རང་བསམ་རང་མོས།
བཀླགས་གྲངས། 338
བཀླགས་གྲངས། 338
མི་བསྟུན་པ།
ཞོགས་ཉལ་སྐྱིད་པོ་ཞིག་བརྒྱབ་སྟེ་གཉིད་སད་མ་ཐག་ཏུ།
དུས་ཆེན་གསུམ་འཛོམས་ཀྱི་སྐད་ཆ་རྣ་བར་གཟན་པ་ཞིག་གྲག
སླར་ཡང་། འགྲེ་ལྡོག་ཅིག་བྱས་ནས་གཉིད་དུ་ཡུར།
གཡེར་དྲིལ་དང་མ་ཎི་འདོན་དབྱངས་བཙན་པོ་དེས།
རྣ་བ་གཉིས་གཤགས་སོང་བའི་ཚོར་བ་སྐྱེས་བཅུག་སོང་།
ཉལ་ཆས་ཀྱིས་མགོ་བོ་བཏུམས་ནས་ཉལ་ཡང་།
མར་མེ་དང་འཁོར་ལོའི་ཚོགས་མིག་ལ་འཆར་འོང་བ་ནི།
བདག་གི་བདེ་སྣང་དཀྲོག་པའི་ཆོ་འཕྲུལ་ཞིག་རེད།
ཕྲེང་བ་བགྲེང་བཞིན་པའི་ལོ་ལོན་ཚོའི་གྲལ་དུ་བསྡད་དེ།
ཁ་པར་གསོད་བྱེད་ཀྱི་སྟར་སྐུད་བཀོལ་ནས།
རང་སྐེ་བསྡམ་རྒྱུའི་སྟ་གོན་གྲུབ་ཙམ་དུ།
ཨ་མ་རྒན་མོ་ཞིག་གིས་བཀའ་བཀྱོན་དྲག་པོ་བཏང་སོང་།
བཀའ་བཀྱོན་དང་མ་ཎིའི་སྒྲ་དབྱངས་གཉིས་བསྡུར་ན།
བདག་གི་སྲོག་སྐྱོབ་བྱེད་ནི་མ་ཎིའི་སྒྲ་དབྱངས་མིན་པས།
ངས་ཨ་མ་རྒན་མོ་དེ་ལ་གུས་ཕྱག་ལན་གསུམ་བཙལ།
སྨྱུང་གནས་པ་ཚོ་ངག་བཅད་ཡིན་པ་འདྲ།
ཁ་འཛིང་ཤོར་བ་ལྟར་སྨྲ་བ་མེད་པར་འགྲོ་གི་འདུག
ངའང་ཁོ་ཚོ་ལྟར་གྲལ་བསྒྲིགས་ནས་འགྲོ་བཞིན་དུ།
གླུ་ཚིག་རྙིང་བ་ཞིག་བསྐྱར་ཟློས་ཡང་ཟློས་བྱས།
ས་ཟླའི་དུས་ཆེན་དུ་དཀར་ཟས་རོལ་མཁན་མང་བས།
སེམས་གཏིང་ནས་བཤན་པ་ཚོར་སྙིང་རྗེ་སྐྱེས་ཏེ།
གླང་ཤ་དང་བྱ་ཤ་ཉོ་རྒྱུའི་སེམས་ཐག་བཅད།
ཕྲེང་ཐོགས་ཚོས། དེ་རིང་གི་དུས་ཆེན་ལས་ལྷག་པ་ཞིག
ནང་པ་སངས་རྒྱས་པ་རྣམས་ལ་མེད་ཟེར་བ་དེས།
ང་རང་སྐྲག་བཅུག་པ་མ་ཟད་ཤ་ཡང་བཟའ་དགོས་བྱུང་།
བོད་ཟླ་བཞི་པའི་ནང་དུ་སྐྱིད་པོ་ཡིད་ཚིམ་པ་ཞིག་མ་བཏང་ན།
ཆར་དུས་སླེབ་སྐབས་སུ་ས་གཞི་སྐམ་པོ་མིན་པ་ཐག་ཆོད་རེད།
སྐྱབས་འཇུག་ཞུ་བ་དང་སྨོན་ལམ་འདེབས་པའི་གྲས་སུ།
ང་རང་རྩ་བ་ཉིད་ནས་མ་འཇོག་རོགས་ཞུས་པ་ཡིན།
ཚང་མ་དང་བསྟུན་པ་ནི། རང་ཉིད་ཕུང་བའི།
ལད་ཟློས་དང་སྤྲེའུའི་གར་འཆམ་ཙམ་ཡིན་པས།
དམྱལ་ཁམས་སུ་ཁ་རོག་གེར་འགྲོ་བ་བདེ་ཞིང་སྐྱིད་དོ།།
(ས་ཟླའི་ཚེས་བཅོ་ལྔའི་ཕྱི་དྲོ་ལ་གཉིད་ཡོར་བྱེད་ཞོར་དུ་བྲིས།)
