བྷི་རེ་སི་ཐེན་དྲེད་མོང་ (Berenstain Bears) ཞེས་པའི་དེབ་ཕྲེང་འདི་ནི་བྷི་རེ་སི་ཐེན་དང་ཇེན་ཞེས་སུ་འབོད་པའི་སྟངས་དཔྱལ་ཟུང་གིས་གསར་རྩོམ་གནང་བའི་བྱིས་པའི་སྒྲུང་དེབ་གྲགས་ཅན་ཞིག་ཡིན། དེབ་ཕྲེང་འདིའི་བརྗོད་གཞི་གཙོ་བོ་ནི་སྤུ་མདོག་སྐྱ་བོ་ཅན་གྱི་དྲེད་མོང་ཁྱིམ་ཚང་ཞིག་གིས་དྲེད་ཕྲུག་རྣམས་ལ་ཡ་རབས་བཟང་སྤྱོད་དང་བདེ་ཐང་སློབ་གསོའི་སྐོར་གྱི་ཁ་ཏ་བསླབ་བྱ་གནང་བའི་གཏམ་རྒྱུད་ཀྱིས་གྲུབ་པར་བྱས་ཡོད། 2005 ལོར་ཡབ་སི་ཐེན་མཆོག་ཚེ་ལས་འདས་རྗེས། ཨ་མ་ཇེན་དང་བུ་མེ་ཁུ་གཉིས་ཀྱིས་མཉམ་འབྲེལ་སྒོས་དྲེད་མོང་སྒྲུང་དེབ་དང་དེའི་རི་མོ་གསར་རྩོམ་གྱི་མུ་མཐུད། 2012 ལོར་མ་ཡུམ་ཇེན་ཚེ་ལས་འདས། ཁོང་གཉིས་ཀྱི་བུ་མེ་ཁུ་ཡིས་དེབ་ཕྲེང་འདིའི་རྩོམ་པ་པོའི་འགན་ཆ་ཚང་བཞེས་ནས་རྒྱུན་སྐྱོང་གནང་མུས་སུ་མཆིས། 1962 ལོར་དྲེད་མོང་སྒྲུང་དེབ་༼སྦྲང་རྩི་འཚོལ་བ།༽ ཞེས་པ་ཐེངས་དང་པོར་པར་སྐྲུན་བྱས་པ་ནས་བཟུང་དེབ་བྱང་མི་འདྲ་བའི་ཀློག་དེབ་400 ཡས་མས་པར་དུ་བཏབ། སྐད་ཡིག་ཉི་ཤུ་རྩ་གསུམ་ནང་བསྒྱུར། དེབ་གྲངས་ས་ཡ 260 ལྷག་བྲིན་པར་སྐད། དྲེད་མོང་དེབ་ཕྲེང་འདི་དེབ་གཟུགས་ཀྱི་པར་སྐྲུན་འབའ་ཞིག་མ་ཡིན་པར་བྱིས་པའི་མུ་འབྲེལ་གློག་བརྙན་ལའང་ཕབ་སྐྲུན་བྱས། ཕྲུ་གུའི་རྩེད་ཆས་སོགས་ཐོན་རྫས་སྣ་ཚོགས་ཀྱི་ཁྲིམས་མཐུན་ཟོང་རྟགས་སུའང་བདམས། དྲེད་མོང་དེབ་ཕྲེང་ཞེས་པའི་སྒྲུང་དེབ་འདི་དེ་ལྟ་དེ་ལྟར་ལོ་བཅུ་ཕྲག་འགའི་ནང་དར་ཁྱབ་ཆེན་པོ་ཕྱིན་པ་དང་གཟེངས་རྟགས་མང་པོ་ཐོབ་ཡོད་པ་བཅས་སོ།།

བསྒྱུར་འདུན་སྐྱེས་ཚུལ།

ཟླ་ཚེས་གསལ་པོར་མི་དྲན་པའི་ལོ་ཤས་ཀྱི་གོང་རོལ་ཞིག་སྟེ། ཡང་ན་ངེད་ཀྱི་སྐྱེས་མས་བླུས་ཤིང་བུ་ཆུང་གིས་བཀླགས་པའི་སྔ་དགོང་དེ་དག་ལ། ངས་ཀྱང་དྲེད་མོང་ཞེས་པའི་སྒྲུང་དེབ་འདི་ལ་གཅེས་གཅེས་བྱས། ལག་ཏུ་བཟུང་། སེམས་ཀྱིས་བཀླགས་པ་ཡིན། ཡིད་དུ་འོང་ཞིང་གསོན་ཉམས་ལྡན་པའི་རི་མོ་དང་ཡིག་འབྲུ་དེ་དག་ལ་བརྩེ་དུངས་ཆགས་པར་གྱུར། ངེད་ཚང་གི་ངོ་ཤེས་བཟང་ས་དང་ཕ་མ་བུ་རྒྱུད། སློབ་གྲྭའི་དགེ་རྒན་སོགས་ལ་དེའི་སྐོར་ནས་ཁ་བརྡ་བྱས་འོངས་དུས། དེ་དག་གི་ཁྲོད་དུ་སོ་སོ་ཕྲུ་གུ་ཡིན་དུས་དྲེད་མོང་སྒྲུང་དེབ་མ་བཀླགས་པའི་མི་གཅིག་ཀྱང་མི་འདུག སྒྲུང་དེབ་འདི་ཡིས་བཞག་པའི་བག་ཆགས་ནི་ཤིན་ཏུ་ནས་ཀྱང་གཏིང་ཟབ་པའི་ཚོད་དུའང་འདུག་པ་འཕྲིགས་བྱུང་། དེ་ཕྱིར། གུས་པས་དྲེད་མོང་ཞེས་པའི་དེབ་ཕྲེང་ལས་དེབ་བཅུ་བདམས་ཤིང་དུས་ཚོད་ནམ་ཡོད་ལ་རང་རེའི་ཡི་གེར་བསྒྱུར་ཁུལ་བྱས་ནས་ལོ་འགར་ཡོང་བ་རེད།

སྤྱིར་འོ་སྐོལ་གྱི་བོད་ཡིག་དཔེ་དེབ་ཉོ་ཚོང་གི་ཁྲོམ་ར་རྒྱ་ཆུང་བ་དང་། སྒོས་སུ་བྱིས་སྒྲུང་བླུ་འདོད་ཀྱི་ཡི་ག་འཆུས་པ། ཕྲུ་གུའི་དཔེ་ཀློག་རམ་འདེགས་ལ་ལྟག་ཆུ་ཆད་འདུག་པ་བཅས་ལ་བསམ་ན། སྒྲུང་དེབ་འདི་དག་པར་སྐྲུན་བྱེད་དགོས་པའི་སྙིང་པོ་ཆེར་མ་མཐོང་མོད། རྒྱ་ལ་དེ་ལྟར་ཡིན་ནའང་། གུས་པས་དུས་ཚོད་ནི་བཏང་བཞག བོད་བསྒྱུར་ནི་གྲུབ་ཟིན། ཡང་ཅིག་བཤད་ན། བོད་ཕྱི་ནང་གཉིས་ཀྱི་ས་སྐྱེས་རྡོ་སྐྱེས་ཀྱི་གཅེས་ལོ་ཚོའི་བགོ་སྐལ་དུ་བསྟབས་ཐུབ་སོང་ན་ཕན་ཐོགས་ཨེན་ཙམ་རེ་ནི་འབྱུང་ངོ་སྙམ་པའི་ཀུན་སློང་ཞིག་གིས་ཐོགས་དྲངས་ཏེ་འབད་འབུངས་དཔེ་མེད་བྱས་ནས་དཔར་བ་ཡིན། ད་ནི་དྲེད་མོང་ཞེས་པའི་སྒྲུང་དེབ་ལས་དེབ་ཆུང་བཞི་ཞིག་ལམ་ལ་བཏེགས་ཟིན་ན། འདི་དག་ཕ་མ་དང་བུ་རྒྱུད་སུའི་ལག་ཏུ་འབྱོར་ན་ཕན་ཐོགས་ཅུང་ཙམ་ཡོད་པའི་སྨོན་འདུན་ཞུ་རྒྱུ་ཡིན།
མཐར། བྱམས་བརྩེའི་ལོ་ལ་ཕུལ་བའི་མཆོད་པ་ཆུང་ཆུང་ཞིག་ཀྱང་ཡིག་འབྲུ་འདི་དག་ཡིན་རོགས་ཞེས་ཀྱང་ཞུའོ།།

Many years ago, when my son was young, my wife pulled out some of her childhood books to read with him. When I held the Berenstain Bear books in my hand, read it with my heart, and was struck by the vivid pictures, I fell in love with these books. Through conversations with family, parents, and school teachers I learned that all of them had read the Bear books when they were children and the impression of the stories were nostalgic and profound.

Therefore I set to the task of translating many of them into my beloved Tibetan language. Through much motivation and effort, these four little books have been launched. I hope that these will be of help to parents and their children. This is a gift of love to my people.

2025/11/10 ཨ དོན་ཉི་ནས།

2025-11-11 རྡོ་གོར་མོ།

ཤགས་འགྱེད།