རང་གི་མི་ཚེའི་ཁ་ལོ་བ་རང་ཉིད་ཡིན་ཤག་ཤག་གིས

ཐག་གཅོད་དང་བློས་གཏོང་གིས་འཚོ་བཞིན་ཡོད།

ཞོགས་ཟས་ཟ་སྐབས་སུ  

མི་ཞིག་གསར་དུ་ངོ་ཤེས་པ་མ་ཟད

ངའི་ཞོགས་ཟས་ཀྱི་རིན་པ་དེའང་བྱིན་ཚར་འདུག

ཞོགས་ཟས་གོང་བདེ་སྤར་བ་གང་དེ་ཟོས་ཚར་མཚམས་སུ

མ་བསམས་བཞིན་དུ་མི་ཚེའི་བསླབ་བྱ་ཞིག་ཀྱང་གནངས་སོང་།

དངོས་གནས་བཤད་ན 

ང་རང་གི་མི་ཚེའི་དམིགས་འདུན་དང་འཚོ་བའི་གདམ་ག་དེ

ངས་སྔོན་མ་ནས་ཐག་བཅད་དེ་ད་ལྟར་ལམ་ཁར་ཡོད

རེད་དེ  མ་བསྐུལ་མ་དྲིས་ཀྱང་བསླབ་བྱ་གནངས་པར

ཕྲན་ཆུང་གིས་ལན་འདེབས་བྱས་ན་གོ་བ་ལོག་སྲིད་པས

བདེན་བརྗོད་ཀྱིས་མགྱོགས་པོར་ཁ་བྲལ་ཐབས་བྱས།

ལམ་ཁ་དེར

ངའི་མིད་པ་དོག་མོ་ནས

ཞོགས་ཟས་སྤར་གང་དང

བསླབ་བྱ་འདོམ་གང་ཞེས་པ་ལུད་སོང་།

ངས་བཟོད་སྒོམ་དང་བསམ་གཞིགས་བྱེད་མ་ཐུབ་པ་མིན

གང་ཡིན་ཞེ་ན  འུ་ཅག་གི་མི་རྒན་ཚོ་ལམ་སྟོན་དགའ་བ་དེ

དུས་རབས་འདིའི་སེམས་ཁམས་སུ་འོས་པ་ཞིག་ཡེ་ནས་མ་རེད

དེས་ན  ངོ་ཤེས་དང་མི་ཤེས་པའི་མཚམས་སུ

བསམ་ཚུལ་ལས་འདས་པའི་སློབ་སྟོན་གནང་རྒྱུ་ནི

ཉམས་མྱོང་གིས་མ་འདང་བའི་ཨུ་ཚུགས་བཙན་པོ་ཞིག་རེད་ཨང་སྙམ།

སྤྱིར་ན་ཀུན་སློང་ལ་རག་ལས་པ་བདེན་མོད་ཀྱང

རིན་ཐང་ལྟ་ཚུལ་བསྒྱུར་དགོས་ཟེར་ན་དཀའ་མོ་ཡིན།

མི་རབས་གསར་རྙིང་གི་བར་ཐག་ནི

རང་རང་ལ་རིན་ཐང་འཇོག་སྟངས་རེ་ཡོད་པར་བརྟེན

མི་མཐུན་པའམ་འགལ་བའི་ས་མཚམས་འབྱུང་གི་ཡོད།

༢༠༢༥-༡༢-༢༩

རེས་གཟའ་ཟླ་བ།

ཤགས་འགྱེད།