འབའ་སྲས།
བཀླགས་གྲངས། 753
མི་རྒན་ཚེ་མཇུག་འདྲ་བའི་གྲོས་ཚོགས་ལ་ལྟ་དུས།
མགྱོགས་འཕྲིན་སྐད་འཕྲིན་ནང་གི་ཚོང་བ་ཚོ་དྲན་བྱུང་།།
ཕོ་གསར་གོས་དཀར་གྱོན་པའི་གོང་བ་ལ་ཆགས་པའི།།
ཁ་བ་ནམ་ཞིག་བཞུ་ལ་སེམས་འཚབ་རང་སྐྱེས་སོང་།།
སྡོང་ལོ་སེར་པོ་ཆགས་པའི་སྐྱིད་སྡུག་དེ་མི་གླེང་།།
ཁ་དང་སྣ་ཡི་ཆེ་ཆུང་ཡང་ཡང་དུ་རྩོད་པའི།།
རི་འདབས་གྲིབ་མ་གྱོན་པའི་གྲོས་ཚོགས་ལ་ལྟ་དུས།།
སྒྲོལ་མའི་སྒོ་དར་རླུང་གིས་ཁུར་བ་དེ་དྲན་བྱུང་།།
ཟླ་མེད་གཏམ་རྒྱུད་ནང་གི་འབངས་ཁོལ་དང་འདྲ་ཞིང་།།
གེ་སར་སྒྲུང་གི་ཨ་ཁུ་ཁྲོ་ཐུང་དང་མཚུངས་པ།།
ལོ་མ་སེར་པ་བཞད་པའི་ཆུ་ཤིང་དག་མཐོང་ན།།
བདག་གི་ཁྱིམ་ན་ཡོད་པའི་གླང་དམར་དེ་དྲན་བྱུང་།།
གད་སྙིགས་ཞེས་པའི་སྒྲུང་གཏམ་གྲགས་ཆེན་དེ་ཀློག་ཞོར།།
དཔྱིད་དཔལ་རྒྱས་པའི་མེ་ཏོག་འཛུམ་བརྒྱ་ལ་ལྟ་ཞོར།།
སྤྱི་ཚོགས་ཀུ་རེ་རྩེས་པའི་རྩྭ་ཤིང་ཚོ་མཐོང་ན།།
བདག་གི་ཁྱིམ་གྱི་མ་མོ་གཟའ་རོ་དེ་དྲན་བྱུང་།།
བྲང་གཞུང་ཚ་བོ་ངོས་ཀྱི་མེ་དྲོད་ནི་ཉམས་ཤིང་།།
རུམ་ཁ་དྲོན་པོ་སྟེང་གི་དུང་གཤེར་ནི་སྐམ་པའི།།
གློག་གི་འཕྲུལ་ཆས་འདྲ་བའི་གཏོར་མགོ་ཚོ་མཐོང་ན།།
བདག་གི་ཁྱིམ་གྱི་རླངས་རྫས་དམར་པོ་དེ་དྲན་བྱུང་།།
རྒྱལ་ཁབ་གསུམ་གྱི་དཔའ་རྒོད་ཚའོ་ཚའོ་དང་འདྲ་ཞིང་།།
ཆུ་ངོགས་གཏམ་རྒྱུད་ནང་གི་ལོས་ཁྲུང་དང་མཚུངས་པ།།
དྲང་བདེན་སྤྱི་སྙོམས་སེམས་དང་ལག་པ་གཉིས་རིང་བ།།
བྱ་ཆེན་ཁྱུང་ཁྱུང་འདྲ་བ་དེ་དག་ལ་ཕྱག་འཚལ།།
གྲོད་ཁོག་ལུག་ལུག་ཕྱོགས་ཞེན་རླངས་དབུགས་ཀྱིས་ཁེངས་ཤིང་།།
སྐྲ་མེད་ཀླད་པ་འཐེན་ཁྱེར་ཁུག་མ་རུ་གྱུར་པའི།།
ཆད་ནད་འགོས་པའི་དབེན་པའི་ཆུ་ཤིང་གི་མེ་ཏོག།
ད་ནི་རྟེན་སྐལ་མི་བྱེད་གཏོར་ཟློག་ཏུ་བརྫངས་འཇོག།
༢༠༢༤/༠༣/༢༩
