___ལུགས་ལྡོག
བཀླགས་གྲངས། 98
རྒྱལ་ཁབ་མེད་པའི་རང་བཙན་པ་ང་ནི།
དགོན་པ་མེད་པའི་གྲྭ་ལོག་གི་མིང་ཅན་ཞིག་སྟེ།
ཁྱིམ་ཚང་གིས་སྟོང་བའི་ཨ་ཕ་འཁྱམ་པོ་ལྡོམ་པོ་ཞིག་ཡིན།
འཁོར་བའི་ཆུ་བོ་རབ་མེད་འདི་རྒལ་དུས།
ཆུ་བོ་མཁར་དུ་བརྩིགས་ཤིང་།
རླུང་བུ་ཐག་པས་བཀྱིགས་ནས།
ཉི་ཟླ་གཉིས་ཀ་ཞགས་པས་དམ་དུ་བསྡམས།
རྩ་བ་མེད་པའི་རྩེ་མོར་འཛེག་པའི་ཧམ་སེམས་ཀྱིས།
རང་སེམས་འདི་བྱེ་མའི་སྐས་འཛེག་བྱ་དགོས་བྱུང་།
ཁབ་མིག་གི་ནང་དུ་རི་རྒྱལ་ལྷུན་པོ་བཙུད་དེ།
ཧ་ཧ་ཧ་ཧ། ཀྱེ་ཧོ་ངོ་མཚར་མི་ཆེའམ།
ལྟད་མོ་བལྟ་འདོད་ན། ལྟོས་ཤིག་ལྟོས་ཤིག
ད་ལྟར་ལྟོས་དང་། དགེའོ་དགེའོ་ཞེས་པའི་ཚིག་གིས།
འཇིག་རྟེན་གྱི་ཆོས་རྣམས་རྡུལ་དུ་འཐགས་བཞག
དུག་གསུམ་གྱི་མེ་ལྕེ་ཐུར་དུ་མཆེད་དེ།
རོ་རྐྱང་གི་བརླ་གཡས་གཡོན་དུ་བསྣོལ་བའི།
སྟག་གི་མཆེ་བ་གཙིགས་པའི་ང་རོ་འདིས།
ཕྱི་སྣོད་དང་ནད་བཅུད་ཁྱུར་མིད་གཏོང་རྩིས་མིན་ནམ།
སྐད་ཆའི་དཀྱུས་ཏག་ཏག་དེར།
མདོར་ན་ཞེས་པའི་ཚིག་གིས། འཛེམ་བྱ་གཉིས་ནི།
རེ་བའི་རྟག་མཐའ་དང་དོགས་པའི་ཆད་མཐའ་གཉིས།
རྣ་ཆའི་ཚུལ་དུ་རེས་ཀྱིས་འདོགས་པ་ཡིན་ན།
དར་བ་ནས་རྒུད་ཅིང་ཉམས་པ་སྟེ།
ཕོངས་པ་མཐའ་དག་གི་རྒྱུ་བྱེད་དོ་ཞེས།
གལ་བོ་ཆེ་ལ་ནན་ཏན་གྱིས་མདུད་པ་བརྒྱབ།
༢༠༢༥-༡༡-༧
རེས་གཟའ་པ་སངས།
