ངན་པ་དགུ་འཛོམས།
བཀླགས་གྲངས། 763
བཀླགས་གྲངས། 763
ལུགས་ལྡོག་གིས།
ང་རང་གྲོང་གསེབ་དབེན་ས་ཞིག་ཏུ་བསྡད་དེ
ནུབ་ཕྱོགས་སུ་གནས་སྡོད་བྱེད་ཀྱིན་པའི
བོད་ཕྲུག་ལོ་ན་བཅུ་གཉིས་ཅན་ཞིག་གི་ཆེད་དུ
ལ་དོན་གྱི་སྒྲ་སྦྱོར་སྟབས་བདེ་ཞིག་བསྒྲིགས་ཚར་ཙ་ན
གྲོགས་པོས་འཕྲིན་ཐུང་ཞིག་བསྐུར་བ་དེར
དེ་རིང་ངན་པ་དགུ་འཛོམས་ཡིན་པ་གསལ
དགའ་སྣང་གློ་བུར་བ་ཞིག་གིས
དེ་རིང་ནི་བྱ་བ་ཞིག་གི་མགོ་ངེས་པར་བརྩམ་དགོས་ལབ་སྟེ
རྒུན་འབྲུམ་སྤར་གང་ཙམ་བཀྲུས་ནས་ཟ་ཞོར་དུ
ཕྱི་ལོགས་ཀྱི་རྭ་སྐོར་དུ་ཡི་གེ་འདི་འབྲི་བཞིན་པ་ཡིན
སྤྱིར་ན་ངན་པ་དགུ་འཛོམས་ཉིན་མོ་རུ
བྱ་བཟང་ཞིག་གི་མགོ་རྩོམ་པའི་གོམས་གཤིས་ཡོད
ཡིན་ཡང ད་ལོར་སྟ་གོན་བྱེད་ལོང་མ་བྱུང
སྤྱི་ལོ་གསར་བཞད་ཀྱི་ཡིག་འབྲིའི་མགོ་རྩོམ་པའང
ངན་པ་དགུ་འཛོམས་ཀྱི་ཉིན་མོ་འདི་འོས་འཚམ་རེད་འདོད
ཡང་གཅིག་བཤད་ན དེ་རིང་ཞོགས་པར
བོད་ནང་གི་གཅེས་ཕྲུག་ཕལ་བ་ཞིག་དང་མཉམ་དུ
མདུན་སྐྱོད་ཀྱི་གོམ་པ་སྤོ་མགོ་བཙུགས་པ་ཡིན་པས
མ་བསྒྲིགས་རང་འགྲིགས་ཀྱི་རྟེན་འབྲེལ་བཟང་སྙམ
ད་ལོའི་ངན་པ་དགུ་འཛོམས་དེ་ཏག་ཏག་ཤེས་ཡོད་ན
ངས་ལྷུག་རྩོམ་མམ་སྒྲུང་ཐུང་ཡིན་ལ་མིན་ལ་ཞིག
འབྲི་མགོ་འཛུགས་པའི་འཆར་སྣང་ཡང་བསྒྲིགས་ཚར་ཡོད་ངེས
རྒུན་འབྲུམ་གྱི་བཅུད་དང་ངན་པ་དགུ་འཛོམས་ཀྱི་གཏམ་བཟང་ནི
བདག་གི་སེམས་པ་སྤྲོ་ཞིག་རྟོག༡་པ་འཕེལ་བའི་ཉམས་ཀྱང་ཡིན
ཆོས་ལུགས་ཀྱི་མཛད་སྒོ་མིན་ཞིང་སྲིད་ལུགས་ཀྱི་བྱེད་སྒོ་མིན་པའི
བདག་གི་གྲུབ་མཐའམ་འཚོ་བའི་མེ་ལོང་གི་གཟུགས་བརྙན
ངན་པ་དགུ་འཛོམས་ཀྱི་སྟེགས་བུ་འདིར་རྨང་འདིང་བ་ཡིན་ནོ
༢༠༢༥-༡-༥ རེས་གཟའ་ཉི་མ།
༡༽ ཉམས་དེ་ཉམས་རྟོགས་ཀྱི་ཉམས་ལ་གོ་ཆོག་ཀྱང་རྟོག་ཡང་འཇུག་མེད་པ་འདི་ཆེད་དུ་སྤྱད་པ་ཡིན།
