འཚོ་བ་ཀུ་རེ་ཡིན་པའི་གར་སྟེགས་ནས།།
མི་ཡི་ཚེ་ཚད་བསླུ་བྲིད་ཐེངས་མ་གཅིག།
གས་ཆག་མ་ཤོར་བརྩེ་ལྡན་ཁྱིམ་ཚང་ནས།།
རྨི་ལམ་བཞིན་དུ་ང་ལ་ཁྲིམས་ལུགས་མེད།།

སྐྱེས་པ་ཞིག་གི་སྐྱེ་བ་བླངས་དང་ནས།།
གྲྭ་ལོག་ཅིག་གི་ཞྭ་ནག་གྱོན་དང་ནས།།
ངོ་གདོང་གཅིག་གིས་འདོད་པ་མ་ཚིམས་པས།།
རུས་རྐང་ཁྲག་གི་མཛའ་འཕྲིན་གཞན་པ་སྤྲིངས།།

དྭངས་མོ་མཚོ་ཡི་འཕྲིན་ཡིག་འབྱོར་ཐང་རེར།།
དྲན་པའི་མཆི་མས་གདོང་གི་དྲེག་པ་བཀྲུས།།
གདུང་བའི་དབུགས་རིང་ཤུགས་ཀྱིས་ཤོར་བའི་ཚེ།།
ཁྱམས་རའི་འགྲམ་གྱི་སྡོང་བོའི་ཡལ་ག་འདར།།

ཀླུ་མོ་མཚོ་ཡི་འདྲ་པར་བསྐུར་ཐེངས་རེར།།
འདོད་པའི་རྟ་པོ་བང་དུ་རྩེན་ན་ཡང་།།
སྐར་ཆེན་ལྟ་བུའི་བུ་ལ་འདང་རྒྱག་དང་།།
ཆུང་མ་ལ་ཡང་ཁྲེལ་མེད་མ་བྱས་བཞག།

སྐལ་བཟང་མེ་ཏོག་མཛེས་པ་མཛེས་མའི་རྒྱན།།
རྒྱུ་དང་འབྱོར་བ་ཕུན་སུམ་ཚོགས་པ་ཉིད།།
ཀུན་སྤྱོད་བསམ་བློ་ང་དང་མཐུན་མོད་ཀྱང་།།
ལས་དབང་མེད་པས་ང་ལ་དབང་མ་སོང་།།

མི་ཡུལ་རི་ཚོགས་ཕུ་ནུའི་དབུང་རྡང་དང་།།
མི་ཡི་ཆུ་མོ་མ་སྲུའི་མིག་ཆུ་སྟེ།།
བདག་གི་དོན་ལ་མིག་ཆུ་མ་ཆད་པའི།།
ཤར་པའི་བུ་མོ་དེ་ནི་སྙིང་མ་རྗེ།།

ཕར་ལ་ཤི་འཐེན་རོ་འཐེན་རོ་འཐེན་བྱས་མྱོང་ཞིང་།།
ཚུར་ལ་ང་དགའ་ཁྱོད་དགའ་བཤད་མྱོང་བའི།།
སེམས་ཀྱི་གཏིང་ནས་ད་དུང་བརྗེད་མེད་པའི།།
ཉེ་འགྲམ་བརྩེ་ལྡན་མ་རྣམས་སྐབས་སུ་འཇོག།

ས་དང་ལམ་གྱིས་དེད་ན་ཐག་རིང་ཞིང་།།
སེམས་དང་བརྩེ་བའི་མདུད་པ་ཐག་ཉེ་བ།།
ཉི་མ་རེ་ལ་ཁ་པར་མི་ཆད་པའི།།
བདེ་སྐྱིད་འཚོ་ལ་སྙིང་གཏམ་གློད་མྱོང་མེད།།

དབྱར་ས་བསིལ་དྲོད་མཉམ་པའི་འབྲོག་ས་ནས།།
བརྡ་རྟགས་ཡོད་མེད་གཉིས་ཀའི་ས་མཚམས་ནས།།
སྙིང་གཏམ་ལ་གཞས་བླངས་པའི་འབྲོག་མོ་ཁྱོད།།
ཉི་མཚན་གཉིས་ལ་མ་བརྗེད་གླེང་གི་ཡོད།།

ཕ་ཡུལ་རླུང་གིས་འཁུར་ན་འགྱོད་པ་ཆེ།།
མིག་ཆུ་མཚོ་ལ་འཁྱིལ་ན་སྡུག་བསྔལ་ཆེ།།
སེམས་འཁུར་རི་ལས་མཐོ་བའི་མཛའ་བ་ལས།།
མཛའ་མོ་དྲན་པའི་སྙན་ངག་མཆི་མས་བྲིས།།

ཁྱམས་རའི་སྙན་ངག་པའི་སྒོ་འགྲམ་གྱི་གསང་བ་བརྗོད་པ་སྟེ་ལེའུ་གསུམ་པ་འོ།།

2024-05-30 ཤེད་བུ།

ཤགས་འགྱེད།