དཀར་ནག་གཉིས་སུ་འཚེར་བའི
ཐག་རིང་གི་ས་སྲོད་དུ
ང་ལ་ཅི་ཞིག་མཆིས་སམ

སྐབས་འདི་འདྲ་ཞིག་ལ
Whiskey འཐུང་གིན་པའི་སེམས་ཅན་ཁེར་རྐྱང་ཁྱོད
སུ་ཡི་ཆེད་དུ་གདུང་ཡོང་ངམ
གང་གི་དོན་དུ་རྨས་སོང་ངམ

སྐྱ་སོབ་སོབ་ཏུ་སྣང་བའི་རི་རྩེ་ལ་བྱ་རྒོད་བབས་བྱུང
སྔོ་ཡོམ་ཡོམ་དུ་འགུལ་བའི་རི་ཤོད་ལ་ཁ་བ་འཚུབ་བྱུང

སྐོམ་གདུང་གི་མིག་ཟུང་དུ
ངས་ཁ་རོག་གེར་རི་ཞིག་ལ་རྟེན་འབྲེལ་ཞུས
རི་དེ་རི་ཞིག་ཡིན

སྐབས་འདིར་སྨྲ་བ་ཅི་ཡང་མེད་པར
རི་སྒང་གི་ཁྱི་སྐད་དང་སྐར་མ་བཏུས་ནས
ཁྱེད་ཀྱི་ཨམ་ཕྲག་ཏུ་འཇུག་འདོད

ནམ་ཞིག་ལ
ནམ་ཞིག་ལ
ཁྱེད་ཀྱི་མུན་པའི་ཁྲོད་དུ་འཆི་དགོས་པ་དེ་ང་ཡིན་ནམ

ཧ ཧ ཧ
ཉི་འོད་ཀྱི་མགྲིན་པ་རྣངས་བའི་དུས་ཤིག་བྱུང་ན
ང་ཡི་རླུང་དང་རུས་པ
ཁྱེད་ཀྱི་དོར་མ་ཡིན་རོགས

༢༠༢༥/༡༡/༡༠ ཨ དོན་ཉི།

___________

ཨ་དོན་ཉིའི་སྙན་ངག་བཀླགས་རྗེས།

གསལ་ལེ་རྒྱལ།

ང་དང་ངའི་སྙན་ངག་གི་རྩྭ་ཐང་རྒས་ཟིན་ནའང་།
ཁ་མཚར་དང་ཀུ་རེའི་མེ་ཏོག་ཀྱང་ཡལ་ཟིན་ཡང་།
ཨ་དོན་ཉིའི་སྙན་ངག་གིས་ང་ལ་འདོད་ཆགས་ཡང་ཡང་བསླངས།

དམྱལ་བ་བོ། མ་རབས་རེད་ཡ།
ལོ་ལོན་ཚོ་འཆི་གི་ར་འཇུག་རྒྱུ་མ་རེད།

སྙན་ངག་ལ་མཛེས་མའི་ཁ་མྱིག་བྲིས་ནས།
བོད་ཡིག་ལ་མྱི་སྐད་ཀྱི་གདངས་ཡོང་གི་བཅུག
ལོ་ལོན་ཚོའི་རྣམ་ཤེས་ལ་ཆུང་དུས་ཀྱི་སྣང་བ་སྤྲད་ནས་དགུང་ལ་སྤུར།
སེམས་པ་སྙི་མོ་རྣམས་དགའ་སྣང་གིས་མཁའ་ལ་བཀྱག་བཀྱག་བཀྱག་ཏེ་སྐྱོ་སྣང་གིས་ས་ལ་ཤེད་ཀྱིས་བརྒྱབ།
རོགས་ཆུང་ལོ་དང་སྙིང་ཉེ་བའི་གྲོགས་པོ་ཚོ་ན་ཟུག་སློང་བྱེད་ཀྱི་ལག་ཆ་བྱས།

སྙན་ངག་གིས་སྐྱ་བྷ་ཚོར་སྐྲག་མི་དགོས་ས་ནས་གྲུ་ལག་བརྫེ་རུ་བཅུག་ནས་ལྟད་མོར་བལྟས།
སྙན་ངག་གིས་ལོ་ལོན་ཚོར་དོན་མེད་ལ་འདོད་ཆགས་ལང་དུ་བཅུག་ནས་གད་མོ་བགད།

བོད་ཡིག་དང་མཛེས་མའི་ཞེན་ཆགས་ལ་འབྱར་བའི་སེམས་པ་རྣམས།
ལོ་རྒན་ལྔ་བཅུའི་རྒས་མཚམས་ནས་སྙན་ངག་གིས་བཙན་གྱིས་བཀག

ཨ་དོན་ཉི།
དམྱལ་བ་བོ། ད་ཁྱོས་ང་འཆི་གི་ཞོག་པ།
བཀའ་འགྱུར།

ཤགས་འགྱེད།