སློབ་གྲྭར་ཐོག་མར་འགྲོ་དུས་བོད་རིགས་ཡིན།།
སློབ་ཐར་ཕྱིན་ནས་ཡོང་རྗེས་བོད་ལོག་ཡིན།།
བོད་ཀྱི་ཆ་ལུགས་འགྱུར་པའི་བོད་པའི་བུ།།
ཤེས་ཡོན་ཅན་དུ་གྱུར་ཀྱང་དགའ་བ་མེད།།

སློབ་གྲྭར་མ་སོང་ཕ་མར་བརྩི་བཀུར་ཆེ།།
སློབ་གྲྭ་ཐོན་རྗེས་ཕ་མར་མིག་ལོག་ཆེ།།
ཡི་གེ་ཤེས་ཀྱང་ཕ་མ་བརྗེད་སོང་བའི།།
བུ་ཕྲུག་དྲིན་ཤེས་མེད་པ་འདི་ཚོ་སྡིག།

སློབ་གྲྭར་འགྲོ་དུས་ཡ་རབས་སྤྱོད་བཟང་ཡིན།།
སློབ་ཐར་ཕྱིན་རྗེས་ངན་གོམས་སྐྱག་ལངས་ཡིན།།
ཆ་ལུགས་སྤྱོད་པའི་ནང་ན་ཕྱི་ལུགས་མང་།།
སྐད་ཆ་ཚིག་གཅིག་ནང་ན་སྦྲགས་སྐད་མང་།།

སློབ་གྲྭར་འགྲོ་དུས་རྩམ་པ་འཁུར་ནས་སོང་།།
སློབ་ཐར་ཕྱིན་རྗེས་རྩམ་པ་གཡུག་ནས་ཡོང་།།
རྩམ་དྲི་བོད་དྲི་མི་བྲོ་སློབ་ཐོན་པ།།
བརྒྱ་ཕྲག་སྟོང་ཕྲག་བྱུང་ཡང་དགོས་པ་ཅི།།

དཀའ་ལས་སྡུག་ལས་ཐུབ་པའི་བུ་མོ་དེ།།
སློབ་ཐར་ཕྱིན་རྗེས་ལེ་ལོ་ཅན་དུ་གྱུར།།
ཡ་རབས་འདུད་ཚུལ་ཤེས་པ་མེད་པའི་ཐོག།
མ་རབས་གོམས་གཤིས་མང་བ་འགོས་ནས་ཡོང་།།

རྟ་མཆོག་ཁ་ལོ་འདུལ་མཁན་བུ་རྒོད་དེ།།
སློབ་ཐར་ཕྱིན་རྗེས་ཕག་པ་ཞིག་གི་གྱུར།།
ལྟོ་འདོད་ཆེ་ཡང་ལས་འདོད་མེད་པ་ཡི།།
རྣ་བ་འཁོར་ལོ་ཅན་དང་གཅིག་ལ་གཅིག།

སྐད་འཕྲིན་མགྱོགས་འཕྲིན་ནང་ན་ཁྱི་སིག་སིག།
རང་གི་ཁྱིམ་ཚང་ནང་ན་རྒྱ་འདུག་འདུག།
ཚེགས་མེད་སྒོར་མོ་ཐོབ་ན་དགའ་ཀྲོག་ཀྲོག།
ཉིན་མཚན་ལས་ཀ་མེད་ན་སྤྲོ་ལྷང་ལྷིང་།།

སྒོར་མོ་ཡོད་ན་དེ་ཡི་རྗེས་སུ་འབྲང་།།
དཔོན་ས་མཐོ་ན་དེ་ལ་ཞབས་ཞུ་སྒྲུབ།།
ཕ་མ་གཉིས་ལ་གཅེས་སྐྱོང་མི་བྱེད་པའི།།
ཉེ་རབས་སློབ་ཐོན་སློབ་མ་ཇེ་མང་རེད།།

བུ་དང་བུ་མོ་སློབ་གྲྭར་མ་བསྐྱལ་བར།།
གྲྭ་དགོན་ཇོ་དགོན་ཞིག་ལ་མངགས་ཡོད་ན།།
ཤེས་ཡོན་འབྱོར་ལ་ཆ་ལུགས་མི་འགྱུར་ཞིང་།།
མི་གཤིས་ཚད་མཐོ་འགྲིམ་པ་ཐག་གིས་ཆོད།།

དྲང་བདེན་བརྩི་བཀུར་བརྩོན་འགྲུས་ཅན་ཡོན་ཏན།།
ཆ་ལུགས་མི་འགྱུར་ལྷག་བསམ་གོང་དུ་འཕེལ།།
རང་གི་རིགས་ཀྱི་ངོ་གདོང་འཛིན་ཐུབ་ན།།
གྲྭ་ལོག་ཇོ་ལོག་བྱས་ཀྱང་འཕྱ་དམོད་མེད།།

༢༠༢༤/༠༤/༡༤ ནམ་ལངས་ཁར།

ཤགས་འགྱེད།