ལུགས་ལྡོག་གིས།

ཁ་སྐད་དུ་ཁུ་ཡུག་ཅེས་པའི་བྱ་སྟེ།
ཁུ་ཡུག་ལྷང་ལྷང་གྲག་གིན་འདུག་ཅེས།
གནའ་མྱི་ཚོ་ཡིད་སྨོན་སྐྱེས་ཤིང་རྣ་བ་བླག་དཔེ།

གཏམ་བཟང་གི་དཔེ་མཚོན་དུའང་།
ཁུ་ཡུག་གྲག་གིན་འདུག་ཅེས་འཛུམ་དམུལ་དམུལ་བྱེད།

བར་སྐབས་ཤིག་ནས། ཁུ་ཡུག་ནི།
གནོད་སེམས་ཅན་ཞིག་ཏུ་མཐོང་སྟེ།
བྱིས་དུས་ཀྱི་ལྟ་ཚུལ་འགྱུར་སོང་ཞིང་།
ཁ་ཡག་ཅན་གྱི་མི་ལ་ཞེན་པ་གཏིང་ནས་ལོག

དེ་རིང་། མྱིང་མི་ཤེས་པའི་ཨ་ཁུ་ཞིག་གི་ཤག་ཏུ།
ཚ་བོའི་ཆེད་དུ་བྱེད་འབྲེལ་བྱེད་མེད་འབྲི་སྐབས་སུ།
ཁུ་ཡུག་གྲག་བཞིན་པ་ཚོར་ནས་སྒོར་བུད་དེ།
བྱིས་དུས་ལྟར་རྣ་བ་བླགས་ཏེ་གཟབ་ཉན་བྱས།
གཅིག་བྱས་ན། བླ་རྒོད་ཚངས་དབྱངས་ལའང་།
ཁུ་ཡུག་གིས་རྨོངས་ཚོར་ཟབ་མོ་བྱིན་ཡོད་སྲིད།

ཁུ་ཡུག་གི་སྐད་ཆའི་ནང་དོན་མི་གོ་ནའང་།
ལུགས་ལྡོག ལུགས་ལྡོག་ཅེས་ཐེངས་བཞི་ཙམ་འབོད།
ལུགས་ལྡོག་ཟེར་ན། ངའི་གཤིས་ཀ་མཚོན་པ་ཡིན་ནམ།
ཚངས་དབྱངས་རྒྱ་མཚོའི་བྱ་སྤྱོད་མཚོན་པ་རེད།

གི་གུ། ཞབས་ཀྱུ། འགྲེང་བུ། ན་རོ་ཞེས།
ཁུ་ཡུག་གིས་ཀྱང་ཀློག་གིན་འདུག་ཨང་།

དབྱངས་གསལ་གྱི་རུས་རྒྱན་ཐོགས་པའི།
འཇིག་རྟེན་ཁྱིམ་པའི་རྣལ་འབྱོར་བ་ཞིག་གིས།
ཁུ་ཡུག་ལ་ཉན་བཞིན་ཡུལ་ལྗོངས་ཀྱི་མཛེས་སྡུག་མྱོང་གིན་དུ།
ཆེས་མཐའ་མཇུག་གི་དུར་ས་ཆུང་ཆུང་ཞིག་འཚོལ་བའམ།
མི་ཚེའི་རིན་ཐང་གི་ལྟ་བའི་སྐེ་རགས་དང་ལྷམ་སྒྲོག་འཆིང་གིན།
ཀི་ཧི་ཧི། ཀི་ཧི་ཧི་ཞེས་འཁོར་བའི་དུང་ཆེན་ལ་རྒོལ་བའི།
ཁ་ཕོ་གནམ་ས་སྦྲེལ་བ་ཞིག་གིས་རང་སེམས་སྐྱིད་དུ་བཅུག

བདག་སེམས་ཀྱི་ཉི་མ། རེས་གཟའ་ཉི་མ།
བསྟན་འཛིན་ཉི་མ་སྟེ་དགུང་གི་ཉི་མ་འདི་ཚོ།
མ་བསྒྲིགས་རང་འགྲིག་གིས་ཅིའི་ཕྱིར་འཛོམས་པ་རེད།

སྐད་ཆ་འདི་ཐེད་པགས་ལྟ་བུ་ཞིག་ཡིན་ཡང་།
སྤྱང་ཀི་ང་ལ་མཛའ་བའི་རེ་བ་དང་མ་འོངས་པའོ།།
༢༠༢༥-༥-༡༡

2025-05-13 ཧཧཧཇ

2025-05-13 ལྕགས་མཇེ

2025-05-12 ཤེད་བུ།

ཤགས་འགྱེད།