ངག་རིག་ངག་གི་ཐ་སྙད་རྨོངས་པའི་བུ།།
སྲིད་པ་མི་ཡི་འགྲོ་ལུགས་རྫོགས་པའི་མི།།
ཕར་འགྲོ་བསྡད་ཤུལ་རང་གཟུགས་ཆད་སོང་བའི།།
ཉེ་རབས་སློབ་ཐོན་པ་ཡི་རྣ་བས་ཉོན།།

མཚོ་ཆང་བཏུང་བས་ལག་ལྡན་མྱོས་པ་ལྟར།།
སྲོག་འཛིན་གསེར་གྱི་ཀ་བ་བཤིག་པའི་བུ།།
ངག་རིག་ཉི་ཟེེར་བྱེ་བ་འབབ་པའི་རིར།།
ཞབས་རྟེན་འཁོར་ལོ་བོར་བའི་རྐང་ཐང་བཞིན།།

མན་ཤེལ་ཟླ་བའི་ཟེགས་མ་སྤུངས་པ་ལ།།
གཉིས་འཐུང་ཕྲག་དོག་རྣ་བའི་ཞགས་པ་ནི།།
སྟོབས་ཀྱིས་བསྐྱང་ལ་དཀའ་ཐུབ་མ་བཟོད་པས།།
གཟིག་པགས་གྱོན་པའི་བྱོལ་སོང་སྤུན་ལ་བསུ།།

དྲི་ཞིམ་བསུང་གི་ཞལ་སྐྱེས་ཨུཏྤ་ལ།།
ལང་ཚོ་གསར་བའི་མིག་འདབ་རབ་རྒྱབ་མ།།
ཁྱོད་ཚོ་ཡིན་ན་ཆོག་མོད་མ་ཡིན་པས།།
རྗེས་ཆགས་དཔྲལ་བའི་མིག་གི་ཆུ་འདི་བཞུར།།

རྡོ་བའི་རྣ་ཅན་ལྟོ་ཆས་སྦྱིན་ན་ཡང་།།
ལེ་ལོ་ལས་བཞི་རླུང་གིས་བཅུགས་སོང་བས།།
སེང་གེ་ལྟ་བུའི་གཡུ་རལ་གཡོ་བའི་ངང་།།
གཉིས་འཐུང་ཀླད་པ་འགེམས་པའི་སྙིང་རྩ་ཆུང་།།

གསལ་བྱེད་མེ་ཏོག་ཁ་ལས་འཛུམ་ཙམ་ལས།།
ཤེས་བྱའི་གཏེར་ཡིག་ཕྱི་ཡི་རི་མོ་ཙམ།།
ཕོ་རོག་ཁུ་བྱུག་འགྱུར་ལ་བརྫུ་བ་ཡི།།
རྨ་བྱ་སྒེག་མོའི་ཉམས་ཀྱི་མཐའ་འདི་ཟད།།

ཅི་ཡང་མ་བསྒྲུབས་གྲུབ་པའི་འཇིག་རྟེན་ཞིག།
མཚམས་སྤྲིན་མ་འཐིབས་ཉི་མ་སེར་པོ་ཞིག།
འདོད་པ་རངས་པའི་དེང་གི་སློབ་ཆེན་པ།།
གད་སྙིགས་ཐལ་རླུང་ཁྲོད་ན་རྨི་ལམ་མང་།།

གདོང་དམར་བ་ཡི་གདོང་གི་སྐྱོ་གར་ཞིག།
ལྷོག་ལྷོག་ལྡིང་བའི་སྙིང་གི་ཟུངས་ཁྲག་ཅིག།
ཆག་སྒོ་ཤོར་བར་རུས་པའི་ཁ་སྣོན་ཞིག།
ཡོད་ན་ཨ་མའི་བུ་ཞེས་སྙིང་ལ་རྒྱན།།

གངས་དཀར་ཁ་གདན་རི་བོའི་རྩེར་བཤམས་ནས།།
གཙང་བོའི་འགྲམ་ལ་དར་ཆགས་ངུ་ཤོར་ནས།།
བརྩེ་བའི་རླུང་རླབས་རིགས་ཀྱི་རྗེས་སྙེག་ནས།།
རྒྱང་བཞུད་གོམ་འགྲོས་དལ་ལྷོད་མེད་པར་སྡོངས།།

༢༠༢༤/༠༤/༡༤ ཉིན་གུང་།

ཤགས་འགྱེད།