི་བརྒྱད་སྟོང་པ་འདོན་མཁན་གྱི་ཨ་མཆོད་ནི།
ཁྱིམ་མཚེས་ཚང་གི་ཡུགས་མོ་ཁེར་འདུག་མ་དང་།
མིང་འབོད་མི་ཕོད་པའི་ཁ་འཁོར་མ་བཤད་ཁ་མ་སྟེ།
མཚན་མོར་ཝ་མོ་བཞོན་ཏེ་གང་སར་རྒྱུ་བ་རྣམས་རེད།

རྒྱ་བླ་ཞལ་རས་དཀར་པོ་འཛུམ་མདངས་ཅན་རྣམས་ཀྱིས།
གཞོན་ནུ་མ་ཚོའི་གསང་དོར་དཀར་སེར་དམར་ལྗང་བཏེགས་ཏེ།
དད་ལྡན་མིག་ཆུ་འདོན་བཞིན་པ་རྣམས་ལ་ཚེ་དབང་བསྐུར།

བཀའ་བསྟན་གྱི་གླེགས་བམ་གསེར་བྲིས་མའི་སྟེང་དུ།
ཆོས་བརྒྱུད་ཀྱི་བླ་ཆེན་རྣམས་འཛུམ་གྱི་ལེར་བཞུགས་ནས།
ཤཱཀྱ་ཐུབ་པ་སྤྲང་པོ་རྐང་རྗེན་མ་ཡིན་རབས་བཤད་དེ།
དེང་རབས་ཀྱི་ནང་བསྟན་དཔལ་འབྱོར་རིག་པའི་གྲོས་ཁ་བསྡུར།
མཐར་ཐུག་གི་ཆོད་གན་དང་གསལ་བསྒྲགས་ཀྱི་སྙིང་པོ་ནི།
ཁྱིམ་མེད་པ་ནས་ཡོད་པའམ་འགྲན་རྩོད་བྱ་རྒྱུ་དེ་རེད།

ལང་ཚོ་དར་ལ་འབབ་པའི་ཁྱོ་ཤུག་གཉིས་ཡོང་སྟེ།
བླ་ཆེན་ཞིག་ལ་བྱིས་པ་སྐྱོང་སྟངས་ཀྱི་བཀའ་སློབ་ཞུས།

ཉིན་དེར་འུག་པ་དགོད་ཅིང་རུས་སྦལ་ནམ་མཁར་འཕུར།

༢༠༢༤-༡༠-༢༢

2024-11-16 ཤེད་བུ

ཤགས་འགྱེད།