དྲིན་ཆེན་ཕ་མ་ཡིས་མིང་ལ་རྟ་མགྲིན་བཏགས།།
རྩ་བའི་བླ་མ་ཡིས་བསམ་གཏན་རྒྱ་མཚོ་གསོལ།།
འབའ་སྲས་སྙུག་མིང་ནི་རང་གིས་རང་ལ་བཏགས།།
སྣ་ཚོགས་མིང་ཅན་ནི་ཁྱམས་རའི་སྙན་ངག་པ།།

ཁ་སྒང་སྡེ་བ་ནས་ཀ་ཁ་ག་ང་སྦྱངས།།
སུམ་མདོ་རྫོངས་ཐོག་ནས་སུམ་རྟགས་དག་གསུམ་བསླབས།།
བླ་བྲང་དགོན་པ་ནས་ཨ་བོ་ཨ་ཁུ་བྱས།།
ལྡི་ཚ་དགོན་པ་ནས་རྭ་བསྡུས་བསེ་བསྡུས་བརྩད།།

ཁ་སྒང་སློབ་ཆུང་ནས་དུ་བ་དུ་སྣེ་བརྩད།།
མི་རིགས་སློབ་འབྲིང་ནས་དགའ་ས་མཐུན་ས་བརྩད།།
ཟི་ལིང་གྲོང་ཁྱེར་ནས་ཅ་ལག་རིན་གོང་བརྩད།།
ཉི་མ་ལྷ་ས་ནས་ཇོ་མཇལ་སྔ་གཞུག་བརྩད།།

ཟི་ལིང་བསླེབས་མ་ཐག་རྒྱབ་ཀྱི་ཅ་ལག་བོར།།
གོར་མོའི་མེ་འཁོར་ནང་ལག་གི་སྒོར་མོ་བོར།།
ནགས་ཆུ་རྒྱུད་སྐབས་སུ་ཁ་ངོ་ནག་པོ་ཆགས།།
ལྷ་སར་འབྱོར་མ་ཐག་ཨ་ཁུའི་སྡོམ་པ་ཤོར།།

བླ་བྲང་བུ་མོ་ཡིས་བླ་བྲང་ལོག་འགྲོ་ཟེར།།
ལྷ་སའི་ཨ་ཅག་གིས་ལྷ་སར་བཞུགས་རོགས་ཞུས།།
ཆུང་མ་གཉིས་ལེན་ནི་རང་ཡུལ་མི་དཔེ་པས།།
ཨ་མདོའི་ཨ་བོ་ང་རྒྱ་གར་ཡུལ་ལ་བྲོས།།

རྩམ་ཁུག་ཆུང་ཆུང་ནང་རྩམ་པ་གང་བརྫངས་ཤིང་།།
ཀོ་ལྷམ་བདེ་བོ་ཞིག་རྒྱབ་ཁུག་ནང་བཅུག་ནས།།
གློ་གྲི་ཐུང་ཐུང་ཞིག་བརླ་ཡི་ཟུར་སྣུར་ནས།།
ཉི་མ་ཉི་ཤུའི་ནང་རྒྱ་གར་འབྱོར་སོང་ང་།།

རྡ་སར་སླེབ་མ་ཐག་དགའ་སྤྲོའི་ཡིད་དབང་ཤོར།།
བླ་མར་མཇལ་མ་ཐག་དད་པའི་མིག་ཆུ་ཤོར།།
ཨ་ཁུའི་སྡོམ་ངན་དེ་ཤོར་བའི་བཀའ་དྲིན་ལ།།
ཐམས་ཅད་མཁྱེན་པ་ལ་མཇལ་ཐུབ་དོན་ཆེན་ཡིན།།

ཅི་ཙམ་་དགའ་ན་ཡང་སྡུག་ཅིག་ཡོད་ཐག་ཆོད།།
ཉི་མ་ནུབ་རྗེས་སུ་མཚན་མོའི་མུན་པ་བཞིན།།
འཚོ་བའི་དཀའ་ངལ་ཐོག་མཆིན་པའི་ན་ཚ་འཕོགས།།
ཅུང་ཙམ་མིན་ན་ང་ལྔ་བའི་ལམ་དུ་བརྫངས།།

སྐྱེས་པ་སྔོན་མ་ཡི་ཚོགས་བསགས་ཡིན་ནམ་ཅི།།
གཤིན་རྗེ་རྗེ་བོ་ལ་དགོས་མཁོ་མེད་དམ་ཅི།།
འཆི་ན་འདོད་ན་ཡང་མ་ཤི་ཚེ་ཐར་ང་།།
སྡུག་དང་དཀའ་ལས་གཉིས་མྱངས་པ་ཉུང་ཉུང་མིན།།

ཀ་རྡོར་སྒང་གསུམ་ནས་ཀ་ར་ཀོ་རེ་བཙོང་།།
མན་ལོར་སྲང་ལམ་ནས་ཤ་ཡི་མོག་མོག་བཙོང་།།
ར་བདེ་ཀ་གསུམ་ནས་ར་མའི་རུམ་གདན་ཐགས།།
ཉིན་རེའི་འཚོ་བ་ཡི་ཡོང་སྒོ་འདི་ནས་བཙལ།།

མི་ཚེའི་འགྱུར་ལྡོག་ནི་སྐད་ཅིག་མ་ཞིག་རེད།།
འཚོ་བའི་ཡོང་སྒོ་ཡང་ད་ད་ད་ཞིག་རེད།།
རྒྱན་འཇོག་ལྟ་བུ་ཡི་མི་ཚེའི་འཚོ་བ་ཡི།།
སྐྱིད་པའི་ཉི་མ་ནི་ཤར་བ་འདི་ནས་བརྩམས།།

ཤེས་རབ་དགའ་ཚལ་གྱི་དགེ་རྒན་ལྷག་བསམ་ཅན།།
ཙོང་ཁ་ཟ་ཁང་གི་སྦྱིན་བདག་སྒོར་མོ་ཅན།།
ཡར་འགྲོ་མར་འགྲོ་ཚོས་བརྩི་བཀུར་བྱེད་པ་ཅན།།
ཨ་མདོའི་ཨ་བོ་ང་ཚང་མས་ཡར་ལ་འཇོག།

རྐང་པའི་བརླ་བར་ན་སྦག་པ་དཀར་པོ་ཞིག།
རྣ་དང་ལག་བར་ན་ཁ་པར་དམར་པོ་ཞིག།
རྒྱབ་ལ་ཁུར་བ་ནི་ཀོ་ཁུག་ནག་པོ་ཞིག།
མཛེས་མའི་མིག་ལམ་ན་ཕོ་གསར་རྫིག་པོ་ཞིག།

ཧྥ་གོ་པ་ལེ་ན་ང་ལ་སློབ་གྲྭ་ཞིག།
བོད་ཡིག་སློབ་པ་ཡི་ང་ལ་སེམས་ཤུགས་ཤིག།
བོད་སྐད་བོད་ཡིག་གི་དོན་ལ་ཐུག་སོང་ན།།
ཁྱམས་རའི་རྒད་པོ་ང་འཆི་ཡང་འགྱོད་པ་མེད།།

ཁྱམས་རའི་སྙན་ངག་པའི་ལོ་རྒྱུས་སྤྱི་བཤད་དེ་ལེའུ་གཉིས་པའོ།། །།

ཤགས་འགྱེད།