བཀྲ་ཤིས་སྣ་ནག་མ། ——འཆི་བ་དང་འབྲེལ་བའི་མུ་འབྲེལ་ཟིན་ཐོ།
ལུགས་ལྡོག་གིས།
བཀླགས་གྲངས། 205
ལུགས་ལྡོག་གིས།
བཀླགས་གྲངས། 205
ཟླ་བཅུ་པའི་ཟིན་ཐོ།(༢༣)
འཆི་སྟངས་ལ་སྐྲག་པ།
ལྐོག་ལྐོག་སུད་སུད་དུ་ཅེར་བའི།
འཆི་བདག་གིས་ག་ཤེད་ཅིག་ནས་བལྟས་ཡོད་ངེེས།
མཁའ་འགྲོ་མ༡་རྙི་ཡིས་འཆིང་བ་ལྟར།
གློ་བུར་དུ་འཇབ་རྒོལ་ཐེངས་ཤིག་ཐེབས་ནས།
གཤོག་ལྷབ་འགའ་བྱས་པ་དང་འགུལ་རྒྱུ་མེད།
སྐད་གསེང་མཐོན་པོའི་སྒོ་ནས།
སྐྱེས་ཐེངས་གཅིག་ལ་འཆི་ཐེངས་གཅིག་ཅེས།
ཁ་ཕོའི་སྐད་ཆ་དྲག་ཅིང་རྩུབ་པ་ཞིག་བཤད་ཆོག
ཡིན་ཡང་། འཆི་བར་སྐྲག་པ་ལ་ཚོད་ཅིག་མེད།
ཤི་རྗེས་དམྱལ་ཁམས་དང་དག་པའི་ཞིང་ཁམས་ཡོད་མེད་མི་ཤེས།
ང་སྐྲག་ས་ནི། འཆི་སྟངས་ཏེ་བེམ་ལུས་འདི་རྡབ་གསིག་ཐེབས་པར།
སྐྲག་ཅིང་འཇིགས་ལ་ཚོར་ཤུགས་དྲག་པོ་སྐྱེ་ཡོང་གི་འདུག
ཕྱི་ངོས་ཀྱི་བདེ་སྲུང་མ་བཟང་ན།
ནང་ལོགས་ཀྱི་ལས་ཁུངས་ཏག་ཏག་གནས་ཐུབ་བམ།
ང་འཆི་བ་ལ་སྐྲག
དངངས་སྐྲག་དང་འཇིངས་སྣང་གིས།
ཤ་རུས་པགས་གསུམ་སོ་སོར་དབྲལ་བའམ།
ཚལ་བ་ཚལ་བར་འཐག་འགྲོ་བར་དོགས།
༢༠༢༥-༡༠-༢༣
རེས་གཟའ་ཕུར་བུ།
༡༽ བྱ་ལ་གོ་དགོས།
ཟླ་བཅུ་པའི་ཟིན་ཐོ།(༢༤)
འཆི་བའི་སྔ་རྗེས།
སྐྱེས་མ་ཐག་པའི་ངུ་སྐད་གཉོམ་པོ་དེ།
འཆི་བའི་འཚང་རྒྱུགས་ཀྱི་གསལ་བསྒྲགས་ཐོག་མ་ཡིན།
ཚེ་འདིའི་འགུལ་སྐྱོད་རེ་རེ་ན་འཆི་བའི་བརྡ་སྦྱོར་དང་།
བཟའ་བཏུང་གང་ཞིག་བྱས་ན་འཆི་བ་དང་འབྲེལ་བའི།
འཛེམ་ཟོན་བྱ་དགོས་པའི་རྣམ་གཞག་ཐར་ཐོར་གྱིས།
འདོད་པའི་ཡོན་ཏན་ལྔ་པོའང་མི་སྡུག་པར་བསྒྱུར།
འཆི་བ་དྲན་ཐེངས་རེ་རེར།
སྙིང་ཤ་དུམ་བུ་དེ་འོག་སྒོར་འབུད་ལ་ཁད་དུ་གྱུར།
ཆོས་ལུགས་ཀྱི་གཞིས་ཀ་དང་གསང་སྤྱོད་ཡོད་ན་འདྲ་མེད་ཀྱང་རུང་།
མཐར་ཐུག་ང་རང་གཅིག་པུར་འཆི་དགོས་པའི་བུ་ལོན་ཏེ།
ལུས་ཕུང་གི་རྩ་ཕྲན་ཉི་ཁྲི་ཆིག་སྟོང་རེ་རེ་བཞིན་འཆད་འགྲོ་བར།
ད་ལྟར་གསོན་པོའི་སྐབས་སུ་ཤ་གསེང་རུས་གསེང་དུ་ཚ་ཤད་རྒྱུག
སྐྱེ་རྒ་ན་འཆིའི་རྦ་རླབས་ཀྱིས་ཁུར་སོང་རྗེས་སུ།
དག་པའི་ཞིང་ཁམས་དང་དམྱལ་ཁམས་མིན་པའི།
གྲམ་སྒང་ཞིག་ཏུ་བག་ལྷོད་ཀྱིས་ཉི་མར་ལྡེ་འདོད་ཡོད།
ལུས་སེམས་གཉིས་ཡ་བྲལ་དུ་སོང་མཐར།
རྣམ་ཤེས་ཟེར་བ་ཞིག་ཡོད་སྲིད་དམ།
༢༠༢༥-༡༠-༢༤
རེས་གཟའ་པ་སངས།
ཟླུ་བཅུ་པའི་ཟིན་ཐོ།(༢༥)
དུས་མ་ཡིན་པར་འཆི་བ།
ལོ་ངོ་སྟོང་ཕྲག་གི་རིང་དུ་འཚོ་འདོད་ཡོད་པར་བརྟེན།
དུས་རབས་གཅིག་གི་རིང་ཙམ་དུ་གསོན་མ་ཐུབ་ན།
དུས་མ་ཡིན་པའི་འཆི་བས་ང་རང་ཁྱེར་སོང་བ་ཡིན།
ད་ནངས་ཞོགས་པར་ཡར་ལ་ལང་མ་ཐག་ཏུ།
ཁ་པར་ནང་གི་ཆུ་ཚོད་བསྐྱར་སྒྲིག་བྱ་རྒྱུ་དྲན་ཏེ།
༢༠༠༡-༡-༡ གི་དུས་ཚོད་དུ་བསྒྱུར་ནས།
ལོ་ངོ་ཉེར་ལྔ་ཡས་མས་ཕྱིར་ལ་བཟློགས་པ་ཡིན།
དུས་ཚོད་ཕྱིར་ལྡོག་མེད་པ་བདེན་ཡང་།
ཆུ་ཚོད་འཁོར་ལོ་ཚན་རྩལ་ཡིན་སྟབས།
ཨང་གྲངས་བསྐྱར་སྒྲིག་སྟབས་བདེ་ཞིག་བྱས་པ་ནི།
རང་ཉིད་ལ་སེམས་གསོ་བྱེད་སྟངས་སྙིང་རྗེ་མོ་ཞིག་དང་།
ཚེ་སྲོག་ལ་ཤ་ཚ་བྱེད་པའི་ཐབས་ཤེས་ཤིག་ཀྱང་ཡིན།
ལོ་ངོ་ཉེར་ལྔ་ཕྱིར་འཐེན་བྱས་ཚར་མ་ཐག་ཏུ།
དཔེ་ཁུག་ཆུང་ཆུང་དེ་ཁུར་ནས་སློབ་གྲྭར་ཕྱིན།
དུས་ཚོད་དྲུག་དང་ཕྱེད་ཀའི་སྟེང་ཏག་ཏག་དེར།
སློབ་ཟུར་སྣ་ཤོ་ཡི་ཞོགས་ཟས་ཁང་དུ་འབྱོར།
རེས་གཟའ་ཉི་མ་ཡིན་པ་གཞི་ནས་དྲན་པ་དང་།
སློབ་ཆས་ཟས་ཁང་དུ་བསྐྱུར་ཏེ་སྤོ་ལོ་རྩེ་སར་བརྒྱུགས།
ཡ་མཚན་པ་ཞིག་ནི།
ངའི་བུ་མོ་སློབ་གྲྭའི་དགེ་རྒན་ཆེན་མོ་ཡིན་པ་མ་ཟད།
ང་ལ་ལེགས་སྦྱར་འཁྲིད་མཁན་ཐོག་མ་དེར་གྱུར།
कཀ་खཁ་गག་घགྷ་ङང་།
ཚར་གསུམ་མཛུབ་ཁྲིད་བྱས་རྗེས་སུ།
ཨ་ཕ། ཁྱོད་རང་གི་སྐྲ་འདབས་ཀྱིས།
རྩ་དགོངས་ཞུ་བའི་སྙན་ཞུ་ཕུལ་སོང་ཟེར།
སླར་ཡང་འཆི་བ་དྲན་ཏེ།
མི་རྟག་པའི་ཚོང་ཁྲོམ་དུ་ཉུལ།
“འཆི་བ། འཆི་བ།”
ཐེངས་གཉིས་ཙམ་ལབ་འཕྲལ་དུ།
ཡུར་བའི་འགྲམ་དུ་འགྱེལ་སོང་།
༢༠༢༥-༡༠-༢༥
རེས་གཟའ་སྤེན་པ།
ཟླ་བཅུ་པའི་ཟིན་ཐོ།(༢༦)
འཆི་གསོན་གྱི་འཐབ་རྩོད།
ཆགས་སྡང་གཉིས་ཀྱི་ཉིན་སྲིབ་ཏུ།
འཚོ་བའི་འགྲན་རྩོད་ཀྱི་ངར་ཤུགས་བཙན་ཡང་།
སྨིན་མ་གཉིས་གཞི་གཅིག་ཏུ་བསྡུས་ཏེ་གཞིག་དུས།
འབབ་ས་དངོས་ནི་འཆི་གསོན་གྱི་འཐབ་རྩོད་རེད་ཨང་།
ང་རྒྱལ་གྱི་ཁོག་པ། ཚོར་བ་ཤུགས་དྲག་གིས་སྦོས་ན།
འཆི་བ་ལ་མི་སྐྲག་པའི་དཔའ་སྐད་མཐོ་ཡང་སྲིད།
དོན་དངོས་སུ། འཆི་བ་ནི་ཞེ་རྩ་རུ་འགུལ་བའི་ནད་འབུ་ཞིག
མི་ཚང་མ་འཆི་དགོས་པ་དང་།
སྲོག་ལྡན་ཡོད་དོ་ཅོག་འཆི་དགོས་པས།
ང་གཅིག་པུ་འཇིགས་སྐྲག་བྱེད་དོན་མེད་ཅེས།
སྒམ་ཚུགས་རི་བོ་ལས་བརྗིས་པ་ཞིག་བྱ་འོས་ཀྱང་།
རང་སེམས་ཀྱི་སྒྲོམ་བུ་ན་ཚ་ཚ་འུར་འུར་འབར་བའི།
འཆི་བའི་གནོན་ཤུགས་ཀྱི་མེ་ལྕེ་འཇིལ་ཐབས་བྲལ།
ཁ་ཕོ་དང་ལ་རྒྱ་བསམས་ཏེ།
སྐྱེས་པའི་ལན་དུ་འཆི་བའམ།
སྐྱེས་ནས་འཆི་བ་འཁོར་བའི་ཆོས་ཉིད་དུ་བསྙད་ནའང་།
རང་སེམས་སུ་དངངས་སྐྲག་གིས་རྒོལ་རྡུང་དྲག་པོ་བྱེད།
མདོར་ན། གདམ་ག་མེད་པའི་གདམ་ག་དེས།
འཆི་བ་དང་དུ་བླང་དགོས་བྱུང་བ་རེད།
༢༠༢༥-༡༠-༢༦
རེས་གཟའ་ཉི་མ།
ཟླ་བཅུ་པའི་ཟིན་ཐོ།(༢༧)
འཆི་བ་ནི་དཔེ་འཇོག་མེད་པ་ཞིག
འཆི་བར་འཇིགས་པའི་ལོ་ཟླ་འདི་ཚོར།
འཆི་བའི་ཐོག་མཐའ་གཉིས་བཙལ།
འཆི་བ་ལ་དཔེ་ཞིག་འཇོག་ཟེར་དུས།
དབྱིབས་དང་ཁ་དོག་གིས་སྟོང་བ་སྟེ།
མཐའ་དབུས་དང་རྣམ་གཞག་མེད་སྟབས།
འཆི་བ་ནི་དཔེ་འཇོག་བྲལ་བའི་ཆོས་ཤིག་རེད།
མི་རྟག་པའི་མཚར་སྒྲུང་ཅི་ཙམ་བསྐྱར་ནའང་།
འཆི་བའི་རང་ལྡོག་ནི་རྟག་པ་ལས་མ་འདས།
དངོས་གཙོ་རིང་ལུགས་ཀྱི་སྟ་གྲི་འཕྱར་ཏེ།
ལྐོག་གྱུར་གྱི་གནས་ལུགས་གཤག་དགོས་མ་ཟེར།
ཐུན་མོང་གི་ཤེལ་མིག་གིས་ཐུན་མིན་གྱི་རིགས་གཞལ་དཀའ།
འོ་ན། འཆི་བ་ནི་འུ་ཅག་ཐུན་མོང་ལ་ཡོད་པ་མིན་ནམ་ཞེ་ན།
ཚིག་འཁྲི་ནི་རྨོངས་པ་ནས་མུན་ནག་གི་སྨག་རུམ་དུ་འདེད་བྱེད་ཅིག
འཆི་བདག་གི་སྒོ་གླེགས་སུ།
རྟག་བརྟན་ཐེར་ཟུག་གི་གཡུང་དྲུང་ཞིག
འཆུག་མེད་འདལ་མེད་དུ་བརྐོ་བར་བྱ།
འཆི་བ་ནི་མཐའ་བཞི༡་ལས་འདའ་བའི།
ཀུན་ཁྱབ་ཀྱི་ཉི་གདུགས་སྤྲོས་པ་དང་བྲལ་བ་ཉིད་དོ། །
༢༠༢༥-༡༠-༢༧
རེས་གཟའ་ཟླ་བ།
༡༽ ཚིག་མཛོད་ཆེན་མོ་རུ། “སྐྱེས་མཐའ་འཆི་བ། འདུས་མཐའ་འབྲལ་བ། བསགས་མཐའ་འཛད་པ། མཐོ་མཐའ་ལྷུང་བ་སྟེ་བཞི།”
ཟླ་བཅུ་པའི་ཟིན་ཐོ།(༢༨)
འཆི་བ་ནི་འཆིང་ཐག་ཅིག
མི་རྟག་པའི་བེམ་གོག་གི་རོ་སྒམ་དྲུད་དེ།
རྣམ་ཤེས་ལ་སྐུ་ངོ་ལགས་བཞུགས་རོགས་ཞུས་ནའང་།
སྐུ་ངོས་ཚེ་རོགས་གསར་པ་ཞིག་འཚོལ་འདོད་པས།
བཟའ་འཐོར་བརྒྱག་རྒྱུ་ནི་གཏན་དུ་ཁེལ་འདུག་ཨང་།
གཉེན་སྟོན་དང་བཙས་སྟོན་གྱི་དགོད་སྒྲའི་ཁམས་སུ།
ཆེས་མཐའ་མཇུག་གི་གྱེས་བྲལ་གྱི་བྱང་བུ་དཔྱང་བ་ནི།
འཆི་བའི་འཆིང་ཐག་གི་བསྡུས་གཟུགས་རེད་ཡ།
འཆི་བའི་ངོ་བོ་ཆོས་སྐུ་ཡིན་པ་བདེན་ཡང་།
ང་རང་ཆེས་སྐྲག་ས་ནི་འཆི་བའི་གཡུལ་འགྱེད་ཡིན།
གནའ་གནའ་ཞིག་ཏུ། གསར་བུ་སྣང་མཐོ་ཡིན་དུས།
འཆི་བ་ནི་དོན་དམ་གྱི་བདེ་བའོ་ཞེས་པའི་ངག་གིས།
དྲྭ་གྲོགས་དང་སློབ་གྲོགས་ཚོར་སུན་པོ་བཟོས་པ་མ་ཟད།
ཉེ་བའི་མི་དང་སེམས་ཁུར་བྱེད་མཁན་ཚོས་ཁ་པར་བཏང་སྟེ།
དཀའ་སྡུག་ཅི་ཡོད་ལ་གདོང་ལེན་བྱ་དགོས་པའི།
ལྷག་བསམ་རྣམ་དག་གིས་སྐུལ་མ་ཡང་ཡང་བྱས་ཐལ།
འཆི་བ་དང་འཆི་བདག འཆི་བའི་ཐོ་གཞུང་གསུམ་པོ།
བདག་གི་ཉེ་བར་བཅར་བའི་མ་བོས་མགྲོན་པོ་རུ་འབོད།
ཡང་གཅིག་བཤད་ན། ང་རང་འཆི་བདག་གི་མགྲོན་པོ་ཡིན།
སྐྱེ་བ་བཀྲ་ཤིས་ཡིན་ན། འཆི་བ་སྣ་ནག་མ་ཡིན་པས།
བཀྲ་ཤིས་དང་སྣ་ནག་མ་གཉིས་ཀྱི་བུ་སྐལ་ང་རང་ལོས་ཡིན།
༢༠༢༥-༡༠-༢༨
རེས་གཟའ་མིག་དམར།
ཟླ་བཅུ་པའི་ཟིན་ཐོ།(༢༩)
སྐྱེ་བ་མེད་ཅིང་འཆི་བ་མེད།
འཆི་བ་མགོ་ཐོག་ཏུ་སླེབ་ཡོང་ཞེས།
སྡུག་སྐད་ཀྱིས་རི་གྲོང་བཀང་ཡང་ཕན་པ་མེད།
མ་གཞི་ནས། འཆི་བ་ནི་རྒྱང་རིང་དུ་མ་མཆིས་ཏེ།
རང་ཉིད་དང་འབྲལ་མེད་དུ་འཇབ་ཀྱིན་འགྲོགས་ཀྱིན་ཡོད།
འཆི་བར་འཇིགས་པ་ལ་ཚོད་ཅིག་མེད་པ་བདེན་ཡང་།
ཁ་ཕོ་ཞེ་སྡང་གི་ཨམ་གཙིགས་དྲག་ཏུ་བསྡམས་ནས།
བཀའ་གདམས་པའི་གླེན་རྟགས་ཀྱི་གཏད་ས་བཞི་པོ་ནི།
རྣ་རྒྱབ་ཀྱི་ལྷགས་རླུང་རང་དུ་བརྩིས་ཏེ་དོར་བ་སྨོས་ཅི་དགོས།
ནམ་འཆི་ཆ་མེད་དང་འཆི་རྐྱེན་ངེས་མེད་བསམས་ཏེ།
འཚོ་བའི་མཛེས་པ་མི་སྡུག་པའི་མི་སྡུག་པར་གྱུར་སོང་ན།
སུ་ཞིག་ལ་མ་ཉེས་ཁག་གཡོགས་བྱ་དགོས་པ་རེད།
སྐྱེ་བ་མེད་ཅིང་འཆི་བ་མེད།
སངས་རྒྱས་མེད་ལ་སེམས་ཅན་ཡང་མེད།
ཡིན་ནའང་། འཇིགས་སྐྲག་གི་ཚོར་བ་ཡོད།
དེའི་རྒྱུ་མཚན། དོན་དམ་ལས་ཀུན་རྫོབ་ལ་ཉེ་བས་སོ། །
༢༠༢༥-༡༠-༢༩
རེས་གཟའ་ལྷག་པ།
ཟླ་བཅུ་པའི་ཟིན་ཐོ།
བར་དོ་བ།
ནམ་ལངས་ཡོས་ཀྱི་དུས་ཚོད་དུ།
བདག་གི་དབུགས་མཇུག་ཡོངས་སུ་ཆད་སོང་།
གང་ལའང་ཐོགས་འགོར་མེད་པའི་རྣམ་ཤེས་འདི།
མཐོ་ནམ་མཁའི་དབྱིངས། དམའ་རྒྱ་མཚོའི་གཏིང་།
ཕྱོགས་བཅུར་འཕུར་བའི་གཤོག་ཐོགས་ཤིག་ཏུ་གྱུར།
སྔ་མའི་ལུས་པོ་སྦྲུལ་ཤུན་ལྟར་བསྐྱུར་ཅིང་།
ཕྱི་ལུས་འཐོབ་པའི་ཞེ་འདང་མ་མཆིས་པར།
བར་དོ་བ་ཞིག་ལ་འགྲུལ་བཞུད་ཀྱི་གོ་སྐབས་ཐོབ་པ་ནི།
བསོད་ནམས་རྒྱ་ཆེན་པོ་བསགས་པའི་རྟགས་ཤིག་ཏུ་འཁུམ།
ང་རང་ཆེས་དགའ་སའི་སྙིང་ཉེ་མའི་ཉེ་སར་བཅར་ཏེ།
མོ་རང་གི་ཁྱོ་ག་དེ་ལ་མཆིལ་ཞགས་ཡིད་ཚིམ་པ་ཞིག་བཏབ།
གྲོགས་དང་གཉེན་ཉེ་ཚོའི་ངོ་གདོང་ནག་རོག་གེར་གྱུར་ཅིང་།
ཁོ་རང་འཆི་རྒྱུ་སྔ་སོང་ཟེར་བ་དང་། ཁོ་རང་ལ་དད་པ་མེད་ཀྱང་།
ང་ཚོའི་ངོས་ནས་མ་ཎི་བསྔོ་སྨོན་རེ་བྱ་རྒྱུ་ལས་ཐབས་མི་འདུག་ག
གང་ལྟར་ཡང་། ཁོ་རང་གློ་བུར་དུ་ཚེ་ལས་འདས་སོང་ཟེར།
རྣམ་རིག་སྔར་ལས་གསལ་ཞིང་འགྲོས་མགྱོགས་པའི།
བར་དོའི་འགྲུལ་བཞུད་འདི་སྐྱིད་སྣང་གིས་མཛེས་པ་ཞིག་རེད།
མ་གཞི་ནས་ཁེར་ཆད་དུ་ཉུལ་རྒྱུ་གོམས་ཡོད་པའི་དབང་གིས།
འགྲོ་རོགས་བཟང་པོ་ཞིག་གི་གླུ་དབྱངས་ལ་མི་རེ་ཞིང་།
མིའི་སྤྱི་ཚོགས་སུ་གནས་སྐབས་རིང་གི་འགན་ཁུར་མེད་པ་སྟེ།
ཕར་བསྟུན་ཚུར་བསྟུན་གྱི་སེམས་ཁྲལ་མེད་པ་འདི།
རང་སྣང་གང་དྲན་གྱི་འགྲོ་བདེ་འདུག་སྐྱིད་ཅིག་རེད་ཡ།
༢༠༢༥-༡༠-༣༠
རེས་གཟའ་ཕུར་བུ།
ཟླ་བཅུ་པའི་ཟིན་ཐོ།(༣༡)
དམྱལ་ཁམས་ཀྱི་ངོ་ལོག
སྐད་ཆའི་མགོ་དང་ཞེ་ཚིག་མེད་པར།
ཆོས་རྒྱལ། ང་འབོད་འགུག་བྱེད་དོན་ཅི།
ལོ་ཉུང་འདི་འདྲ་ཡིན་དུས་བཀའ་ཕབ་པ་ནི།
ཕྱོགས་ལྷུང་རིས་ཆད་ཀྱི་ནག་ཉེས་འཛུགས་སྟངས་ཤིག་སྟེ།
ཁྱོད་སངས་རྒྱས་ཀྱི་ངོ་བོ་ཡིན་པ་ཡིད་ཆེས་མི་བྱེད་དོ་ལབ་བཞག
གཤིན་རྗེའི་རྒད་པོ་གཡས་བརྐྱང་གཡོན་བསྐུམ་དུ་བསྡད་དེ།
ཨ་ཕོ། ཁྱོད་རྩྭ་ཐང་གི་ངན་པ་ལང་ཤོར་ཞིག་ཡིན་པ་བདེན་ཡང་།
ས་འདི་དམྱལ་ཁམས་བཅོ་བརྒྱད་ཀྱི་བསྟི་གནས་ཡིན་པས།
བུ་བཟང་ངན་ག་ལེར་བལྟས་ན་སྒེར་ཚུགས་ཡོད་མེད་མངོན་ཡོང་།
ཁྱོད་ཉེས་ཅན་མ་ཟད་ནག་ཉེས་ལྕི་བ་ཞིག་ཡིན་སྟབས།
ཞག་ཞེ་དགུ་མ་ལོན་སྔོན་དུ་དམྱལ་བར་ཤར་སེར་ཁྲིད་བཅུག་པ་ནི།
མི་དགེ་བཅུ་དང་མཚམས་མེད་པའི་ལས་ལྔ་བསགས་པའི་འབྲས་བུ་རེད།
ང་ན་རེ། ཧེ་ཧེ།
བཅུའི་སྟེང་དུ་ལྔ་བསྣན་པ་ནི།
གྲངས་ཀ་རྩི་སྟངས་ཙམ་རེད་ཡ།
འཆི་མེད་རྒས་མེད་ཀྱི་རྒད་པོ་ཁྱོད།
འོས་འདེམས་ཀྱི་ལམ་ནས་ལས་འཁྱུར་ངལ་གསོ་མ་བྱས་ན།
ཆགས་སྒོ་ཆེན་པོ་འབྱུང་རྒྱུ་ནི་དུས་ཚོད་ཀྱི་སྔ་ཕྱི་ཙམ་རེད་ལབ་དུས།
གཤིན་རྗེའི་གཞལ་ཡས་ཁང་དུ་བྲག་ཆ་འཁོར་ནས།
རྡུལ་གྱི་ཆར་པ་བར་མེད་དུ་བབས་སོང་།
ང་སངས་རྒྱས་སྒེར་གཅོད་པ་ཡིན་ན་ཆོག
ཁྱོད་སེམས་ཅན་མ་རུངས་པ་ཞིག་རེད།
ཨ་ཝ་གླང་མགོ། འདི་དམྱལ་བ་མནར་མེད་དུ་སྤྱུགས་ཏེ།
སྡུག་སྦྱོང་ཚད་མེད་མྱོང་དུ་ཆུག་ཅེས་ཆེེད་མངགས་བྱས།
ཨ་ཚ་ཚ། ཨ་ན་ན།
ཨ་ར་ར་ར་ར་ར་ར།
བླ་མ་ཆོས་རྒྱལ་ཆེན་པོ།
སངས་རྒྱས་ཆོས་རྒྱལ་ཆེན་པོ།
ཆོས་ཀྱི་རྒྱལ་པོ་ཆེན་པོ་སྲིད་འཛིན་ལགས།
དགེ་འདུན་གྱི་སློབ་དཔོན་ཆེན་མོ་ཁྱེད།
ང་གུ་ཡངས་སུ་གཏོང་རོགས་རྒྱལ་པོ་ཆེན་པོ་ཀྱེ།
མི་མངོན་པའི་དབྱིངས་ནས།
དུག་གསུམ་ལ་སྐྱབས་སུ་སོང་ཞིག་ཅེས་གྲགས།
ཨ་མ་འདོད་ཆགས་ལ་ཕྱགས་འཚལ་ལོ། །
ཨ་ཕ་ཞེ་སྡང་ལ་ཕྱག་འཚལ་ལོ། །
ཆུང་མ་གཏི་མུག་ལ་ཕྱག་འཚལ་ལོ། །
བུ་རྒྱུད་ཕྲག་དོག་ལ་ཕྱག་འཚལ་ལོ། །
གཉེན་ཚན་ང་རྒྱལ་ལ་ཕྱག་འཚལ་ལོ། །
དགྲ་བོ་སངས་རྒྱས་ལ་ཕྱག་འཚལ་ལོ། །
ཡང་དགོས་གཤིན་རྗེའི་སྒེར་གཅོད་པ་ལ་ཕྱག་འཚལ་ལོ། །
མདོར་ན། སེམས་ཅན་སངས་རྒྱས་དབྱེར་མེད་ལ་ཕྱག་འཚལ་ལོ། །
ཧིན། ཧིན།
ཁྲེལ་མེད།
རྐྱལ་སྟོང་།
བསོད་ཟད་པོ།
ད་གང་དུ་འགྲོ་འདོད་ན་རྒྱུགས་ཤིག
ངོ་དམྱིག་གིས་མི་རིག་རྒྱུ་ཁྱོད།
མ་རབས། ཐ་ཤལ་བ།
ད་ལྟ་རང་ནས་རྒྱུགས་ཤིག་ཟེར།
ཧུན། ཧུན།
ང་གང་དུ་འགྲོ།
གཞིས་ཆགས་ནས།
མི་ཡུལ་དུ་སྡོད་སྐབས་སུ།
བཀའ་ལོག་བྱས་ནས་འཁྲིད་མཁན་ཁྱོད་རང་རེད།
ད་ང་འགྲོ་ས་མེད། འདིར་བསྡད་དེ་ངོ་ལོག་བྱ་རྒྱུ་ཡིན།
འཆི་མེད་རྒས་མེད་ཀྱི་རིལ་ནག་ང་ལ་སྤྲད་དགོས།
ང་རྒྱལ་པོ་ཡིན། གཤིན་རྒྱལ་གསར་པ་ཡིན།
ཉེས་ཅན།
ཐག་དྲུད་ཁྱོད།
དག་པའི་ཞིང་ཁམས་དང་།
མཐོ་རིས་ཀྱི་གནས་གང་དུ་འགྲོ་འདོད་ན་སོང་།
འགོར་འགྱང་བྱས་ན་སླར་ཡང་མནར་མེད་དུ་འདེད་ངེས་ཡིན།
ཧུ་ཧུ།
ང་འགྲོ་ས་འཁོར་བའི་གནས་ཡིན།
ལྔ་གསུམ་བཅོ་ལྔ་པོ་ཤུལ་དུ་བསྐྱུར་ཡོད།
ད་བདེ་མོ་བྱོས། རྒན་འཁོགས་བདེ་བར་བཞུགས་ཞེས།
ལྭ་བའི་ཐུ་བ་གཉིས་སྤྲུག་གིན་སྤྲུག་གིན་ལམ་དུ་ཆས་བཞག
༢༠༢༥-༡༠-༣༡
རེས་གཟའ་པ་སངས།
