སྟོན་ཁའི་སྤྲིན་དཀར་དང་མཚུངས་ཤིང་།།
མཚན་གུང་སྐར་ཚོགས་ལ་འགྲན་པའི།།
ལུག་ཁྱུ་མེ་ཏོག་གི་ཚོམ་བུ།།
བཀྲ་ཤིས་གཡང་འཁོར་གྱི་ནོར་བུ།།

ས་ཆུ་རི་གསུམ་གྱི་བླ་སྲོག།
འཚོ་བའི་གཞི་རྟེན་གྱི་མ་རྐང་།།
འབྲོག་པའི་ཚེ་ལྷ་དང་འདྲ་བའི།།
གཡང་དཀར་ལུག་ཁྱུ་དེ་ཡོད་ན།།

རི་འདབས་ལུག་ཁྱུ་ཡིས་གཡོགས་ན།།
ས་ལ་བཀྲ་ཤིས་ཀྱི་དགེ་མཚན།།
ལྷས་ར་ལུག་ཁྱུ་ཡིསལ་ཁེངས་ན།།
འཚོ་བའི་བདེ་སྐྱིད་ཀྱི་སྔོན་རྟགས།།

རི་ཆུ་ནགས་གསུམ་གྱི་ཀློང་ནས།།
རྟ་ནོར་ལུག་གསུམ་གྱི་ཁྲོད་ནས།།
ལུག་གི་ཚེ་ཐག་དེ་ཐུང་སོང་།།
འབའ་སྒྲ་དུང་སྐད་དེ་ཆད་སོང་།།

འཚོ་བ་སྟབས་བདེ་ལ་དགའ་ནས།།
ལུག་ཁྱུ་འཚོ་སྐྱོང་ལ་མ་དགའ།།
གཡང་ལུག་རྒྱ་ལག་ལ་བཞག་ནས།།
རང་ས་སྐྱ་ཁོག་གི་བཏང་སོང་།།

རི་འདབས་སྤྲིན་དཀར་གྱི་ཁ་བཏགས།།
ཁ་བ་བུ་ཡུག་གིས་ཟད་སོང་།།
སྤང་ཐང་མེ་ཏོག་གི་ཚོམ་བུ།།
དབྱར་ནག་ཚ་བ་ཡིས་སྐམ་སོང་།།

རྒན་གྱའི་སྤང་ཐང་གི་གཡང་ལུག།
འབྲོག་པའི་ལག་མཐིལ་ནས་ཚར་སོང་།།
གཡང་དཀར་དུང་དཀར་གྱི་འབའ་སྒྲ།།
འབྲོག་པའི་རྣ་ལམ་ནས་ཡལ་སོང་།།

སྔོ་ལྗང་སྤང་ཐང་དང་རྩྭ་ཐང་།།
ས་ནག་རྡུལ་ནག་ཏུ་གྱུར་སོང་།།
ཁ་ཞག་སྣུམ་ཞག་གི་འཚོ་བ།།
གོ་རེ་སྐྱ་ཐོ་ཡི་བཏང་སོང་།།

གཡང་དཀར་ལུག་རྫི་ཡི་ལ་གཞས།།
བུ་མོའི་ངག་སྒོ་ནས་ཆད་སོང་།།
ལུག་ལ་དཔེ་བཞག་གི་གཏམ་དཔེ།།
རྒན་པོའི་ཁ་ནང་ནས་ཚར་སོང་།།

འཚོ་བ་ཉམས་ཆག་གི་སྟེང་ལ།།
རིག་གནས་ཉམས་ཆག་ཏུ་བཏང་ན།།
རྒན་གྱའི་གངས་ཕྲུག་གི་མིག་ནས།།
མཆི་མ་ཤམ་ཤམ་དུ་བཞུར་སོང་།།

རང་ས་ལག་མཐིལ་དང་འདྲ་བོར།།
ལུག་གིས་བདེ་མོ་རང་བཞག་ན།།
ལུག་རྫི་རྒད་པོ་ཡི་སྐྱོ་གླུ།།
མིག་ཆུས་བྲན་པ་ནི་ལས་བྱེད།།

འབྲོག་པ་ཕྱུག་ཟོག་གིས་བསྐྱངས་ཀྱང་།།
འབྲོག་པས་ཕྱུག་ཟོག་ནི་བཙོངས་སོང་།།
ལག་རྟེན་ལག་པ་ཡིས་གཡུགས་པས།།
ལག་སྟོང་མཆན་སྟོང་དུ་གྱུར་སོང་།།

རྒན་གྱའི་གངས་ཕྲུག་ཏུ་འབོད་པས་གོང་གསལ་གོ་བདེ་ཞིག་འབྲི་རོགས་ཞེས་སྐུལ་ངོར། ༢༠༢༤/༠༣/༡༠

2024-03-23 ཤེད་བུ!

ཤགས་འགྱེད།